ഉലുവ കുതിർത്ത് വെച്ച വെള്ളം കുടിക്കാറുണ്ടോ? ശരീരത്തിന് ഉണ്ടാകുന്ന മാറ്റങ്ങൾ അറിയാം, ഡയറ്റീഷ്യൻ പറയുന്നു

അടുക്കളയിൽ സാധാരണയായി കാണുന്ന ഒന്നാണ് ഉലുവ. എന്നാൽ ഈ ഇത്തിരിക്കുഞ്ഞന് നിരവധി ആരോഗ്യഗുണങ്ങളാണുള്ളത്. നാരുകൾ, ആന്റി ഓക്‌സിഡന്റുകൾ, വിറ്റാമിനുകളായ എ, സി തുടങ്ങിയവ അടങ്ങിയ ഉലുവ ഡയറ്റിൽ ഉൾപ്പെടുത്തുന്നത് ആരോഗ്യത്തിന് ഗുണം ചെയ്യും. ഇപ്പോഴിതാ, ഉലുവ കുതിർത്ത വെള്ളം രാവിലെ വെറും വയറ്റിൽ കുടിക്കുന്നത് ശരീരത്തിന് നല്ലതാണെന്ന് പറയുകയാണ് ഡയറ്റീഷ്യൻ കിരൺ ദലാൽ. ഇത് ആരോഗ്യപരിപാലനത്തിനും രക്തത്തിലെ പഞ്ചസാരയുടെ അളവ് സ്ഥിരപ്പെടുത്തുന്നതിനും ഫലപ്രദമാകുമെന്നും അവർ ഹെൽത്ത് ഷോട്ട്സിനോട് പറഞ്ഞു.

ഇൻസുലിൻ സംവേദനക്ഷമത

രക്തത്തിലെ പഞ്ചസാരയുടെ അളവ് നിയന്ത്രിക്കുന്നതിൽ ഇൻസുലിൻ സംവേദനക്ഷമത(insulin sensitivity) പ്രധാനമാണ്. ഇത് ഗ്ലൂക്കോസിന്റെ ഉപയോഗം മികച്ച രീതിയിൽ നിയന്ത്രിക്കാൻ സഹായിക്കും. പ്രമേഹമുള്ളവരെ സംബന്ധിച്ച് ഈ കാര്യം പ്രധാനമാണ്. ഉലുവ ഇൻസുലിൻ സംവേദനക്ഷമത മെച്ചപ്പെടുത്താൻ സഹായിക്കുമെന്ന് ഫ്രോണ്ടിയേഴ്സ് ഇൻ ന്യൂട്രീഷനിൽ പ്രസിദ്ധീകരിച്ച ഒരു ഗവേഷണവും വ്യക്തമാക്കുന്നു.

രക്തത്തിലെ പഞ്ചസാരയുടെ അളവ്

ഉലുവയിൽ അടങ്ങിയിട്ടുള്ള നാരുകൾ പഞ്ചസാര ആഗിരണം ചെയ്യുന്നതിന്റെ വേഗത കുറയ്ക്കുന്നു. ഇത് രക്തത്തിലെ പഞ്ചസാരയുടെ അളവ് കുറയ്ക്കാൻ സഹായിക്കും. കൂടാതെ, ഒരു ഗ്ലാസ് ഉലുവ വെള്ളം കുടിച്ച് ദിവസം തുടങ്ങുന്നത് രക്തത്തിലെ പഞ്ചസാരയുടെ അളവ് നിയന്ത്രിക്കാൻ പാൻക്രിയാസിനേയും സഹായിക്കുന്നു.

ശരീരഭാരം നിയന്ത്രിക്കുന്നു

പ്രമേഹരോഗികളെ സംബന്ധിച്ച് പ്രധാനമാണ് ശരീരഭാരം നിലനിർത്തേണ്ടത്. ഉലുവയിൽ നാരുകൾ ധാരാളം അടങ്ങിയിട്ടുള്ളതിനാൽ ഇത് ശരീരഭാരം നിയന്ത്രിക്കാൻ സഹായിക്കും. രാവിലെ ഉലുവ വെള്ളം കുടിക്കുന്നത് കൂടുതൽ നേരം വയറുനിറഞ്ഞതായി തോന്നിപ്പിക്കുമെന്ന് ഡോക്ടർ പറയുന്നു. ഇത് പിന്നീട് ലഘുഭക്ഷണം കഴിക്കുന്നതിനോ അമിതമായി ഭക്ഷണം കഴിക്കുന്നതിനോ ഉള്ള സാധ്യത കുറയ്ക്കുമെന്നും അവർ വ്യക്തമാക്കി.

കൊളസ്ട്രോളിന്റെ അളവ്

ഉലുവ എൽഡിഎൽ കൊളസ്ട്രോൾ കുറയ്ക്കാൻ സഹായിക്കും. ഇത് ഹൃദ്രോഗ സാധ്യത കുറയ്ക്കുന്നു. അതായത്, പ്രഭാത ദിനചര്യയിൽ ഉലുവ വെള്ളം ചേർക്കുന്നത് പ്രമേഹം നിയന്ത്രിക്കുന്നതിനൊപ്പം ഹൃദയാരോഗ്യം നിലനിർത്താനും സഹായിക്കുന്നു.

ദഹനം മെച്ചപ്പെടും

ദഹനപ്രശ്‌നങ്ങളുള്ളവർ ഫൈബർ ധാരാളം അടങ്ങിയ ഉലുവ വെള്ളം രാവിലെ വെറും വയറ്റിൽ കുടിക്കുന്നത് മലബന്ധത്തെ പ്രതിരോധിക്കാൻ സഹായിക്കും. അതിനൊപ്പം അസിഡിറ്റി, വയർ വീർത്തിരിക്കുന്ന അവസ്ഥ തുടങ്ങിയ പ്രശ്‌നങ്ങളെ അകറ്റാൻ ഉലുവ വെള്ളം കുടിക്കുന്നത് ഗുണം ചെയ്യും.

ചർമത്തിനും നല്ലത്

ശരീരത്തിന്റെ ഉപാപചയ പ്രവർത്തനങ്ങൾ മെച്ചപ്പെടുത്താൻ ഉലുവ വെള്ളം നല്ലതാണ്. ഇത് വയറിലെ കൊഴുപ്പിനെ പുറംതള്ളാനും ശരീരഭാരം കുറയ്ക്കാനും ഉപകരിക്കും. ആന്റി ബാക്ടീരിയൽ, ആന്റി ഇൻഫ്‌ളമേറ്ററി ഗുണങ്ങൾ ഉള്ള ഉലുവ വെള്ളം കുടിക്കുന്നത് ചർമത്തിന്റെ ആരോഗ്യം മെച്ചപ്പെടുത്തും.

(ഈ ലേഖനം പൊതുവായ വിവരങ്ങൾക്കായാണ്. ഇത് വൈദ്യോപദേശത്തിനോ രോഗനിർണ്ണയത്തിനോ ചികിത്സയ്ക്കോ പകരമല്ല. ആരോഗ്യ പ്രശ്നങ്ങൾക്കോ ജീവിതശൈലി മാറ്റങ്ങൾക്കോ എപ്പോഴും ആരോഗ്യ വിദഗ്ധന്റെ ഉപദേശം തേടുക)

Content Highlights: Discover the amazing health benefits of fenugreek water