ഫാസ്റ്റ്ഫുഡ് സംസ്‌കാരവും ജീവിതശൈലീരോഗങ്ങളും; സിസേറിയൻ പ്രസവത്തിലേക്ക് നയിക്കുന്ന കാരണങ്ങളേറെ

പ്രസവ ശുശ്രൂഷാരംഗത്ത് വളരെയധികം ചർച്ച ചെയ്യപ്പെടുന്ന ഒരു വിഷയമാണ് വർധിച്ചുവരുന്ന സിസേറിയൻ പ്രസവങ്ങൾ. വാർത്താമാധ്യമങ്ങളിലും സാമൂഹിക മാധ്യമങ്ങളിലും ഇത് ഒരു ചർച്ചാ വിഷയമാകുന്നുണ്ട്. ഇതിൽ ഡോക്ടർമാരുടെ പങ്ക് എത്രമാത്രമുണ്ട്? സ്ത്രീരോഗവിദഗ്ദ്ധർ മനസ്സിരുത്തിയാൽ ഇത് കുറയ്ക്കാൻ കഴിയുമോ? എന്തായിരിക്കണം ഒരു മാതൃകാ സിസേറിയൻ നിരക്ക്? ഇതിനെക്കുറിച്ച് കൃത്യമായ ഒരു മാർ​ഗനിർദേശം ഇല്ലെന്നുതന്നെ പറയാം. 1980കളിലാണ് ലോകാരോഗ്യസംഘടന ഈ വിഷയത്തിൽ ഒരു പ്രസ്താവന നടത്തിയിട്ടുള്ളത്. 100 സ്ത്രീകൾ പ്രസവിക്കുമ്പോൾ 15 പേർക്ക് സിസേറിയൻ വേണ്ടി വരാം എന്ന് ലോകാരോഗ്യസംഘടന നിരീക്ഷിച്ചിരുന്നു. ആ 15 ശതമാനമാണ് ആരോഗ്യരംഗത്തും സാമൂഹിക മാധ്യമങ്ങളിലും ഉയർത്തിപ്പിടിച്ച് കാണുന്നത്.

15% എന്നൊരു നിരക്ക് മുന്നോട്ടു വച്ച കാലഘട്ടത്തിൽ, അതായത് 40 വർഷം മുമ്പ് അന്നത്തെ നമ്മുടെ മാതൃമരണ നിരക്ക് 180 ആയിരുന്നു. 2024-ൽ കേരളത്തിന്റെ മാതൃമരണ നിരക്ക് 26  ആണ്. ആരോഗ്യരംഗത്ത് നാം വരിച്ചിട്ടുള്ള നേട്ടത്തിന്റെ ഒരു പ്രധാന സൂചനയാണ് ഈ കുറഞ്ഞ മാതൃമരണനിരക്ക്. മെച്ചപ്പെട്ട ചികിത്സാ സൗകര്യങ്ങളും അവസരോചിതമായ സിസേറിയനുകളുമാണ് മാതൃമരണ നിരക്ക് കുറയാനുള്ള പ്രധാന കാരണം.

സിസേറിയൻ നിരക്ക് കുറയുവാൻ വേണ്ടി 1980കളിലേക്ക് ഒരു തിരിച്ചുപോക്ക് ആവശ്യമാണോ?

അമ്മയുടെയും കുഞ്ഞിന്റെയും ആരോഗ്യവും ജീവനും അപകടത്തിലാക്കിക്കൊണ്ട് മാത്രമേ സിസേറിയൻ നിരക്ക് 15 ശതമാനം എന്ന നിലയിലേയ്ക്കുള്ള തിരിച്ചുപോക്ക് സാധ്യമാകൂ. അത് അഭിലഷണീയമല്ല. ഒരു ഗർഭം സിസേറിയൻ പ്രസവത്തിൽ അവസാനിപ്പിക്കുന്നതിന് നിരവധി കാരണങ്ങളുണ്ട്.

ഉയർന്ന രക്തസമ്മർദം ഗർഭിണികൾക്കു വന്നാൽ അമ്മയുടെയും കുഞ്ഞിന്റെയും ആരോഗ്യത്തിനെ പ്രതികൂലമായി ബാധിക്കും. എത്രയും പെട്ടെന്ന് കുഞ്ഞിനെ പുറത്തെടുക്കുക എന്നതാണ് അതിന്റെ പ്രതിവിധി. ആ അനുവദനീയമായ ചുരുങ്ങിയ സമയത്തിനുള്ളിൽ സാധാരണ പ്രസവം സാധ്യമാകാതെ വരുമ്പോൾ സിസേറിയൻ ചെയ്യുക മാത്രമേ നിവർത്തിയുള്ളു. ഇത്തരത്തിൽ സുഖപ്രസവത്തിന് കാത്തിരിക്കുന്നത് ഗുരുതരമായ ചില ആരോഗ്യ പ്രശ്‌നങ്ങളിലേക്ക് നയിക്കും. അമ്മയ്ക്ക് ഫിറ്റ്‌സ് (Eclampsia) വരാം, അമ്മയുടെ കരളും വൃക്കകളും തകരാറിലാകാം, തലച്ചോറിൽ രക്തസ്രാവം വന്ന് മരണത്തിനു തന്നെ കാരണമാകാം. ഇങ്ങനെയുള്ള സന്ദർഭങ്ങളിൽ സിസേറിയൻ പ്രസവം ഒരു സമയോചിതമായ ഒരു ഇടപെടൽ മാത്രമാണ്.

അമ്മയ്ക്ക് ഗർഭത്തിൽ പ്രമേഹം ഉണ്ടെങ്കിൽ അത് കുഞ്ഞിനെ ആയിരിക്കും കൂടുതൽ ബാധിക്കുക. കാരണങ്ങളൊന്നും കൂടാതെ തന്നെ കുഞ്ഞിന്റെ അനക്കം പെട്ടെന്ന് നിന്നു പോകാം. ഇങ്ങനെയുള്ള ഗർഭിണികളെ പ്രസവ തീയതിയ്ക്ക് രണ്ടോ മൂന്നോ ആഴ്ച മുമ്പ് തന്നെ പ്രസവിപ്പിക്കേണ്ടതായിട്ടുണ്ട്. സാധാരണ ഒരു ഗർഭിണിക്ക് കൊടുക്കുന്ന അത്ര സമയം സുഖപ്രസവത്തിനായി കാത്തിരുന്നാൽ പലപ്പോഴും അത് കുഞ്ഞിന്റെ ജീവന് തന്നെ അപകടമായി ഭവിക്കും. മാത്രവുമല്ല ഈ കുഞ്ഞുങ്ങൾക്ക് സാധാരണയിലും കൂടുതൽ ഭാരവും ഉണ്ടാകും. അതുകൊണ്ടുതന്നെ പലപ്പോഴും സാധാരണ പ്രസവം സാധ്യമാകാതെ വരാം.

ഉയർന്ന രക്തസമ്മർദം, പ്രമേഹം എന്നീ അവസ്ഥകൾക്ക് ഒരു കാരണം സ്ത്രീകളുടെ ജീവിതരീതി തന്നെയാണ്. ജീവിതശൈലീ രോഗങ്ങളുടെ ഭാഗമായി ഗർഭകാലത്ത് വരാവുന്ന അവസ്ഥാവിശേഷങ്ങളാണ് ഇവ. ഇതുവഴിയുണ്ടാകുന്ന സിസേറിയൻ കുറയ്ക്കണമെങ്കിൽ സ്ത്രീകൾ അവരുടെ ജീവിതരീതിയിൽ തന്നെ വ്യത്യാസം വരുത്തണം. ഗർഭിണികളുടെ കുടുംബാംഗങ്ങൾക്കും സമൂഹത്തിനും ജീവിതശൈലി രോഗങ്ങളെക്കുറിച്ച് പൂർണ്ണമായ അവബോധം ഉണ്ടാകണം. ഫാസ്റ്റ് ഫുഡ് സംസ്‌കാരവും ദുർമേദസ്സും ജീവിതത്തിന്റെ ഭാഗമായിരിക്കുന്നിടത്തോളം കാലം സിസേറിയൻ നിരക്ക് കൂടിത്തന്നെയിരിക്കും.

ഇടുപ്പെല്ലിന്റെ വ്യാപ്തിയും ഗർഭസ്ഥശിശുവിന്റെ ഭാരവും ഒരു സുഖപ്രസവം നടക്കുന്നതിൽ പ്രധാനപങ്ക് വഹിക്കുന്നു. ഒരു സാധാരണ പ്രസവം നടക്കുന്നതിന് ഇടുപ്പെല്ലിന്റെ അളവും അതിന് ചുറ്റുമുള്ള പേശികളുടെ അയവും ഒരു അവിഭാജ്യ ഘടകമാണ്. കൗമാരപ്രായം തുടങ്ങി തുടർച്ചയായി ചെയ്യുന്ന ശാരീരിക വ്യായാമം ഇതിന് അത്യന്താപേക്ഷിതമാണ്. ടിവി, മൊബൈൽ എന്നിവയ്ക്ക് മുന്നിൽ തങ്ങളുടെ ഒഴിവുസമയം കഴിച്ചു കൂട്ടാൻ ആഗ്രഹിക്കുകയും താല്പര്യപ്പെടുകയും ചെയ്യുന്നവരാണ് ഇന്നത്തെ കുമാരിമാരും സ്ത്രീകളും. വ്യായാമം ജീവിതത്തിന്റെ ഭാഗമല്ലെങ്കിൽ അത് പേശികളേയും ഇടുപ്പെല്ലിനെയുമൊക്കെ ബാധിക്കും. ഇടുപ്പെല്ലിന്റെ വ്യാപ്തവും അയവുമൊക്കെ ഒരു സുഖപ്രസവത്തിന് അത്യന്താപേക്ഷിതമാണ്. വ്യായാമകുറവിന്റെ ഒപ്പം ഫാസ്റ്റ് ഫുഡിന്റെയും അധിക കലോറിയുള്ള ഭക്ഷണത്തിന്റെയും അതിപ്രസരം കൂടിയാകുമ്പോൾ അമ്മയ്ക്കും കുഞ്ഞിനും ഭാരം കൂടാം. ഇതും ഒരു സിസേറിയന് കാരണമാണ്.

സിസേറിയൻ കൂടുന്നതിനുള്ള മറ്റൊരു കാരണം അത്യാധുനിക വന്ധ്യതാ ചികിത്സയിലൂടെയുള്ള ഗർഭങ്ങളാണ്. ഐവിഎഫ്, ഇക്‌സി മുതലായ ചികിത്സാ സമ്പ്രദായങ്ങളിലൂടെയുണ്ടാകുന്ന ഗർഭത്തിൽ പലപ്പോഴും ഇരട്ടക്കുട്ടികളോ അതിലും കൂടുതൽ കുഞ്ഞുങ്ങളോ കാണാനുള്ള സാധ്യതയുണ്ട്. Multiple Pregnancy വിഭാഗത്തിൽപ്പെടും ഇവ (Twins, Triplets, Quadruplets). അതുകൊണ്ട് തന്നെ ഗർഭത്തിലെ അപകടസാധ്യത വർധിക്കുന്നു. വന്ധ്യത ചികിത്സയിലൂടെ ഗർഭം ധരിക്കുന്ന സ്ത്രീകൾക്കും അവരുടെ വീട്ടുകാർക്കും ഡോക്ടർക്കും പൊതുവേ ആ ഗർഭാവസ്ഥയെ പറ്റിയുള്ള കരുതലും ആശങ്കയും കൂടുതലാണ്. രണ്ടു കുഞ്ഞുങ്ങളെ കിട്ടുന്നതിന്റെ സന്തോഷം ഇരട്ടിയാക്കുന്നതിനോടൊപ്പം തന്നെ ആശങ്കകളും ഇരട്ടിയാക്കുന്നു. അതുകൊണ്ടുതന്നെ സിസേറിയനിലൂടെ കുഞ്ഞുങ്ങളുടെ ആരോഗ്യവും സുരക്ഷയും ഉറപ്പാക്കാനുള്ള വ്യഗ്രത ഡോക്ടർക്കും രോഗിക്കും ഒരുപോലെ തന്നെ ഉണ്ടാവും. ഗർഭാവസ്ഥയിലെ പ്രമേഹം, വളർച്ച, രക്തസ്രാവം എന്നിവ ഇക്കൂട്ടർക്ക് കൂടുതലാണ്. അതിനോടൊപ്പം തന്നെ കുഞ്ഞുങ്ങളുടെ ഭാരവും വളർച്ചയും കുറവായും കാണുന്നു. ചില പ്രത്യേക വിഭാഗം ഇരട്ടകളിൽ ഒരു കുഞ്ഞിന്റെ ശരീരത്തിൽ നിന്ന് രണ്ടാമത്തെ കുഞ്ഞിന്റെ ശരീരത്തിലേക്ക് രക്തം പ്രവഹിക്കുന്നതായും കാണാം. ഈ ഗർഭിണികളിൽ മാസം തികയുന്നതിന് മുമ്പേയുള്ള പ്രസവ വേദനയും പ്രശ്‌നമാകാറുണ്ട്. ഇത്തരുണത്തിൽ ആരോഗ്യമുള്ള കുഞ്ഞിനു വേണ്ടി സിസ്സേറിയൻ ചെയ്യേണ്ടി വരാറുണ്ട്.

ആരോഗ്യ സംബന്ധമായ വാര്‍ത്തകളും ആര്‍ട്ടിക്കിളുകളും വായിക്കാന്‍ വാട്‌സാപ്പ് ഗ്രൂപ്പിൽ ജോയിൻ ചെയ്യൂ

1980കളിലില്ലാത്ത വിധം വന്ധ്യതാചികിത്സ വേണ്ടി വരുന്നതിന്റെ ഒരു കാരണം ജീവിതശൈലി പ്രശ്‌നങ്ങൾ തന്നെയാണ്. അമിതവണ്ണവും പോളിസിസ്റ്റിക് ഓവറിയും അണ്ഡോല്പാദന പ്രശ്‌നങ്ങളുമൊക്കെ സങ്കീർണമായി കെട്ടു പിണഞ്ഞ് കിടക്കുന്നു. ഒരു അണുകുടുംബത്തിൽ പലപ്പോഴും അച്ഛനമ്മമാരുടെ ഒരേ ഒരു സന്തതിയായി വളർന്നു വരുന്ന കുട്ടിക്ക് ഒരു കൂട്ടുകുടുംബത്തിൽ മറ്റു കുടുംബാംഗങ്ങളോടൊത്ത് വളരുന്ന കുട്ടികളുടെ മനസ്സാന്നിധ്യവും പാകതയും കാണാറില്ല. പ്രസവമുറി എന്ന് കേൾക്കുമ്പോൾ തന്നെ ഭയചകിതരാകുന്ന പെൺകുട്ടികളെയാണ് ഞങ്ങൾ കണ്ടുവരുന്നത്. ഇതേ ഭയം അവരുടെ അമ്മമാരെയും കുടുംബാംഗങ്ങളെയും ബാധിക്കുന്നു. പ്രസവം എല്ലാവർക്കും ഒരുപോലെ ആകണമെന്നില്ല എന്നതും ചിലപ്പോൾ ചെറിയ വേദന ദിവസങ്ങളോളം കണ്ടതിനുശേഷമായിരിക്കും യഥാർഥ പ്രസവവേദന ആരംഭിക്കുക എന്നതും ഗർഭിണികൾ മനസ്സിലാക്കണം. ഡോക്ടർമാർ വിചാരിച്ചാൽ പ്രസവത്തിന്റെ ദൈർഘ്യം കുറയ്ക്കാൻ സാധിച്ചെന്ന് വരില്ല. ക്ഷമയോടെ കാത്തിരിക്കുക എന്നതാണ് നല്ല ഒരു തീരുമാനം. പ്രസവമുറിയിൽ ഗർഭിണിയും ബന്ധുക്കളും കാണിക്കുന്ന ആശങ്ക ഒരു പരിധിവരെ സാംക്രമികമാണ്. അത് പതുക്കെ ഡോക്ടർമാരിലേക്കും പകരും. പരിണിത ഫലം ഒരു സിസേറിയൻ ആയിരിക്കും.

ആദ്യത്തെ പ്രസവം സിസേറിയൻ വഴി ആയിരുന്നെങ്കിൽ പിന്നീടുള്ള പ്രസവങ്ങളും സിസേറിയൻ തന്നെ ആയിരിക്കും. സിസേറിയൻ ചെയ്യുന്നത് ഗർഭപാത്രം കീറിയിട്ടാണല്ലോ. അവിടെ തുന്നലിട്ട് അതുണങ്ങുമ്പോൾ പൂർവസ്ഥിതി പ്രാപിക്കുമെങ്കിലും അടുത്ത ഗർഭത്തിൽ പ്രസവവേദന തുടങ്ങുമ്പോൾ അവിടം വിട്ടുപോകാനുള്ള സാധ്യതയുണ്ട്. അങ്ങനെ വന്നാൽ രക്തസ്രാവം ഉണ്ടാവുകയും അമ്മയുടെയും കുഞ്ഞിന്റെയും ജീവന് അപകടത്തിലാവുകയും ചെയ്യുന്നു. അതുകൊണ്ടാണ് വീണ്ടും ഒരു സിസേറിയൻ തന്നെയാണ് സുരക്ഷിതം എന്ന് ഡോക്ടർമാർ തീരുമാനിച്ചു പോകുന്നത്.

മാസം തികയാതെയുള്ള പ്രസവങ്ങളും സിസേറിയൻ നിരക്ക് കൂടുന്നതിന് ഒരു കാരണമാണ്. ഗർഭം പൂർണവളർച്ചയെത്തുന്നതിനു മുമ്പ് വെള്ളം പൊട്ടി പോകുമ്പോൾ അണുബാധയിൽ നിന്ന് കുഞ്ഞിനെയും അമ്മയെയും രക്ഷിക്കാനും ആ നേരത്തേയുള്ള സിസേറിയനുകൾ ആവശ്യമായി വരുന്നു.

പ്രസവം മുന്നോട്ടു പോകുന്നതിനിടയിൽ കുഞ്ഞിന്റെ ഹൃദയത്തുടിപ്പിന് മാറ്റം വരിക (Fetal distress) ഇടുപെല്ലിന് വ്യാപ്തം മതിയാകാതെ വരിക (Contracted pelvis), മറുപിള്ള ഗർഭപാത്രത്തിന് താഴെ വന്ന് ഗർഭപാത്രത്തിന്റെ മുഖം അടഞ്ഞുപോവുക (Placenta Praevia) തുടങ്ങിയ കാരണങ്ങളും സിസേറിയന് സിസേറിയനിൽ അവസാനിക്കുന്നു.

ലാഭേച്ഛയോടു കൂടി ചെയ്യുന്ന സിസേറിയനുകൾ അപലനീയമാണ്. ഒരു കാര്യം തറപ്പിച്ചു പറയാം സാമ്പത്തിക ലാഭത്തിനുവേണ്ടി സിസേറിയൻ ചെയ്യുന്ന ഗൈനക്കോളജിസ്റ്റുകൾ വിരളമാണ്. സമയം താമസിക്കുന്തോറും അമ്മയുടെയും കുഞ്ഞിന്റെയും ആരോഗ്യസ്ഥിതി വഷളാകുമോ എന്ന ഭയമാണ് പലപ്പോഴും ഒരു സിസേറിയൻ എന്ന ചിന്തയിലേക്ക് നയിക്കുന്നത്. പല ആശുപത്രികളിലും മാതൃകാപരമായ സാഹചര്യങ്ങളല്ല നിലവിലുള്ളത്. 24 മണിക്കൂറും അനസ്‌തേഷ്യ ഡോക്ടറുടെയും ശിശുരോഗ വിദഗ്ദ്ധന്റെയും സേവനം, ബ്ലഡ് ബാങ്ക് സൗകര്യങ്ങൾ, എന്തെങ്കിലും പ്രശ്‌നമുണ്ടായാൽ ഒരു സൗകര്യം സഹായം ഇവയൊന്നും ഇല്ലാത്ത എത്രയോ ആശുപത്രികളിൽ പ്രസവങ്ങൾ നടക്കുന്നു. അവിടെ ജോലി ചെയ്യുന്ന ഗൈനക്കോളജിസ്റ്റുകൾക്ക് മാതൃകാപരമായ രീതിയിൽ സിസേറിയന്റെ എണ്ണം കുറയ്ക്കാൻ കഴിയുന്നില്ല എന്നത് സ്വാഭാവികം മാത്രം.

പ്രസവങ്ങളോടും ഡോക്ടർമാരോടുമുള്ള കാഴ്ചപ്പാടും സമൂഹം മാറ്റണം, വിരളമാണെങ്കിൽ പോലും വളരെ അപ്രതീക്ഷിതമായ പല അത്യാഹിതങ്ങളും ഗർഭത്തെ ചുറ്റിപ്പറ്റിയുണ്ടാകാം. എന്ത് സംഭവിച്ചാലും അത് ഡോക്ടറുടെ കുറ്റം കൊണ്ടാണ് എന്ന സമൂഹത്തിന്റെ കാഴ്ചപ്പാട് മാറണം. എല്ലാ പ്രസവങ്ങളും സുഖപര്യവസായിക്കൊള്ളണമെന്നില്ല. പ്രസവമെന്ന പ്രക്രിയ ചിലപ്പോഴൊക്കെ സങ്കീർണ്ണമായിപ്പോകുന്നു. അത് ചികിത്സകരുടെയോ ആശുപത്രിയുടെയോ അനാസ്ഥ കൊണ്ടായിരിക്കില്ല. ഈ യാഥാർഥ്യം മനസ്സിലാക്കാനുള്ള പക്വത ബന്ധുക്കൾക്കുണ്ടാകണം.

ഡോക്ടർമാർ മാത്രം മനസ്സുവെച്ചതു കൊണ്ട് വർധിച്ചുവരുന്ന സിസേറിയന്റെ തോത് കുറയ്ക്കാൻ സാധിക്കില്ല. അത് സാധ്യമാകാൻ ഗർഭിണികളും ഗർഭം ധരിക്കാൻ ആഗ്രഹിക്കുന്ന സ്ത്രീകളും അവരുടെ കുടുംബാംഗങ്ങളും അടങ്ങുന്ന സമൂഹവും പ്രവർത്തിക്കണം. നമ്മുടെ ജീവിതരീതി തന്നെ പാടെ മാറ്റണം. ഫാസ്റ്റ് ഫുഡ് സംസ്‌കാരവും ദുർമേദസ്സും നമ്മുടെ ശത്രുക്കളാണ്. പ്രസവം എന്ന പ്രക്രിയ വളരെ സങ്കീർണ്ണമാണ്. അപ്രതീക്ഷിതമായി എന്ത് സങ്കീർണ്ണതകളും സംഭവിക്കാം. അതിനെ നേരിടാനുള്ള തയ്യാറെടുപ്പും സന്നാഹങ്ങളും ഓരോ ആശുപത്രിയിലും ഉണ്ടാവണം. ഇവിടെ സമയമാണ് ജീവൻ നിലനിർത്തുന്നത്.

തീർച്ചയായും ഡോക്ടർമാരുടെ ഭാഗത്തു നിന്നും ഒരു വലിയ നീക്കം ഇതിനുവേണ്ടി നടക്കുന്നുണ്ട്. അതിനുള്ള പരിശ്രമങ്ങൾ ഗൈനക്കോളജി സംഘടന നിരന്തരം തുടരുന്നുണ്ട്. അമ്മയ്ക്കും കുഞ്ഞിനും നല്ലത് സുഖപ്രസവം തന്നെയാണ്, ഓരോ ഗൈനക്കോളജിസ്റ്റും ആഗ്രഹിക്കുന്നതും അത് തന്നെയാണ്.

പട്ടം എസ്.യു.ടി. ഹോസ്പിറ്റലിൽ കൺസൾട്ടന്റ് ​ഗൈനക്കോളജിസ്റ്റ് ആണ് ലേഖിക

Key Points:

• C-section rates are rising, prompting discussions about its necessity and potential risks.
• While C-sections can be life-saving in situations like high blood pressure or gestational diabetes, lifestyle factors contribute to these conditions.
• Fast food culture, obesity, and lack of exercise are linked to complications requiring C-sections.
• Multiple pregnancies from IVF and other fertility treatments also increase C-section likelihood.
• Fear and anxiety surrounding childbirth, along with societal expectations, can influence the decision for C-section.
• Doctors emphasize the importance of lifestyle changes, realistic expectations about childbirth, and a supportive environment for mothers-to-be.

Content Highlights: Understanding the rise of C-sections: from lifestyle choices to medical necessities