മൂന്നാംക്ലാസുകാരിക്ക് പീഡനം, കണ്ണിൽ ചോരയില്ലാത്ത ക്രൂരത; പ്രതി 4 മക്കളുടെ പിതാവ്, തെളിവായി തലമുടിയും

കാഞ്ഞങ്ങാട്: കണ്ണില്‍ ചോരയില്ലാത്ത ക്രൂരതയായിരുന്നു നടന്നത്. നാട് നടുങ്ങിയ പ്രഭാതത്തിന്റെ ഓര്‍മ്മ ഒരിക്കല്‍കൂടി തിളച്ചുമറിയുകയായിരുന്നു കോടതിപരിസരത്ത്. ശനിയാഴ്ചതന്നെ ശിക്ഷയുണ്ടാകുമെന്നായിരുന്നു എല്ലാവരും കരുതിയിരുന്നത്. ശിക്ഷാവിധി തിങ്കളാഴ്ചത്തേക്കു മാറ്റിയെങ്കിലും, പ്രതി കുറ്റക്കാരനണെന്ന കോടതി ഉത്തരവ് വന്നതോടെ ആളുകള്‍ പിരിഞ്ഞു. 2024 മേയ് 15-ന് പുലര്‍ച്ചെ കാഞ്ഞങ്ങാട് ഉണര്‍ന്നത് മൂന്നാംക്ലാസുകാരിക്കുനേരേയുണ്ടായ കൊടുംക്രൂരത അറിഞ്ഞാണ്. പ്രതിക്കുവേണ്ടിയുള്ള തിരച്ചിലില്‍ പോലീസിനൊപ്പം നാടൊന്നാകെ ചേര്‍ന്നു. എല്ലാവര്‍ക്കും ഒരു പ്രാര്‍ഥനയേ ഉണ്ടായിരുന്നുള്ളൂ, കുറ്റവാളിയെ എത്രയും പെട്ടെന്ന് അഴിക്കുള്ളിലാക്കുക. ആളുകളുടെ വികാരത്തിനൊത്ത് ഉയര്‍ന്ന പോലീസ് ഒന്‍പത് ദിവസംകൊണ്ട് പ്രതിയെ പിടിച്ചു. കുടക് നാപ്പോക്ക് സ്വദേശിയായ സലീമായിരുന്നു. പ്രതി.

ഹൊസ്ദുര്‍ഗ് പോലീസ് സ്റ്റേഷന്‍ പരിധിയിലെ വീട്ടില്‍ കല്യാണം കഴിച്ച് നാലു മക്കളുള്ളയാളാണ് ക്രൂരത നടത്തിയതെന്ന് ആര്‍ക്കും വിശ്വസിക്കാനായില്ല. സ്ഥിരമായി ഇവിടെ താമസിക്കാറില്ല. ഇടയ്ക്കിടെ കുടകിലേക്കു പോകും. അതിനാല്‍ ഇവിടത്തെ ആളുകള്‍ക്ക് വലിയ പരിചയമൊന്നും സലീമുമായില്ല. വിചാരണക്കോടതിയില്‍ ഇയാളുടെ ഭാര്യയുടെ മൊഴിപോലും പ്രോസിക്യൂഷന് അനുകൂലമായിരുന്നു. തലേന്ന് വീട്ടില്‍ വന്നതും താന്‍ 500 രൂപ കൊടുത്ത് എവിടേക്കെങ്കിലും പൊയ്ക്കൊള്ളാന്‍ പറഞ്ഞതുമെല്ലാം ഭാര്യയുടെ മൊഴിയിലുണ്ടായിരുന്നു.

67 സാക്ഷികളാണ് കേസിലുള്ളത്. രക്തസാംപിള്‍, സംഭവസമയത്ത് പ്രതി ധരിച്ച വസ്ത്രം, ബാഗ്, ടോര്‍ച്ച്, പീഡനം നടന്ന സ്ഥലത്തുനിന്നു കിട്ടിയ തലമുടി, 20, 50 രൂപയുടെ നോട്ടുകള്‍, സിസിടിവി ദൃശ്യങ്ങളുടെ വീഡിയോ ഫയല്‍ തുടങ്ങി 40-ലധികം വസ്തുക്കള്‍, കുട്ടി ഹൊസ്ദുര്‍ഗ് മജിസ്ട്രേറ്റിന് നല്‍കിയ മൊഴി, വില്ലേജ് ഓഫീസറുടെ സൈറ്റ് പ്ലാന്‍ തുടങ്ങി 15-ലധികം രേഖകള്‍ എന്നിവയും 300 പേജുകളുള്ള കുറ്റപത്രത്തോടൊപ്പം ഹാജരാക്കിയിരുന്നു. പ്രതിക്കെതിരേയുള്ള കോടതിവിധി കേള്‍ക്കാനെത്തിയവരുടെ കൂട്ടത്തില്‍ ഇരയായ കുട്ടിയുടെ വീട്ടുകാരും ബന്ധുക്കളും പ്രദേശത്തെ നിരവധിയാളുകളുമെത്തിയിരുന്നു.

വധശിക്ഷ നല്‍കണമെന്ന് പ്രോസിക്യൂഷന്‍
അപൂര്‍വത്തില്‍ അപൂര്‍വമായ കേസാണെന്നും പ്രതി സലീമിന് വധശിക്ഷ നല്‍കണമെന്നും പ്രോസിക്യൂഷനുവേണ്ടി ഹാജരായ അഡ്വ. എ. ഗംഗാധരന്‍ വാദിച്ചത് സുപ്രീംകോടതിയുടെ നാല് വിധികളെ ഉദ്ധരിച്ച്. 1980-ല്‍ ബച്ചന്‍സിങ്ങും പഞ്ചാബ് സര്‍ക്കാരും തമ്മിലുള്ള കേസിലും 1983-ല്‍ മച്ചിസിങ്ങും പഞ്ചാബ് സര്‍ക്കാരുമായുള്ള കേസിലും സുപ്രീംകോടതി പറഞ്ഞത് ഒരാള്‍ നന്നാകുന്നില്ലെങ്കില്‍, ക്രൂരകൃത്യം ആവര്‍ത്തിക്കുന്നുണ്ടെങ്കില്‍ വധശിക്ഷ നല്‍കാമെന്നാണ്. ഇവിടെ സമാനമായ അനുഭവമുണ്ടെന്ന് പ്രതിയുടെ മുന്‍ കേസ് ചൂണ്ടിക്കാണിച്ച് പ്രോസിക്യൂഷന്‍ വാദിച്ചു. ബന്ധുവായ 12 വയസ്സുള്ള കുട്ടിയെ കാട്ടില്‍ കൊണ്ടുപോയി പീഡിപ്പിച്ച കേസുണ്ട് സലീമിന്റെ പേരില്‍. മേല്‍പ്പറമ്പ് പോലീസ് സ്റ്റേഷനിലുള്ള ഈ കേസിന്റെ വിചാരണ നടക്കാനിരിക്കുകയാണ്. 2011-ല്‍ അബ്ദുള്‍മന്നനും ബിഹാര്‍ സര്‍ക്കാരും തമ്മിലുള്ള കേസില്‍ സുപ്രീംകോടതിയുടെ വിധി പ്രസ്താവമായിരുന്നു മറ്റൊന്ന്.

അപൂര്‍വമാണെന്ന് വിചാരണക്കോടതിക്ക് ബോധ്യപ്പെട്ടാല്‍ വധശിക്ഷ നല്‍കാമെന്നായിരുന്നു ആ വിധിയില്‍ സുപ്രീംകോടതി പറഞ്ഞതെന്ന് പ്രോസിക്യൂഷന്‍ വാദിച്ചു. ഏഴുവയസ്സുകാരിയ പീഡിപ്പിച്ച് കൊന്ന തിവാരിയെന്നയാളും മധ്യപ്രദേശ് സര്‍ക്കാരും തമ്മിലുള്ള കേസാണ് നാലാമതായി ഉദ്ധരിച്ചത്. 1996-ലെ ഈ സുപ്രീംകോടതി വിധിയില്‍, ഒരാള്‍ സമൂഹത്തിന് ഭീഷണിയാണെന്ന് തോന്നിയാല്‍ വിചാരണക്കോടതിക്ക് വധശിക്ഷ നല്‍കാമെന്നായിരുന്നു വ്യക്തമാക്കിയിരുന്നത്. പ്രതി കുറ്റക്കാരനെന്ന് കണ്ടെത്തിയ ശേഷം നടന്ന വാദം മുക്കാല്‍മണിക്കൂറോളം നീണ്ടു. അപൂര്‍വതയൊന്നും ഈ കേസിനില്ലെന്നും അന്വേഷണത്തില്‍ പാളിച്ചയുണ്ടെന്നും പ്രതിക്ക് നിയമസഹായത്തിന് സര്‍ക്കാര്‍ നിയോഗിച്ച അഭിഭാഷകന്‍ ടി.എം. ദേവദാസ് വാദിച്ചു. പ്രതിയുടെ പിതാവിന്റെ രോഗാവസ്ഥ, കുടുംബത്തിലെ അവസ്ഥ തുടങ്ങിയ കാര്യങ്ങളും ഇദ്ദേഹം വിശദീകരിച്ചു.

'ഈ കോടതി വന്ന ശേഷമുള്ള കോളിളക്കമുണ്ടാക്കിയ കേസിലെ ആദ്യ വിധി'
'എത്രയോ കേസുകളില്‍ വിധി പറഞ്ഞു. പതിറ്റാണ്ടുകള്‍ തടവിലാകുന്ന ശിക്ഷാവിധിയുമുണ്ടായി. എന്നാല്‍ ഇത്രയും ക്രൂരമായതും അത്രയേറെ കോളിളിക്കമുള്ളതുമായ കേസ് ഈ കോടതിയില്‍ ആദ്യമാണ്'- ലെയ്സന്‍ ഓഫീസര്‍ എ.വി. ശോഭന പറയുന്നു. നാലുവര്‍ഷമായി ഹൊസ്ദുര്‍ഗ് അതിവേഗ പ്രത്യേക പോക്സോ കോടതി കാഞ്ഞങ്ങാട്ടെ കോടതിസമുച്ചയത്തില്‍ സ്ഥാപിതമായിട്ട്. അന്നുമുതല്‍ ഡ്യൂട്ടിയിലുണ്ട് ബങ്കളം സ്വദേശിയായ ശോഭന. കാസര്‍കോട് പോലീസ് ഹെഡ്ക്വാര്‍ട്ടേഴ്സിലെ എഎസ്ഐ ആണിവര്‍. ഡെപ്യൂട്ടേഷനിലാണ് കോടതിയിലെ ലെയ്സന്‍ ഓഫീസര്‍ ജോലിയിലെത്തിയത്. ഈ കേസിന്റെ നാള്‍വഴികള്‍ പറയുമ്പോള്‍ സാക്ഷികളില്‍ ഉയര്‍ന്ന രോഷത്തെക്കുറിച്ചാണ് ഇവര്‍ പറയുന്നതത്രയും. പറയുമ്പോള്‍ വിതുമ്പിയത്, കണ്ണുനിറഞ്ഞത്, പ്രതിയെ ശപിച്ചത്. കുട്ടിയുടെ വേദനയില്‍ ചേര്‍ന്നുനിന്നാണ് ഓരോ സാക്ഷിമൊഴിയും-ശോഭന പറഞ്ഞു.

Content Highlights: kasaragod hosdurg girl kidnap and rape case