പ്രഥമാധ്യാപക നിയമനം: 'അയോഗ്യര്‍' യോഗ്യരായി
തിരുവനന്തപുരം: പ്രൈമറി സ്കൂൾ പ്രഥമാധ്യാപക നിയമനത്തിനുള്ള യോഗ്യതയിൽ സർക്കാർ വിദ്യാഭ്യാസ ചട്ടത്തിൽ മാറ്റം വരുത്തി. വകുപ്പുതല പരീക്ഷ പാസാകാത്തവരെ പ്രഥമാധ്യാപകരാക്കരുതെന്നായിരുന്നു വ്യവസ്ഥ. ഇത് പാലിക്കണമെന്ന് ഹൈക്കോടതിയും നിർദേശിച്ചിട്ടുണ്ട്.
ചട്ടത്തിൽ ഇളവുനൽകി നിയമിച്ചവരെ തരംതാഴ്ത്തണമെന്നും കോടതിവിധിയുണ്ട്. ഇതിനെതിരേയുള്ള അപ്പീൽ സുപ്രീംകോടതി പരിഗണിക്കാനിരിക്കെയാണ് ഈ വ്യവസ്ഥ ചട്ടത്തിൽനിന്ന് മാറ്റി ഭേദഗതി വരുത്തിയിരിക്കുന്നത്.
പ്രൈമറി സ്കൂളിൽ 1000-ത്തിലേറെ പ്രഥമാധ്യാപക തസ്തികകളാണ് ഒഴിഞ്ഞുകിടക്കുന്നത്. അയോഗ്യത തർക്കമായി കോടതി കയറിയതാണ് നിയമനം മുടങ്ങാൻ കാരണം. വകുപ്പുതല പരീക്ഷ പാസായവരെ മാത്രമേ പ്രഥമാധ്യാപകരായി നിയമിക്കാൻ പാടുള്ളൂവെന്ന വ്യവസ്ഥ 2014-ലാണ് നിലവിൽവന്നത്.
50 വയസ്സുകഴിഞ്ഞവർക്ക് ഈ വ്യവസ്ഥ ഇളവുനൽകി. അതനുസരിച്ച് നിയമനവും നടത്തി. എന്നാൽ, ഇതിനെതിരേ 'യോഗ്യത' നേടിയ അധ്യാപകർ കോടതിയെ സമീപിച്ചു. അയോഗ്യരായവർക്ക് നിയമനം നൽകരുതെന്നും ഇളവ് നൽകി നിയമിച്ചവരെ തരംതാഴ്തണമെന്നും 2020 ജനുവരി 27-ന് ഹൈക്കോടതി വിധിച്ചു.
നിയമനം ലഭിച്ചവർ ഇതിനെതിരേ സുപ്രീംകോടതിയെ സമീപിച്ചു. തൽസ്ഥിതി തുടരാനായിരുന്നു സുപ്രീംകോടതി നിർദേശം. ജനുവരി 14-ന് കേസ് സുപ്രീംകോടതി പരിഗണിക്കാനിരിക്കെയാണ് സർക്കാർ അയോഗ്യരെ യോഗ്യരാക്കി നിയമനം നൽകാനൊരുങ്ങുന്നത്.
Content Highlights: Government amended the eligibility criteria for selection of Headmasters
Content Highlights: