പ്ലസ് വൺ, പ്ലസ് ടു വിദ്യാർഥിയാണോ? ടാറ്റാ കാപിറ്റൽ പങ്ഖ് സ്കോളർഷിപ്പിന് അപേക്ഷിക്കാം

2025-26 അധ്യയന വർഷത്തേക്കുള്ള ടാറ്റാ കാപിറ്റൽ പങ്ഖ് സ്കോളർഷിപ്പ് പ്രോഗ്രാമിന്  അപേക്ഷ ക്ഷണിച്ചു. അപേക്ഷ സമർപ്പിക്കാനുള്ള അവസാന തീയതി 2025 ഡിസംബർ 26 ആണ്. അക്കാദമിക മികവും സാമ്പത്തിക പശ്ചാത്തലവും അടിസ്ഥാനമാക്കിയായിരിക്കും തിരഞ്ഞെടുപ്പ്.

യോഗ്യത മാനദണ്ഡങ്ങൾ

• അപേക്ഷകർ ഇന്ത്യൻ പൗരന്മാർ ആയിരിക്കണം.
• ഇന്ത്യയിലെ അംഗീകൃത വിദ്യാഭ്യാസ സ്ഥാപനങ്ങളിൽ നിലവിൽ 11-ാം ക്ലാസിലോ 12-ാം ക്ലാസിലോ പഠിക്കുന്ന വിദ്യാർത്ഥികൾക്ക് അപേക്ഷിക്കാം.
• മുൻ അധ്യയന വർഷത്തിൽ കുറഞ്ഞത് 60% മാർക്ക് നേടിയിരിക്കണം.
• എല്ലാ സ്രോതസ്സുകളിൽ നിന്നുമുള്ള വാർഷിക കുടുംബ വരുമാനം 2.5 ലക്ഷം രൂപയോ അതിൽ കുറവോ ആയിരിക്കണം.
• ടാറ്റാ കാപിറ്റലിലെയും ബഡ്ഡി 4 സ്റ്റഡിയിലെയും (Buddy4Study) ജീവനക്കാരുടെ മക്കൾക്കും അപേക്ഷിക്കാൻ അർഹതയില്ല.

സ്കോളർഷിപ്പ് ആനുകൂല്യങ്ങൾ

വിദ്യാർത്ഥികൾ നേടിയ മാർക്കിന്റെ അടിസ്ഥാനത്തിൽ ആനുകൂല്യങ്ങൾ മൂന്ന് തട്ടുകളായി തിരിച്ചിരിക്കുന്നു:

• 60% നും 80% നും ഇടയിൽ മാർക്ക് നേടിയ വിദ്യാർത്ഥികൾക്ക്: ട്യൂഷൻ/കോഴ്‌സ് ഫീസിന്റെ 80% വരെ അല്ലെങ്കിൽ 10,000 രൂപ (ഇതിൽ കുറഞ്ഞ തുക ലഭിക്കും).
• 81% നും 90% നും ഇടയിൽ മാർക്ക് നേടിയ വിദ്യാർത്ഥികൾക്ക്: ട്യൂഷൻ/കോഴ്‌സ് ഫീസിന്റെ 80% വരെ അല്ലെങ്കിൽ 12,000 രൂപ (ഇതിൽ കുറഞ്ഞ തുക ലഭിക്കും).
• 91% അതിൽ കൂടുതലോ മാർക്ക് നേടിയ വിദ്യാർത്ഥികൾക്ക്: ട്യൂഷൻ/കോഴ്‌സ് ഫീസിന്റെ 80% വരെ അല്ലെങ്കിൽ 15,000 രൂപ (ഇതിൽ കുറഞ്ഞ തുക ലഭിക്കും).

സമർപ്പിക്കേണ്ട രേഖകൾ

• ഫോട്ടോ ഐഡന്റിറ്റി പ്രൂഫ്.
• അപേക്ഷകന്റെ പാസ്‌പോർട്ട് സൈസ് ഫോട്ടോഗ്രാഫ്.
• വരുമാന രേഖ (Form 16A/സർക്കാർ അധികാരി നൽകിയ വരുമാന സർട്ടിഫിക്കറ്റ്/സാലറി സ്ലിപ്പുകൾ, മുതലായവ).
• പ്രവേശനത്തിന്റെ തെളിവ് (സ്കൂൾ/കോളേജ് ഐഡി കാർഡ്/ബോണഫൈഡ് സർട്ടിഫിക്കറ്റ് എന്നിവ).
• നിലവിലെ അധ്യയന വർഷത്തെ ഫീസ് രസീത്.
• സ്കോളർഷിപ്പ് അപേക്ഷകന്റെ ബാങ്ക് അക്കൗണ്ട് വിശദാംശങ്ങൾ (ക്യാൻസൽ ചെയ്ത ചെക്ക്/പാസ്ബുക്കിന്റെ പകർപ്പ്).
• മുൻ ക്ലാസിലെ മാർക്ക് ഷീറ്റുകൾ അല്ലെങ്കിൽ ഗ്രേഡ് കാർഡുകൾ.
• അംഗവൈകല്യം, ജാതി സർട്ടിഫിക്കറ്റുകൾ (ബാധകമെങ്കിൽ).

കൂടുതൽ വിവരങ്ങൾക്ക് https://www.buddy4study.com/page/the-tata-capital-pankh-scholarship-programme സന്ദർശിക്കാം.

Content Highlights: Tata Capital Pankh Scholarship 2025-26 is open for Class 11 & 12 students.