ന്യൂയോർക്കിലെ ടൈംസ് സ്ക്വയറിൽ വിരാട് കോലിയുടെ പ്രതിമ സ്ഥാപിച്ചിട്ടില്ല | Fact Check

സമൂഹമാധ്യമങ്ങളിലെല്ലാം ഐ.സി.സി ടി-20 വേൾഡ് കപ്പ് വിജയാഘോഷം അലയടിക്കുകയാണ്. ഇതിനിടെ ഇന്ത്യൻ ക്രിക്കറ്റ് താരം വിരാട് കോലിയുടെ പ്രതിമ ന്യൂയോർക്കിലെ ടൈംസ് സ്ക്വയറിൽ സ്ഥാപിച്ചുവെന്ന അവകാശവാദത്തോടെ ഒരു വീഡിയോയും ചിത്രവും സോഷ്യൽ മീഡിയയിൽ വ്യാപകമായി പ്രചരിക്കുന്നുണ്ട്. ചില മുഖ്യധാരാ മാധ്യങ്ങൾ ഇത് വാർത്തയാക്കുകയും ചെയ്തു. എന്നാൽ ഈ പ്രചാരണം തീർത്തും തെറ്റാണ് എന്നതാണ് വാസ്തവം. വിശദാംശങ്ങൾ ചുവടെ വായിക്കാം.
നിരവധി പേരാണ് കോലിയുടെ ഒരു സുവർണ്ണപ്രതിമയുടെ ചിത്രവും വീഡിയോയും സമൂഹമാധ്യമങ്ങളിൽ പങ്കുവച്ചത്. ഈ ദൃശ്യങ്ങൾ അടിസ്ഥാനമാക്കി നടത്തിയ പരിശോധനയിൽ ഡ്യൂറോഫ്ലക്സ് എന്ന കിടക്ക കമ്പനിയുടെ സമൂഹ മാധ്യമ അക്കൗണ്ടുകളിലാണ് ഈ വീഡിയോ ആദ്യം പങ്കവച്ചതെന്ന് കണ്ടെത്തി. ഇക്കഴിഞ്ഞ ജൂൺ 23-നായിരുന്നു ഇത്. കാലുകളിൽ ക്രിക്കറ്റ് പാഡ് അണിഞ്ഞ് കയ്യിലെ ബാറ്റ് ഉയർത്തിപ്പിടിച്ച് നിൽക്കുന്ന രൂപത്തിലാണ് പ്രതിമ.