മദ്യപാനശീലം പാൻക്രിയാറ്റിക് കാൻസർ സാധ്യത കൂട്ടും, ഒരളവും സുരക്ഷിതമല്ല- ലോകാരോഗ്യസംഘടന

മദ്യപാനശീലം പാൻക്രിയാറ്റിക് കാൻസർ സാധ്യത വർധിപ്പിക്കുമെന്ന് ലോകാരോ​ഗ്യസംഘടന. മിതമായ അളവിലുള്ള മദ്യപാനം പോലും പാൻക്രിയാറ്റിക് കാൻസർ സാധ്യത വർധിപ്പിക്കുമെന്നാണ് ലോകാരോ​ഗ്യസംഘടന നടത്തിയ പഠനത്തിൽ പറയുന്നത്. ഓസ്ട്രേലിയ, നോർത്ത് അമേരിക്ക, യൂറോപ്പ്, ഏഷ്യ എന്നിവിടങ്ങളിൽ നിന്നുള്ള ഇരുപത്തിയഞ്ച് ലക്ഷംപേരുടെ ആരോ​ഗ്യവിവരങ്ങൾ ശേഖരിച്ചാണ് പഠനം നടത്തിയത്. 

ലോകാരോ​ഗ്യസംഘടനയ്ക്ക് കീഴിലുള്ള ഇന്റർനാഷണൽ കാൻസർ റിസർച്ച് ഏജൻസിയാണ് പഠനം നടത്തിയത്. പാൻക്രിയാറ്റിക് കാൻസർ സാധ്യത കൂട്ടുന്ന പ്രധാന ഘടകമാണ് മദ്യമെന്ന് ​ഗവേഷകർ കണ്ടെത്തി. ദിനംപ്രതി ചെറിയൊരു ​ഗ്ലാസ് വൈൻ കുടിക്കുന്നതും 284 മില്ലി ബിയർ കുടിക്കുന്നതുമൊക്കെ പാൻക്രിയാറ്റിക് സാധ്യത മൂന്നുശതമാനം കൂട്ടുന്നുണ്ട്. കടുത്ത മദ്യപാനികളിൽ അപകടസാധ്യത വീണ്ടും കൂടും. 

ദിവസവും പതിനഞ്ച് മുതൽ 30 ​ഗ്രാം മദ്യപിക്കുന്ന സ്ത്രീകളിൽ പാൻക്രിയാറ്റിക് കാൻസറിനുള്ള സാധ്യത 12ശതമാനം കൂടുതലാണ്. പുരുഷന്മാരിൽ ദിവസവും 30 മുതൽ 60 ​ഗ്രാം വരെ കുടിക്കുന്നത് രോ​ഗസാധ്യത 15ശതമാനം കൂട്ടുന്നു. 60 ​ഗ്രാമിന് മുകളിൽ കുടിക്കുന്ന പുരുഷന്മാരിൽ പാൻക്രിയാറ്റിക് കാൻസർ സാധ്യത 36ശതമാനവും കൂടുതലാണ്. 

മദ്യപാനശീലം പാൻക്രിയാസിന് വീക്കമുണ്ടാക്കുകയും ഇതുവഴി പാൻക്രിയാറ്റിക് സെല്ലുകൾ തകരാറിലാവുകയും ജനിതകവ്യതിയാനത്തിനും കോശങ്ങളുടെ അനിയന്ത്രിതമായ വളർച്ചയ്ക്കും അതുവഴി കാൻസറിലേക്കും കാരണമാകുമെന്നാണ് കരുതുന്നത്. 

പാൻക്രിയാറ്റിക് കാൻസർ-ശ്രദ്ധവേണം

സൈലന്റ് കില്ലർ എന്ന് വിശേഷിപ്പിക്കുന്ന രോ​ഗങ്ങളിലൊന്നാണിത്. പാൻക്രിയാസിലെ കോശങ്ങളുടെ അമിതവളർച്ച മൂലമുണ്ടാകുന്ന അർബുദമാണിത്. ഭക്ഷണം ദഹിക്കാനുള്ള എൻസൈമുകളെ ഉത്പാദിപ്പിക്കുന്നതും രക്തത്തിലെ ഷു​ഗർനില നിയന്ത്രിക്കാനുള്ള ഹോർമോൺ ഉത്പാ​ദിപ്പിക്കുന്നതുമൊക്കെ പാൻക്രിയാസ് ആണ്. പാൻക്രിയാറ്റിക് ഡക്റ്റൽ അഡിനോകാർസിനോമയാണ് ഏറ്റവും സാധാരണയായി കണ്ടുവരുന്നത്. പ്രാരംഭഘട്ടങ്ങളിൽ തിരിച്ചറിയപ്പെടാതെ പോകാനുള്ള സാധ്യതയും ഈ അർബുദത്തിൽ കൂടുതലാണ്. അതിനു പ്രധാനകാരണം പാൻക്രിയാറ്റിക് അർബുദം ശരീരത്തിലെ മറ്റ് അവയവങ്ങളിലേക്ക് പടരുന്നതിന് മുമ്പ് ലക്ഷണങ്ങളിൽ പ്രകടമാകില്ല എന്നതാണ്. 

ലക്ഷണങ്ങൾ

രോ​ഗം വൈകിയ ഘട്ടങ്ങളിൽ മാത്രമേ പലപ്പോഴും ലക്ഷണങ്ങൾ പ്രകടമാവുകയുള്ളൂ. വയറിന്റെ വശങ്ങളിലോ പുറംഭാ​ഗത്തോ ഉള്ള വേദന, വിശപ്പില്ലായ്മ, വണ്ണം കുറയുക, മഞ്ഞപ്പിത്തം, മൂത്രത്തിന് ഇരുണ്ടനിറം, ചൊറിച്ചിൽ, പ്രമേഹം, കൈയിലോ, കാലിലോ വേദനയും വീക്കവും, അമിതക്ഷീണം തുടങ്ങിയവയാണ് പ്രധാന ലക്ഷണങ്ങൾ. 

Content Highlights: WHO study links even moderate alcohol consumption to increased pancreatic cancer risk