വയർ കുറയ്ക്കണോ, ഈ 8 കാര്യങ്ങൾ പിന്തുടരൂ... ന്യൂട്രിഷ്യനിസ്റ്റ് പറയുന്നു

ശരീരഭാരവും അടിവയറും കുറക്കാൻ മാർ​ഗങ്ങൾ തേടുന്നവർ നിരവധിയാണ്. സാമൂഹികമാധ്യമങ്ങളിൽ ഇതിനായി നിരവധി ഡയറ്റുകളും വർക്ഔട്ടുകളും പലരും പങ്കുവെക്കാറുമുണ്ട്. എട്ടുകാര്യങ്ങൾ കൃത്യമായി പിന്തുടരുകയാണെങ്കിൽ ആഴ്ചകൾക്കുള്ളിൽ ശരീരഭാരവും അടിവയറും കുറക്കാൻ സാധിക്കുമെന്നാണ് ന്യൂട്രിഷ്യനിസ്റ്റ് നേഹ പരിഹാർ പറയുന്നത്. 

വയറിലെ കൊഴുപ്പ് കുറക്കുന്നതിന് ക്ഷമയും ആരോഗ്യകരമായ ഭക്ഷണക്രമം, പതിവ് വ്യായാമം, സ്ട്രെസ് മാനേജ്മെൻ്റ് എന്നിവ ഉൾക്കൊള്ളുന്ന സമഗ്രമായ സമീപനമാണ് ആവശ്യം. ഈ എട്ടുകാര്യങ്ങൾ കൂടി പിന്തുടരുകയാണെങ്കിൽ ​ഗണ്യമായ മാറ്റങ്ങൾ സംഭവിക്കുമെന്നാണ് നേഹ പറയുന്നത്.

കലോറി ഉപഭോഗം: ദിവസവും ഒരേ കലോറി കഴിക്കുന്നത് മെറ്റബോളിസത്തെ മന്ദഗതിയിലാക്കും. കൂടുതൽ കലോറിയും കുറഞ്ഞ കലോറിയും ഉള്ള ദിവസങ്ങൾ മാറിമാറി ക്രമീകരിക്കുക.

രാവിലത്തെ സൂര്യപ്രകാശം: രാവിലെ ഉണർന്ന് ഒരു മണിക്കൂറിനുള്ളിൽ 10-15 മിനിറ്റ് സൂര്യപ്രകാശം ഏൽക്കുന്നത് കോർട്ടിസോളിൻ്റെ അളവ് സന്തുലിതമാക്കുന്നു. ഇത് ജൈവഘടികാരം നിയന്ത്രിക്കുകയും കൊഴുപ്പ് കുറക്കാൻ സഹായിക്കുകയും ചെയ്യും.

രാത്രി വൈകിയുള്ള ഭക്ഷണം: രാത്രി വൈകി ഭക്ഷണം കഴിക്കുന്നത് ശരീരത്തിൽ കൂടുതൽ കൊഴുപ്പ് സംഭരിക്കുന്നതിന് ഇടയാക്കും.

മഗ്നീഷ്യം അടങ്ങിയ ഭക്ഷണം: മഗ്നീഷ്യത്തിന് കോർട്ടിസോൾ കുറയ്ക്കാനും ഉറക്കം മെച്ചപ്പെടുത്താനും ശരീരവണ്ണം കുറയ്ക്കാനും കഴിയും. ഇലക്കറികളും വിത്തുകളും ഭക്ഷണക്രമത്തിൽ ഉൾപ്പെടുത്തുന്നത് ഉത്തമമാണ്.

ഭക്ഷണം നന്നായി ചവയ്ക്കുക:  വളരെ വേഗത്തിൽ ഭക്ഷണം കഴിക്കുന്നത് ദഹനത്തെ ബാധിക്കുന്നു. ഇത് ശരീരത്തിലെ കൊഴുപ്പിന്റെ അളവ് ഉയരുന്നതിന് കാരണമാകുന്നു.

ശരീരത്തിലെ ജലാംശം - വെള്ളം മാത്രമല്ല പൊട്ടാസ്യം, സോഡിയം തുടങ്ങിയ ഇലക്ട്രോലൈറ്റുകളും നിർജലീകരണം ഒഴിവാക്കാൻ അത്യാവശ്യമാണ്. 

മഞ്ഞളും കുരുമുളകും ഉൾപ്പെടുത്തുക: ഭക്ഷണത്തിൽ മഞ്ഞളും കുരുമുളകും ഉൾപ്പെടുത്തുന്നത് മെറ്റബോളിസത്തിനും ദഹനത്തിനും സഹായകരമാണ്.

വർക്ക്ഔട്ട് ഓവർലോഡ്: ഓവർട്രെയിനിങ് കോർട്ടിസോളിൻ്റെ അളവ് വർദ്ധിപ്പിക്കും. ഇത് വയറിലെ കൊഴുപ്പ് ഉയരുന്നതിന് കാരണമാകാം. 

(ശ്രദ്ധിക്കുക: ആരോഗ്യ വിദഗ്ധന്റെയോ  ന്യൂട്രീഷനിസ്റ്റിന്റെയോ ഉപദേശം തേടിയ ശേഷം മാത്രം ഭക്ഷണക്രമത്തിൽ മാറ്റം വരുത്തുക.)

Content Highlights: Nutritionist reveals 8 effective tips to lose belly fat and weight