‘അദ്ഭുതകരം, 100% ഫലം, പാർശ്വഫലങ്ങളില്ല’; രോഗികളെ തെറ്റിദ്ധരിപ്പിക്കുന്ന പരസ്യങ്ങൾ പൂട്ടാൻ ദുബായ്

ദുബായ്: രോഗികളെ ആകർഷിക്കുന്നതിനായി സാമൂഹിക മാധ്യമ പ്ലാറ്റ്ഫോമുകളിലൂടെ നടത്തുന്ന തെറ്റിദ്ധരിപ്പിക്കുന്ന പ്രചാരണങ്ങൾക്കും അതിശയോക്തികലർന്ന പരസ്യങ്ങൾക്കുമെതിരേ നടപടി കർശനമാക്കി ദുബായ് ഹെൽത്ത് അതോറിറ്റി (ഡി.എച്ച്.എ).

ഡി.എച്ച്.എ. ലൈസൻസുള്ള മുഴുവൻ ആരോഗ്യകേന്ദ്രങ്ങൾക്കും ഡോക്ടർമാർക്കും ഇവർക്കായി പ്രചാരണം നടത്തുന്ന സാമൂഹിക മാധ്യമ ഇൻഫ്ലുവൻസേഴ്‌സിനും ബാധകമാകുന്ന രീതിയിൽ ‘സ്റ്റാൻഡേഡ്‌സ് ഫോർ മെഡിക്കൽ അഡ്വർടൈസ്‌മെന്റ് കണ്ടെന്റ് ഓൺ സോഷ്യൽ മീഡിയ’ എന്ന പേരിൽ സമഗ്രമായ പുതിയ മാർഗനിർദേശങ്ങൾ അതോറിറ്റി പുറപ്പെടുവിച്ചു.

ഇൻസ്റ്റഗ്രാം, ഫെയ്സ്ബുക്ക്, ടിക് ടോക്, യുറ്റ്യൂബ്, സ്‌നാപ്ചാറ്റ്, വാട്‌സാപ്പ്, ലിങ്ക്ഡ്ഇൻ തുടങ്ങി എല്ലാ പ്രമുഖ സാമൂഹികമ മാധ്യമങ്ങളിലും പ്രസിദ്ധീകരിക്കുന്ന പരസ്യങ്ങൾക്ക് ഈ നിയമങ്ങൾ ബാധകമാണ്.

ആശുപത്രിയുടെ അനുമതി വേണം

ആശുപത്രികളുടെയോ ക്ലിനിക്കുകളുടെയോ പേരോ ലോഗോയോ അല്ലെങ്കിൽ പ്രത്യേക ചികിത്സാരീതികളോ വ്യക്തമാക്കിക്കൊണ്ട് ഇൻഫ്ലുവൻസേഴ്‌സ് നടത്തുന്ന പോസ്റ്റുകൾക്കും ഇനിമുതൽ നിയന്ത്രണമുണ്ടാകും. വ്യക്തിഗത ഫോണുകളിൽ ചിത്രീകരിക്കുന്നതാണെങ്കിൽപ്പോലും ഏതെങ്കിലും ഒരു സ്ഥാപനത്തിന്റെ പരിധിയിൽവെച്ച് എടുക്കുന്ന പ്രമോഷണൽ വീഡിയോകളുടെ സമ്പൂർണ ഉത്തരവാദിത്വം സ്ഥാപനത്തിനായിരിക്കും. ഇത്തരത്തിലുള്ള ഏത് ഉള്ളടക്കവും പങ്കുവെക്കുന്നതിനുമുൻപ് ബന്ധപ്പെട്ട ആശുപത്രിയുടെ മെഡിക്കൽ ഡയറക്ടറുടെ രേഖാമൂലമുള്ള അനുമതി വാങ്ങിയിരിക്കണം.

വാക്കുകൾക്ക് നിരോധനം

ചികിത്സകളുടെ ഗുണമേന്മയെക്കുറിച്ച് അനാവശ്യ അവകാശവാദങ്ങൾ ഉന്നയിക്കുന്ന ഒട്ടേറെ വാക്കുകൾ പരസ്യങ്ങളിൽ ഉപയോഗിക്കുന്നത് അതോറിറ്റി പൂർണമായും നിരോധിച്ചിട്ടുണ്ട്. അദ്ഭുതകരം, മാജിക്, ഏറ്റവും മികച്ചത്, മറ്റൊന്നിനോടും താരതമ്യം ചെയ്യാനാകാത്തത്, 100 ശതമാനം ഫലം, പാർശ്വഫലങ്ങൾ തീരെയില്ലാത്തത്, പണം തിരികെ നൽകും, ഉടനടി ഫലം ലഭിക്കും തുടങ്ങി രോഗികളിൽ തെറ്റായ ധാരണ ഉണ്ടാക്കുന്ന വാക്കുകളൊന്നും ഇനി പരസ്യങ്ങളിൽ ഉൾപ്പെടുത്താൻ പാടില്ല. കൂടാതെ, മറ്റ് ഡോക്ടർമാരെയും സ്ഥാപനങ്ങളെയും അല്ലെങ്കിൽ സർക്കാർസംവിധാനങ്ങളെയും അപകീർത്തിപ്പെടുത്തുന്ന തരത്തിലുള്ള പരാമർശങ്ങൾക്കും കർശന വിലക്കുണ്ട്.

Content Highlights: DHA introduces comprehensive guidelines for medical advertising on social media., Rules apply to all licensed health centers, doctors, and social media influencers., Promotional content filmed at healthcare facilities requires prior written approval from the Medical Director., Banned misleading terms include 'miracle', 'magic', '100 percent results', and 'guaranteed refund'.