ഹണിമൂണിനിടെ ഭർത്താവിന്റെ കൊലപാതകം; നിരപരാധിയെന്ന് സോനം, ജാമ്യത്തിൽ തുടരാമെന്ന് സുപ്രീംകോടതി

ന്യൂഡൽഹി: മേഘാലയയിൽ ഹണിമൂൺ യാത്രയ്ക്കിടെ ഭർത്താവിനെ കൊലപ്പെടുത്തിയ കേസിൽ മുഖ്യപ്രതിയായ സോനം രഘുവംശിയുടെ ജാമ്യം സുപ്രീം കോടതി ശരിവെച്ചു. സോനത്തിന് ജാമ്യം അനുവദിച്ച മേഘാലയ ഹൈക്കോടതി ഉത്തരവ് റദ്ദാക്കണമെന്ന സംസ്ഥാന സർക്കാരിന്റെ അപേക്ഷ കോടതി തള്ളി. ഈ ഘട്ടത്തിൽ വിധിയിൽ ഇടപെടാൻ താല്പര്യമില്ലെന്ന് കോടതി വ്യക്തമാക്കി. എങ്കിലും, ഹൈക്കോടതി ജാമ്യം അനുവദിക്കാനായി നിരത്തിയ കാരണങ്ങളോട് സുപ്രീം കോടതി വിയോജിപ്പ് പ്രകടിപ്പിച്ചു.

2025 മെയ് മാസത്തിലാണ് ഇൻഡോറിൽ നിന്നുള്ള വ്യവസായിയായ രാജ രഘുവംശി മേഘാലയയിലെ വിനോദയാത്രയ്ക്കിടെ കൊല്ലപ്പെടുന്നത്. നോംഗ്രിയാറ്റിലെ ഒരു ഹോംസ്റ്റേയിൽ നിന്ന് പുറപ്പെട്ട ദമ്പതികളെ കാണാതാവുകയും പിന്നീട് സോഹ്‌റയിലെ വെയ്‌സഡോങ് വെള്ളച്ചാട്ടത്തിന് സമീപമുള്ള കൊക്കയിൽ നിന്ന് രാജയുടെ മൃതദേഹം കണ്ടെത്തുകയുമായിരുന്നു. സോനം തന്റെ കാമുകനായ രാജ് കുശ്വാഹയുമായി ചേർന്ന് നടത്തിയ ആസൂത്രിത കൊലപാതകമാണിതെന്നാണ് മേഘാലയ പോലീസ് ആരോപിക്കുന്നത്. ഈ ഗൂഢാലോചനയുമായി ബന്ധപ്പെട്ട് 700-ലധികം പേജുകളുള്ള കുറ്റപത്രമാണ് നിലവിൽ കോടതിയിൽ സമർപ്പിച്ചിരിക്കുന്നത്.

അറസ്റ്റ് രേഖകളിൽ സംഭവിച്ച ഒരു ചെറിയ സാങ്കേതിക പിഴവാണ് സോനത്തിന് ജാമ്യം ലഭിക്കാൻ അനുകൂലമായത്. കൊലപാതക കുറ്റമായ വകുപ്പ് 103-ന് പകരം സെക്ഷൻ 403 എന്നാണ് അറസ്റ്റ് മെമ്മോയിൽ തെറ്റായി രേഖപ്പെടുത്തിയിരുന്നതെന്ന് മേഘാലയ സർക്കാരിന് വേണ്ടി ഹാജരായ സോളിസിറ്റർ ജനറൽ തുഷാർ മേത്ത കോടതിയെ അറിയിച്ചു. ഇതൊരു ടൈപ്പിങ് പിഴവ് മാത്രമാണെന്നും സോനത്തിന്റെ ജാമ്യം മൂന്ന് തവണ മുൻപ് തള്ളിയിട്ടുള്ളതാണെന്നും അദ്ദേഹം വാദിച്ചു. ഇത്തരമൊരു ക്ലറിക്കൽ പിഴവ് ഒരാൾക്ക് ജാമ്യം അനുവദിക്കാൻ പര്യാപ്തമാണോ എന്ന നിയമപരമായ വശം ഭാവിയിൽ ഒരു വലിയ ബെഞ്ചിന്റെ പരിഗണനയ്ക്ക് വിടാൻ സാധ്യതയുണ്ടെന്നും കോടതി സൂചിപ്പിച്ചു.

താൻ നിരപരാധിയാണെന്നും സാഹചര്യത്തെളിവുകൾ മാത്രമാണ് തനിക്കെതിരെയുള്ളതെന്നും സോനം കോടതിയിൽ സത്യവാങ്മൂലം നൽകി. വിചാരണയിലൂടെ കുറ്റം തെളിയുന്നത് വരെ ഒരാളെ നിരപരാധിയായി കാണണമെന്ന നിയമപരമായ തത്വം കോടതിയും ഈ ഘട്ടത്തിൽ ശരിവെച്ചു. ജാമ്യം ലഭിച്ചത് അറസ്റ്റ് നടപടിക്രമങ്ങളിലെ എന്തെങ്കിലും പിഴവ് കാരണം മാത്രമാണെങ്കിൽ, അത് പരിഹരിച്ച് പ്രതിയെ വീണ്ടും അറസ്റ്റ് ചെയ്യുന്നതിന് നിയമപരമായ തടസ്സമില്ലെന്നും കോടതി നിരീക്ഷിച്ചു.

Content Highlights: Supreme Court refuses to cancel Sonam Raghuvanshi's bail in the Raja Raghuvanshi murder case.