പരോളിലിറങ്ങിയവർക്ക് പണിയുണ്ട്! തടവുകാരെ ചേർത്തുപിടിച്ച് മലേഷ്യൻ ഫുഡ് കോർട്ട് ഉടമ

കുറ്റവാളികളായി മുദ്രകുത്തപ്പെട്ട് സമൂഹത്തിൽ നിന്ന് ഒറ്റപ്പെട്ടുപോകുന്നവർക്ക് മാന്യമായ തൊഴിലും പുതിയൊരു ജീവിതവും നൽകി മാതൃകയാവുകയാണ് മലേഷ്യയിലെ ഒരു ഫുഡ് കോർട്ട്. മലേഷ്യയിലെ തങ്കാക്കിലുള്ള ഒരു ഫുഡ് കോർട്ടിന്റെ ഉടമയായ ഓങ് ചീ സിയാങ് ആണ് പരോളിലിറങ്ങിയ തടവുകാരെ ജോലിക്കെടുത്ത്  മാറ്റത്തിന് തുടക്കമിട്ടത്.

മലേഷ്യൻ ഗവൺമെന്റിന്റെ പരോൾ പ്രോഗ്രാം (Licensed Release of Prisoners Programme - PBSL) വഴിയാണ് ഈ തടവുകാർക്ക് ശിക്ഷാ കാലാവധി പൂർത്തിയാക്കുന്നതിന് മുമ്പുതന്നെ തൊഴിൽ നൽകുന്നതെന്ന് പ്രദേശിക മാധ്യമങ്ങൾ റിപ്പോർട്ട് ചെയ്യുന്നു.

• തൊഴിൽ സാഹചര്യം: പാനീയങ്ങൾ തയ്യാറാക്കുന്നതും മേശകൾ വൃത്തിയാക്കുന്നതുമടക്കമുള്ള ജോലികളാണ് ഇവർ ചെയ്യുന്നത്. നിലവിൽ ആറ് പരോൾ തടവുകാരാണ് ഇവിടെയുള്ളത്. ആകെ 14 പേർക്ക് ഓങ് ഇതിനകം ജോലി നൽകിക്കഴിഞ്ഞു.

• സമൂഹത്തിന്റെ കാഴ്ചപ്പാട്: തുടക്കത്തിൽ കുറ്റവാളികളെ ജോലിക്കെടുക്കുന്നതിനെതിരെ പ്രദേശവാസികൾക്കിടയിൽ ആശങ്കയുണ്ടായിരുന്നു. എന്നാൽ ജീവനക്കാരുടെ ആത്മാർത്ഥതയും വിനയവും കണ്ടതോടെ ഉപഭോക്താക്കൾ ഇവരെ ഇരുകൈയും നീട്ടി സ്വീകരിച്ചതായി ഓങ് ചീ സിയാങ് പറഞ്ഞു.

• കർശന മേൽനോട്ടം: നല്ല സ്വഭാവമുള്ള കുറഞ്ഞ സുരക്ഷാ ഭീഷണിയുള്ളവരെ മാത്രമാണ് പദ്ധതിയിൽ ഉൾപ്പെടുത്തുന്നത്. ഇവർ താമസസ്ഥലത്ത് തന്നെ കഴിയണമെന്നും മൊബൈൽ വഴി ദിവസവും അധികൃതർക്ക് റിപ്പോർട്ട് നൽകണമെന്നും നിർബന്ധമുണ്ട്.

• പുതിയ സ്വപ്നങ്ങൾ: ജയിലിലെ ഒറ്റപ്പെടലിന് ശേഷം മാന്യമായ ഒരു തൊഴിൽ ലഭിക്കുന്നത് തങ്ങളുടെ ആത്മവിശ്വാസം വർധിപ്പിക്കുന്നുവെന്ന് ജീവനക്കാർ സാക്ഷ്യപ്പെടുത്തുന്നു. കാപ്പി ഉണ്ടാക്കുന്നതടക്കമുള്ള പ്രായോഗിക നൈപുണ്യങ്ങൾ പഠിക്കുന്നത് ഭാവിയിൽ സ്വന്തമായി ജീവിക്കാൻ തങ്ങളെ സഹായിക്കുമെന്നും ഇവർ വിശ്വസിക്കുന്നു.

Content Highlights: A food court owner in Tangkak, Malaysia, is winning hearts by employing parolees under the government’s PBSL program, helping former inmates reintegrate into society through honest work and skill development.