ദക്ഷിണാഫ്രിക്കയില്‍ ഈ വർഷം വേട്ടയാടി കൊന്നത് 103 കാണ്ടാമൃഗങ്ങളെ; ഏറിയ പങ്കും ദേശീയോദ്യാനങ്ങളിലുള്ളവ
കേപ് ടൗണ്‍: ദക്ഷിണാഫ്രിക്കയില്‍ ഈവർഷം വേട്ടയാടി കൊന്നത് നൂറിലധികം കാണ്ടാമൃഗങ്ങളെ. ജനുവരി ഒന്ന് മുതല്‍ മാര്‍ച്ച് 31 വരെയുള്ള കണക്കാണിത്. ദക്ഷിണാഫ്രിക്കയിലെ പരിസ്ഥിതി വകുപ്പ് മന്ത്രിയായ ഡിയോണ്‍ ജോര്‍ജ്ജാണ് ഇതുസംബന്ധിച്ച് കണക്കുകള്‍ പുറത്തുവിട്ടത്.
കണക്കുകള്‍ പ്രകാരം 2025-ന്റെ ആദ്യത്തെ മൂന്ന് മാസത്തിനുള്ളില്‍ 103 കാണ്ടാമൃഗങ്ങളെ വേട്ടക്കാര്‍ കൊന്നൊടുക്കി. ഇതില്‍ കൂടുതലും നടന്നത് ദേശീയോദ്യാനങ്ങളിലാണ്. 65 കാണ്ടാമൃഗങ്ങള്‍ ദേശീയോദ്യാനങ്ങളില്‍ വേട്ടയാടി കൊല്ലപ്പെട്ടു. രാജ്യത്തിന്റെ വന്യജീവി സമ്പത്തിനാകെ ഭീഷണിയാണ് ഈ വേട്ടയാടലുകളെന്നും ദക്ഷിണാഫ്രിക്കന്‍ പരിസ്ഥിതി മന്ത്രി പ്രതികരിച്ചു.
ലോകത്തില്‍വെച്ച് ഏറ്റവുമധികം കാണ്ടാമൃഗങ്ങളുള്ള രാജ്യങ്ങളിലൊന്ന് കൂടിയാണ് ദക്ഷിണാഫ്രിക്ക. 16,000-നും 18,000-നുമിടയില്‍ കാണ്ടാമൃഗങ്ങളാണ് രാജ്യത്തുള്ളത്.
കാണ്ടാമൃഗങ്ങളുടെ ഉപജാതികളായ ബ്ലാക്ക് റൈനോയെയും വൈറ്റ് റൈനോയെയും ദക്ഷിണാഫ്രിക്കയില്‍ കാണാനാകും. ഇതില്‍ത്തന്നെ ബ്ലാക്ക് റൈനോകള്‍ ഗുരുതര വംശനാശഭീഷണി നേരിടുന്ന കാണ്ടാമൃഗ വിഭാഗമാണ്. 6,400 ബ്ലാക്ക് റൈനോകള്‍ മാത്രമാണ് ലോകത്താകെ ശേഷിക്കുന്നത്. ഇതില്‍തന്നെ 2,000 ബ്ലാക്ക് റൈനോകളുള്ളത് ദക്ഷിണാഫ്രിക്കയിലാണ്.
Content Highlights: over 103 rhinos dead due to poaching in south africa