വാക്‌സിനേഷനും ഓട്ടിസവും: ശ്രീധര്‍ വെമ്പുവിന്റെ വാദം തള്ളി ആരോഗ്യവിദഗ്ധര്‍, എന്താണ് ശാസ്ത്രം പറയുന്നത് ?

സോഹോ സ്ഥാപകനും സിഇഒയുമായ ശ്രീധർ വെമ്പു വാക്സിനേഷനെക്കുറിച്ച് ഉന്നയിച്ച വിചിത്രവാദമാണ് ഇപ്പോൾ സാമൂഹികമാധ്യമങ്ങളിൽ ചർച്ചാവിഷയം. കുട്ടിക്കാലത്തെ വാക്സിനേഷൻ ഓട്ടിസം നിരക്ക് വർധിക്കുന്നതിന് കാരണമായേക്കാമെന്ന് ശ്രീധർ വെമ്പു വാദമുന്നയിച്ചു. എന്നാൽ, ഈ വാദം അടിസ്ഥാനരഹിതമായി തെറ്റാണെന്ന് ചൂണ്ടിക്കാട്ടി ആരോഗ്യവിദഗ്ധർ രംഗത്തെത്തി. ആളുകളുടെ ജീവൻ രക്ഷിക്കുന്ന രോഗപ്രതിരോധ പദ്ധതികളിലുള്ള പൊതുജന വിശ്വാസം തകർക്കാൻ ഇത്തരം വാദങ്ങൾ ഇടയാക്കുമെന്നും ഇവർ അഭിപ്രായപ്പെട്ടു.

ആഗോളതലത്തിൽ, ഏകദേശം 25-ലധികം പഠനങ്ങൾ വാക്സിനും ഓട്ടിസവും തമ്മിൽ യാതൊരു ബന്ധവുമില്ലെന്ന് സ്ഥിരീകരിക്കുന്നുണ്ട്. ലോകാരോഗ്യ സംഘടന (WHO), സെൻ്റേഴ്‌സ് ഫോർ ഡിസീസ് കൺട്രോൾ ആൻഡ് പ്രിവൻഷൻ (CDC), ഇന്ത്യൻ കൗൺസിൽ ഓഫ് മെഡിക്കൽ റിസർച്ച് (ICMR) എന്നിവരും ഇക്കാര്യത്തെ പിന്തുണയ്ക്കുന്നു. 6,50,000-ത്തിൽ അധികം കുട്ടികളെ ഉൾപ്പെടുത്തി 2019-ൽ നടന്ന ഒരു ഡാനിഷ് പഠനത്തിൽ, വാക്സിൻ എടുക്കാത്തവരെ അപേക്ഷിച്ച് വാക്സിൻ എടുത്ത കുട്ടികൾക്ക് ഓട്ടിസം വരാനുള്ള സാധ്യത കൂടുതലല്ലെന്ന് കണ്ടെത്തിയിരുന്നു.

എന്താണ് വാക്സിന്റെ 'റോൾ'?

• വാക്സിനുകൾ രോഗപ്രതിരോധ സംവിധാനത്തെ അണുബാധകളെ തുടക്കത്തിൽത്തന്നെ തിരിച്ചറിയാനും സഹായിക്കുന്നു.
• കുട്ടിക്കാലത്തെ വാക്സിൻ അഞ്ചാംപനി, പോളിയോ, ഡിഫ്തീരിയ, വില്ലൻചുമ, ക്ഷയം തുടങ്ങിയ രോഗങ്ങളിൽ നിന്ന് സംരക്ഷണം നൽകുന്നു.
• പ്രതിരോധ കുത്തിവയ്പ്പുകൾ പ്രതിവർഷം 40 ലക്ഷത്തിലധികം മരണങ്ങൾ തടയുന്നതായാണ് ലോകാരോഗ്യ സംഘടനയുടെ കണക്കുകൾ പറയുന്നത്.

വാക്സിൻ എടുക്കാത്തതിലെ അപകടസാധ്യതകൾ

• ന്യുമോണിയ, തലച്ചോറിലെ നീർവീക്കം എന്നിവയ്ക്ക് അഞ്ചാംപനി കാരണമാകും.
• പോളിയോ തളർവാതത്തിന് കാരണമായേക്കും.
• ഡിഫ്തീരിയ, വില്ലൻ ചുമ എന്നിവ കുഞ്ഞുങ്ങളെ ഗുരുതരമായി ബാധിക്കും

എന്താണ് ഓട്ടിസം?

ഒരു ന്യൂറോ ഡെവലപ്‌മെന്റൽ അവസ്ഥയാണ് ഓട്ടിസം അല്ലെങ്കിൽ ഓട്ടിസം സ്പെക്ട്രം ഡിസോർഡർ (ASD) എന്നത്. ജനിതകവും പാരിസ്ഥിതികവുമായ ഘടകങ്ങൾ ഉൾപ്പെടെ സങ്കീർണ്ണമായ കാരണങ്ങളാണ് ഓട്ടിസത്തിനുള്ളത്. അല്ലാതെ, വാക്സിനും ഓട്ടിസവും തമ്മിൽ യാതൊരു ബന്ധവുമില്ല. നൂറിലധികം ജനിതക വകഭേദങ്ങൾക്ക് ഓട്ടിസത്തിനുള്ള സാധ്യതയെ സ്വാധീനിക്കാൻ കഴിഞ്ഞേക്കുമെന്നാണ് നേച്ചർ ജനറ്റിക്സ്, ദി ലാൻസെറ്റ് സൈക്യാട്രി തുടങ്ങിയ ജേണലുകളിൽ പ്രസിദ്ധീകരിച്ച പഠനങ്ങൾ വ്യക്തമാക്കുന്നത്.

Content Highlights: Ex-CEO Sridhar Vembu`s false claim linking childhood vaccines to autism is debunked by health experts. Learn the facts about vaccine safety and efficacy.