കടയിൽനിന്ന് പണം കവർന്നു, പോലീസ് വിട്ടയച്ചതിന് പിന്നാലെ ബൈക്ക് മോഷണം; പ്രായപൂർത്തിയാകാത്തയാൾ പിടിയിൽ

കോഴിക്കോട്: മിഠായിതെരുവിലെ ചെരുപ്പ് കടയിൽ മോഷണം നടത്തിയ പ്രായപൂർത്തിയാകാത്ത കുട്ടിയെ പിടികൂടി. പ്രായപൂർത്തിയാകാത്തതിനാൽ പോലീസ് വിട്ടയച്ചതിനു പിന്നാലെ നഗരത്തിൽനിന്ന് ബൈക്ക് മോഷ്ടിച്ചതോടെ വീണ്ടും പിടിയിലാകുകയായിരുന്നു.

എസ്എം സ്ട്രീറ്റിലെ സുഹറ ഫുട്‌വെയറിൽ ചൊവ്വാഴ്ച രാവിലെയാണ് ആദ്യ മോഷണം നടന്നത്. സെയിൽസ്മാൻ മുകളിലത്തെ നിലയിലേക്ക് പോയപ്പോൾ കുട്ടി കൗണ്ടർ തുറന്ന് പണം കവരുകയായിരുന്നു. 5500 രൂപയാണ് മോഷ്ടിച്ചത്. 

ഷൂ വാങ്ങാനായാണ് കുട്ടി രാവിലെ 10 മണിയോടെ കടയിലെത്തിയത്. സെയിൽസ്മാൻ ഷൂകൾ എടുത്തുകാണിക്കുകയും തുടർന്ന് മുകളിൽ നിന്ന് മറ്റൊരു ഷൂ എടുക്കാൻ പോകുകയുമായിരുന്നു. ഇതിന് പിന്നാലെയാണ് കുട്ടി കൗണ്ടർ തുറന്ന് പണം എടുക്കുകയും തുടർന്ന് ഷൂ വാങ്ങി പണം നൽകി കുട്ടി കടയിൽനിന്ന് പോകുകയും ചെയ്യുന്നത് സിസിടിവിയിൽ പതിഞ്ഞിരുന്നു.