ഷോക്കേറ്റതിന് സമാനമായ വേദന, എന്താണ് സൽമാൻ ഖാനെ ബാധിച്ച ട്രൈജെമിനൽ ന്യൂറാൾജിയ?

കുറച്ച് ദിവസങ്ങൾക്ക് മുമ്പാണ് ബോളിവുഡ് നടൻ സൽമാൻ ഖാൻ താൻ നേരിടുന്ന ആരോ​ഗ്യപ്രശ്നങ്ങളേക്കുറിച്ച് പങ്കുവെച്ചത്. അതിലൊന്ന് അധികം ചർച്ച ചെയ്യപ്പെട്ടിട്ടില്ലാത്ത ട്രൈജെമിനൽ ന്യൂറാൾജിയ എന്ന രോ​ഗമായിരുന്നു. എന്താണ് ഈ രോ​ഗമെന്നും ഇതിന്റെ ലക്ഷണങ്ങളും ചികിത്സയും എപ്രകാരമാണെന്നും പരിശോധിക്കാം. 

എന്താണ് ട്രൈജെമിനൽ ന്യൂറാൾജിയ? 
‌
വെെദ്യശാസ്ത്രത്തിന് പരിചിതമായവയിൽ ഏറ്റവും വേദനാജനകമായ രോ​ഗങ്ങളിൽ ഒന്നാണ് ട്രെെജെമിനൽ ന്യൂറാൾജിയ. മുഖത്ത് സംവേദനങ്ങൾ സാധ്യമാക്കുന്ന നാഡിയെയാണ് ഈ രോ​ഗം ബാധിക്കുക. ഏതുപ്രായത്തിലുള്ളവരെയും രോ​ഗം ബാധിക്കാമെങ്കിലും അമ്പത് കഴിഞ്ഞവരെയാണ് കൂടുതലായി ബാധിക്കുന്നത്. പുരുഷൻമാരെ അപേക്ഷിച്ച് സ്ത്രീകളിലാണ് രോ​ഗസാധ്യത കൂടുതൽ. 

നാഡികൾ തലച്ചോറിൽ നിന്ന് ആരംഭിക്കുന്ന ഭാ​ഗത്ത് ഞരമ്പുകൾ ഉരസിയുണ്ടാകുന്ന കേടുപാടുകളാണ് പ്രധാന കാരണം. ഞരമ്പുകളുടെ വികാസ സങ്കോചങ്ങൾ കാരണം നാഡിയുടെ സംരക്ഷണകവചം ക്ഷയിക്കും. തുടർന്ന് ഇവ ഹെെപ്പർ ആക്ടീവ് ആകുന്നതുമൂലമാണ് വേദന അനുഭവപ്പെടുന്നത്. വളരെ അസാധാരണമായ ട്യൂമറുകൾ, ധമനിവീക്കം, സ്ട്രോക്ക് എന്നിവയൊക്കെ ഈ അവസ്ഥയ്ക്ക് കാരണമാകാറുണ്ട്.

ചെറിയ സ്പര്‍ശമേല്‍ക്കുമ്പോഴും കാറ്റുതട്ടുമ്പോഴും ചിരിക്കുമ്പോഴും പോലും മുഖത്ത് ഷോക്ക് അടിക്കുന്നതുപോലെ അനുഭവപ്പെടുകയും കടുത്ത വേദനയുണ്ടാവുകയും ചെയ്യും. വേദനയുടെ തീവ്രത മൂലം സൂയിസൈഡ് ഡിസീസ് എന്ന വിളിപ്പേരും ഈ രോ​ഗത്തിനുണ്ട്. പലരോ​ഗികളിലും വേദനയുടെ ആഘാതം സഹിക്കാൻ വയ്യാതെ ആത്മഹത്യാ ചിന്തകൾപോലും ഉടലെടുക്കുന്നത് കൊണ്ടാണിത്. 

പ്രധാനലക്ഷണങ്ങൾ

വൈദ്യുതാഘാതത്തിന് സമാനമായ പെട്ടെന്നുള്ള തീവ്രമായ വേദന, പലപ്പോഴും ഒരുഭാ​ഗത്ത് മാത്രമായിരിക്കും
മുഖത്ത് സ്പർശിക്കുമ്പോഴും ഭക്ഷണം ചവയ്ക്കുമ്പോഴും സംസാരിക്കുമ്പോഴും വേദന
ബ്രഷ് ചെയ്യുമ്പോഴും ചവയ്ക്കുമ്പോഴും വരുന്ന വേദന
വേദന ഏതാനും സെക്കൻഡുകൾ തൊട്ട് മിനിറ്റുകൾ വരെ നീണ്ടുനിൽക്കാം

ആരെയാണ് കൂടുതൽ ബാധിക്കുക? 

അമ്പതു വയസ്സ് കടന്നവരെയാണ് രോ​ഗം കൂടുതലായി ബാധിക്കാറുള്ളതെങ്കിലും സ്ത്രീകളിൽ ഈ രോ​ഗത്തിന്റെ നിരക്ക് കൂടുതലാണെന്ന് 2022-ൽ പുറത്തുവന്ന ഒരു ആ​ഗോളപഠനത്തിൽ പറയുന്നുണ്ട്. ചെറുപ്പക്കാരിലും രോ​ഗം സ്ഥിരീകരിച്ചു കണ്ടുവരുന്നുണ്ട്. ജനിതകഘടകങ്ങൾ, ഓട്ടോഇമ്മ്യൂൺ തകരാറുകൾ, നാഡീസംബന്ധമായ രോ​ഗങ്ങൾ തുടങ്ങിയവ അപകടസാധ്യതാ ​ഘടകങ്ങളാണ്.90 ശതമാനം രോ​ഗികളിലും മരുന്നുചികിത്സകൊണ്ടുതന്നെ രോ​ഗം നിയന്ത്രിക്കാൻ സാധിക്കും. മരുന്ന്ചികിത്സ ഫലപ്രദമല്ലെന്ന് കണ്ടാൽ ശസ്ത്രക്രിയ വേണ്ടിവരും. 

Content Highlights: Learn about trigeminal neuralgia, its causes, symptoms, and treatment options.