പി.എം. ശ്രീയിലെ മലക്കംമറിച്ചിൽ | വഴിപോക്കൻ

പി.എം. ശ്രീ തുടരാൻ കേരള സർക്കാർ നിർബ്ബന്ധിതമായെന്നാണ് മുഖ്യമന്ത്രി വി.ഡി. സതീശൻ പറയുന്നത്. 93 കോടി രൂപ ഈ പദ്ധതിയുടെ കീഴിൽ കേരള സർക്കാർ കേന്ദ്രത്തിൽനിന്ന് സ്വീകരിച്ച് കഴിഞ്ഞെന്നും 106 കോടി രൂപ പുതുതായി അനുവദിച്ചിട്ടുണ്ടെന്നും 1,200 കോടി രൂപ അധികം വൈകാതെ ലഭ്യമാവുമെന്നും സതീശൻ ചൂണ്ടിക്കാട്ടുന്നു. ഈ അവസ്ഥയിൽ പദ്ധതിയിൽനിന്ന് പിന്മാറാനാവില്ലെന്നാണ് സതീശന്റെ ഭാഷ്യം. പദ്ധതിയിൽ ഒപ്പുവെച്ച പിണറായി സർക്കാരിന്റെ പാപഭാരം ഇപ്പോൾ തങ്ങളുടെ തലയിലാണെന്നും സതീശൻ വിലപിക്കുന്നു. ഉള്ളിന്റെ ഉള്ളിൽ കുറ്റബോധം ബാക്കി നിൽക്കുന്നതുകൊണ്ടാവാം പദ്ധതിയെക്കുറിച്ച് പഠിക്കാൻ വിദ്യാഭ്യാസ മന്ത്രിയുടെ നേതൃത്വത്തിൽ ഒരു ഉപസമിതിയെ നിയോഗിച്ചിട്ടുണ്ടെന്നും സതീശൻ കൂട്ടിച്ചേർക്കുന്നു.

നടപ്പാക്കാൻ നിർബ്ബന്ധിതമായ ഒരു വിഷയം വീണ്ടും പഠിക്കാൻ കമ്മിറ്റിയെ വെച്ചിട്ട് എന്തെങ്കിലും കാര്യമുണ്ടോ? സ്പ്രിങ്ക്‌ളർ വിവാദം അന്വേഷിച്ച മാധവൻ നമ്പ്യാർ കമ്മിറ്റി റിപ്പോർട്ടും സിനിമാ മേഖലയിലെ പ്രശ്‌നങ്ങൾ പരിശോധിച്ച ഹേമ കമ്മിറ്റി റിപ്പോർട്ടും പഠിക്കാൻ പിണറായി സർക്കാർ രണ്ട് ഉപസമിതികൾക്ക് രൂപം നൽകിയിരുന്നു. ചുമ്മാ സമയം തള്ളി നീക്കാൻ വേണ്ടി മാത്രം സർക്കാരുകൾ പ്രയോഗിക്കുന്ന തന്ത്രം എന്നല്ലാതെ ഇത്തരം ഉപസമിതികൾ കൊണ്ട് വേറൊരു പ്രയോജനവുമില്ലെന്ന് ആർക്കാണറിയാത്തത്. പി.എം. ശ്രീ പദ്ധതി നടപ്പാക്കാൻ പറ്റില്ലെന്ന് ഉപസമിതി കണ്ടെത്തിയാൽ യു.ഡി.എഫ്. സർക്കാർ സംഗതി ഉപേക്ഷിക്കുമോ? അങ്ങിനെ ഉപേക്ഷിക്കാനാണെങ്കിൽ ഇപ്പോൾ തന്നെ പദ്ധതിയിൽനിന്നു പിന്മാറുന്നതല്ലേ ബുദ്ധി? ബി.ജെ.പിയുടെ ഹിന്ദുത്വ പദ്ധതിയാണ് പി.എം. ശ്രീയെന്ന് വലിയ വായിൽ വിളിച്ചുകൂവിയത് സതീശനും കൂട്ടരും എത്ര എളുപ്പത്തിലാണ് മറന്നുപോവുന്നത്!

Content Highlights: Despite labeling the central government's PM SHRI scheme against Hindutva during the election campaign, Chief Minister VD Satheesan's UDF government is now moving forward to implement the project in Kerala, citing heavy financial liabilities left behind by the previous LDF administration.