‘ഗ്രേറ്റ് ഇന്ത്യൻ ബസ്റ്റാർഡ് ’ വംശനാശത്തിൽ; അവശേഷിക്കുന്നത് 150 ഓളം പക്ഷികള്‍ മാത്രം
ന്യൂഡൽഹി: രാജ്യത്ത് വംശനാശഭീഷണി നേരിടുന്ന ഗ്രേറ്റ് ഇന്ത്യൻ ബസ്റ്റാർഡ് പക്ഷികളെ സംരക്ഷിക്കാൻ നടപടികളുമായി കേന്ദ്ര പരിസ്ഥിതിമന്ത്രാലയം. ഇന്ത്യയിൽ ബാക്കിയുള്ളത് 150-ഓളം പക്ഷികൾ മാത്രമാണെന്നാണ് ഔദ്യോഗിക കണക്ക്. ഇവയുടെ എണ്ണം വർധിപ്പിക്കാൻ കൃത്രിമപ്രജനനം ഉറപ്പാക്കും. ഈ വർഗത്തിലുള്ള പക്ഷികൾ തുറസ്സായസ്ഥലങ്ങളിൽ കൂടുകൂട്ടി മുട്ടയിടുന്നതിനാൽ മുട്ടകൾ മറ്റു മൃഗങ്ങളിൽനിന്ന് സംരക്ഷിക്കുന്നത് ബുദ്ധിമുട്ടാണ്. അതിനാൽ കൃത്രിമപ്രജനനം നടത്തുകയാണ് ശാസ്ത്രീയരീതിയെന്ന് വിദഗ്ധർ വിലയിരുത്തുന്നു.
പക്ഷികളെ സംരക്ഷിക്കാനുള്ള പദ്ധതി ചർച്ചചെയ്യാൻ യോഗം ചേർന്നു. യു.എ.ഇ.യിൽ ബസ്റ്റാർഡുകളെ സംരക്ഷിക്കാൻ പദ്ധതി നേരത്തേ നടപ്പാക്കിയിരുന്നു. ഇന്ത്യയിലും ഇതു പ്രാവർത്തികമാക്കാൻ സാങ്കേതികപിന്തുണയ്ക്ക് യു.എ.ഇ.യുമായി ധാരണാപത്രം ഒപ്പുവെച്ചു. രാജസ്ഥാൻ, ഗുജറാത്ത്, മഹാരാഷ്ട്ര, ആന്ധ്രാപ്രദേശ്, തെലങ്കാന, കർണാടക എന്നിവിടങ്ങളിലാണ് ഗ്രേറ്റ് ഇന്ത്യൻ ബസ്റ്റാർഡുകളുള്ളത്. രാജസ്ഥാന്റെ സംസ്ഥാനപക്ഷിയാണ്. പുൽമേടുകൾ വ്യാപകമായി നശിപ്പിക്കപ്പെട്ടതാണ് ഇവയുടെ വംശനാശത്തിന് പ്രധാനകാരണം.
തെരുവുനായ്‌ക്കളുടെ ആക്രമണവും കാരണമായി. വൈദ്യുതലൈനുകൾ അപകടങ്ങളുണ്ടാക്കുന്നതിനെത്തുടർന്ന്, ഗുജറാത്തിലെയും രാജസ്ഥാനിലെയും ബസ്റ്റാർഡുകളെ സംരക്ഷിക്കാൻ ഭൂഗർഭ വൈദ്യുതലൈനുകൾ സ്ഥാപിക്കണമെന്ന് 2021-ൽ സുപ്രീംകോടതി ഉത്തരവിട്ടിരുന്നു.
Content Highlights: great Indian bustard considered to be at the edge of extinction