ആന്തരിക രക്തസ്രാവം ഉടനടി പുറത്തറിയില്ല, പുറമെ മുറിവുകളില്ലെങ്കിലും ആശുപത്രിയിലെത്തിക്കണം; ലക്ഷണങ്ങളറിയാം

ഈ ലോക ട്രോമ ദിനത്തിൽ അപകടങ്ങൾ ഒഴിവാക്കാനും, സുരക്ഷിതമായി ഇടപെടാനും ജീവനുകൾ രക്ഷിക്കാനും നമുക്ക് പഠിക്കാം. ദിവസവും ജോലിക്കും പഠനത്തിനുമായി വീടുകളിൽ നിന്ന് പുറത്തിറങ്ങുന്ന നമ്മളിൽ ഭൂരിഭാഗവും സുരക്ഷിതരായി മടങ്ങിയെത്തുന്നു. എന്നാൽ ചിലർക്ക് ആ സാധാരണ ദിവസം നിമിഷങ്ങൾ കൊണ്ട് മാറിമറിയാം. റോഡിലുണ്ടാകുന്നൊരു അപകടം, ഗോവണിയിൽ നിന്നുള്ള വീഴ്ച, അടുക്കളയിലെ പൊള്ളൽ അല്ലെങ്കിൽ ജോലിസ്ഥലത്തെ മുറിവുകൾ. പെട്ടെന്നൊരു ദിവസം അവ ജീവന് തന്നെ ഭീഷണിയാകുന്ന അടിയന്തര സാഹചര്യങ്ങളായി മാറിയേക്കാം. 

ബാഹ്യ ശക്തികൾ മൂലം ശരീരത്തിനുണ്ടാകുന്ന പരിക്കുകളെയാണ് വൈദ്യശാസ്ത്രത്തിൽ 'ട്രോമ' എന്ന് വിളിക്കുന്നത്. ലോകാരോഗ്യ സംഘടനയുടെ (WHO) കണക്കനുസരിച്ച്, ലോകമെമ്പാടും പ്രതിവർഷം 44 ലക്ഷത്തോളം ആളുകളാണ് അപകടങ്ങൾ മൂലം മരിക്കുന്നത്. റോഡപകടങ്ങൾ, ഉയരത്തിൽ നിന്നുള്ള വീഴ്ച, പൊള്ളൽ, മുങ്ങിമരണം എന്നിവയാണ് ഇതിൽ പ്രധാനം.

ഒക്ടോബർ 17 ലോക ട്രോമ ദിനമായി ആചരിക്കുമ്പോൾ, അപകടങ്ങൾ തടയുക, കൃത്യസമയത്ത് അടിയന്തര സഹായമെത്തിക്കുക എന്നിവ നമ്മുടെ ഓരോരുത്തരുടെയും കടമയാണെന്ന് ഓർമ്മിപ്പിക്കുന്നു. അപകടത്തിൽപ്പെട്ട ഒരാളെ ആശുപത്രിയിൽ എത്തിക്കുന്നതിന് മുൻപ് നമുക്ക് എന്ത് ചെയ്യാൻ കഴിയും എന്നതിലാണ് ഏറ്റവും പ്രസക്തി.

റോഡ് സുരക്ഷ: സ്വയം തുടങ്ങേണ്ട ജാഗ്രത

ചെറുപ്പക്കാർക്കിടയിൽ മരണത്തിനും വൈകല്യത്തിനും പ്രധാന കാരണങ്ങളിലൊന്ന് റോഡപകടങ്ങളാണ്. ഇന്ത്യയിൽ ഇരുചക്രവാഹനങ്ങൾ കൂടുതലായതിനാൽ ഹെൽമറ്റ് ധരിക്കേണ്ടത് അത്യാവശ്യമാണ്. അമിതവേഗത, ശ്രദ്ധയില്ലാത്ത ഡ്രൈവിംഗ്, മദ്യപിച്ചുള്ള വാഹനമോടിക്കൽ, സീറ്റ് ബെൽറ്റ് ധരിക്കാതിരിക്കൽ എന്നിവ ജീവനുകൾ അപകടത്തിലാക്കുന്നു.

ഹെൽമറ്റും സീറ്റ് ബെൽറ്റും: കൃത്യമായ അളവിലുള്ള ഹെൽമറ്റ് തലയിൽ ഉറപ്പിച്ചു ധരിക്കുക. കാറിലുള്ള എല്ലാവരും സീറ്റ് ബെൽറ്റ് ഉപയോഗിക്കണം.

ശ്രദ്ധ തിരിക്കരുത്: വാഹനമോടിക്കുമ്പോഴും റോഡ് മുറിച്ചുകടക്കുമ്പോഴും മൊബൈൽ ഫോൺ ഉപയോഗിക്കരുത്.

സഹജീവികളോട് കരുതൽ: കവലകളിലെ അല്പനേരത്തെ ക്ഷമയില്ലായ്മയോ അപകടകരമായ ഓവർടേക്കിംഗോ ഒരാളുടെ ജീവിതം തന്നെ തകർത്തേക്കാം. പിഴ ഒഴിവാക്കാൻ മാത്രമല്ല, റോഡിലുള്ള ഓരോ വ്യക്തിയും ആരുടെയൊക്കെയോ പ്രിയപ്പെട്ട കുടുംബാംഗമാണെന്ന ബോധ്യത്തോടെ വേണം വണ്ടിയോടിക്കാൻ.

അപകടങ്ങൾ വീടിനുള്ളിലും സംഭവിക്കാം

റോഡിൽ മാത്രമല്ല, നമുക്ക് പരിചിതമായ അന്തരീക്ഷത്തിലും വലിയ അപകടങ്ങൾ നടക്കാം:

മുതിർന്നവർക്ക് കരുതൽ: പ്രായമായവരിൽ വീഴ്ചകൾ ഇടുപ്പെല്ല് പൊട്ടുന്നതിനും തലച്ചോറിന് പരിക്കേൽക്കുന്നതിനും കാരണമാകുന്നു. വഴുവഴുപ്പുള്ള ബാത്ത്‌റൂം തറകൾ, വെളിച്ചക്കുറവുള്ള പടവുകൾ എന്നിവ അപകടസാധ്യത കൂട്ടുന്നു. ബാത്ത്‌റൂമുകളിൽ പിടിവള്ളികൾ (Grab bars) ഘടിപ്പിക്കുന്നതും വെളിച്ചം ഉറപ്പാക്കുന്നതും വീഴ്ചകൾ തടയും.

കുട്ടികളുടെ സുരക്ഷ: മരുന്നുകൾ, ക്ലീനിംഗ് ലോഷനുകൾ, വിഷവസ്തുക്കൾ എന്നിവ കുട്ടികൾക്ക് എത്താത്തിടത്ത് സൂക്ഷിക്കുക. വെള്ളം, തീ, ചൂടുള്ള പാത്രങ്ങൾ എന്നിവയ്ക്ക് സമീപം കുട്ടികളെ തനിച്ചാക്കരുത്.

ജോലിസ്ഥലത്തെ സുരക്ഷ: തൊഴിലിടങ്ങളിൽ സുരക്ഷാ ഉപകരണങ്ങൾ ധരിക്കാനും മാനദണ്ഡങ്ങൾ പാലിക്കാനും ശ്രദ്ധിക്കുക.

ഒരു അപകടം കണ്ടാൽ നിങ്ങൾ എന്ത് ചെയ്യണം?

അപകടം നടന്ന് ആദ്യത്തെ ചില മിനിറ്റുകളിൽ നമ്മൾ ചെയ്യുന്ന കാര്യങ്ങൾക്ക് ഒരു ജീവൻ തന്നെ രക്ഷിക്കാനുള്ള ശേഷിയുണ്ട്.

1. സ്വന്തം സുരക്ഷ ഉറപ്പാക്കുക: പായുന്ന വാഹനങ്ങൾക്കിടയിലേക്കോ തീയുള്ള സ്ഥലത്തേക്കോ എടുത്തുചാടരുത്. സ്ഥലം സുരക്ഷിതമാണെന്ന് ഉറപ്പുവരുത്തുക.

2. അടിയന്തര സഹായം വിളിക്കുക: അടിയന്തര സേവനങ്ങൾക്കായി 112 ലേക്ക് അല്ലെങ്കിൽ ആംബുലൻസിനായി 108 ലേക്ക് വിളിക്കുക. അപകടം നടന്ന സ്ഥലം, പരിക്കേറ്റവരുടെ എണ്ണം, അവരുടെ അവസ്ഥ എന്നിവ വ്യക്തമായി പറയുക.

3. പരിക്കേറ്റയാളെ പരിശോധിക്കുക: പരിക്കേറ്റയാൾ പ്രതികരിക്കുന്നുണ്ടോ എന്ന് നോക്കുക. ശ്വാസമെടുക്കുന്നില്ലെങ്കിൽ സി.പി.ആർ (CPR) നൽകാൻ തുടങ്ങുക.

4. രക്തസ്രാവം തടയുക: അമിതമായ രക്തസ്രാവമുണ്ടെങ്കിൽ വൃത്തിയുള്ള ഒരു തുണി ഉപയോഗിച്ച് മുറിവിനു മുകളിൽ ശക്തമായി അമർത്തിപ്പിടിക്കുക.

5. അനാവശ്യമായി അനക്കരുത്: തലയ്‌ക്കോ കഴുത്തിനോ നട്ടെല്ലിനോ പരിക്കുണ്ടെന്ന് സംശയമുണ്ടെങ്കിൽ ആളെ അനാവശ്യമായി അനക്കരുത്. ബൈക്ക് യാത്രക്കാരുടെ ഹെൽമറ്റ് ബലമായി അഴിച്ചുമാറ്റാനോ ഒടിഞ്ഞ കൈകാലുകൾ നിവർത്താനോ ശ്രമിക്കരുത്. ഗുരുതരമായി പരിക്കേറ്റയാൾക്ക് ഭക്ഷണവും വെള്ളവും നൽകരുത്.

കണ്ണിൽ കാണാത്ത പരിക്കുകൾ

ബോധമുള്ള, സംസാരിക്കുന്ന ഒരാൾക്ക് പോലും ഗുരുതരമായ ആന്തരിക പരിക്കുകൾ ഉണ്ടായേക്കാം. വീഴ്ചയ്‌ക്കോ ശക്തമായ പ്രഹരത്തിനോ ശേഷം ഉണ്ടാകുന്ന ആന്തരിക രക്തസ്രാവം ഉടനടി പുറത്തറിയണമെന്നില്ല. ബോധക്ഷയം, ഛർദ്ദി, ശ്വാസതടസ്സം, കഠിനമായ വേദന, വിളറിയ ചർമ്മം എന്നിവ കണ്ടാൽ ഉടൻ തന്നെ വൈദ്യപരിശോധന തേടണം. പുറമെ മുറിവുകളില്ലെങ്കിലും വലിയ അപകടത്തിൽപ്പെട്ടവരെ ആശുപത്രിയിലെത്തിക്കുന്നതാണ് സുരക്ഷിതം. പൊള്ളലേറ്റാൽ 20 മിനിറ്റ് നേരം സാധാരണ വെള്ളം ഒഴിക്കുക. ടൂത്ത് പേസ്റ്റോ എണ്ണയോ പുരട്ടരുത്.

ഗോൾഡൻ അവർ (Golden Hour)

ഗുരുതരമായി പരിക്കേറ്റ ഒരാളെ സംബന്ധിച്ച് ആദ്യത്തെ ഒരു മണിക്കൂർ (Golden Hour) വളരെ നിർണായകമാണ്. അപകടം തിരിച്ചറിയാനും, ഉടനടി ആംബുലൻസ് വിളിച്ച് രോഗിയെ ആശുപത്രിയിലെത്തിക്കാനും വൈകുന്ന ഓരോ മിനിറ്റും അപകടസാധ്യത കൂട്ടുന്നു.

അപകടത്തിൽപ്പെട്ടവരെ സഹായിക്കാൻ പലരും പോലീസിനെയോ നിയമനടപടികളെയോ ഭയന്ന് മടിക്കാറുണ്ട്. എന്നാൽ സഹായിക്കുന്നവരെ സംരക്ഷിക്കുന്ന 'ഗുഡ് സമരിറ്റൻ' (Good Samaritan) നിയമങ്ങൾ ഇന്ത്യയിലുണ്ട്. അതിനാൽ ഭയപ്പെടാതെ മുന്നോട്ടുവരിക.

ഒരു കൂട്ടായ ഉത്തരവാദിത്തം

ട്രോമ കെയർ എന്നത് ആശുപത്രിയുടെ വാതിൽക്കൽ നിന്നല്ല തുടങ്ങുന്നത്. അത് ആരംഭിക്കുന്നത് നമ്മൾ എടുക്കുന്ന മുൻകരുതലുകളിൽ നിന്നാണ്. ഹെൽമറ്റും സീറ്റ് ബെൽറ്റും ധരിക്കുക. വേഗത കുറയ്ക്കുക. പ്രഥമശുശ്രൂഷയും സി.പി.ആറും പഠിക്കുക. ഒരു അടിയന്തര സാഹചര്യം ഉണ്ടാകുമ്പോൾ ഭയപ്പെടാതെ സഹായിക്കുക.

ഈ ഒക്ടോബർ 17-ന് നമുക്ക് ഒരു പ്രതിജ്ഞയെടുക്കാം: തടയാൻ കഴിയുന്ന അപകടങ്ങൾ തടയുക, അത്യാഹിത ഘട്ടങ്ങളിൽ മടിക്കാതെ പ്രവർത്തിക്കുക. കാരണം ഒരു ജീവൻ രക്ഷിക്കുന്നത് നമ്മളിൽ ആരിൽ നിന്നും ആരംഭിക്കാം.

പട്ടം എസ്.യു.ടി. ഹോസ്പിറ്റലിൽ എമർജൻസി മെഡിസിൻ വിഭാഗം മേധാവിയും കൺസൾട്ടന്റുമാണ് ലേഖകൻ.

Content Highlights: Learn vital trauma care safety tips on World Trauma Day to prevent accidents and save lives in everyday situations, both at home and on the road.