ടോൾ വെട്ടിച്ചുപോവുന്നത് നൂറിലധികം വാഹനങ്ങൾ; 100രൂപ ലാഭിക്കാൻ 1000 രൂപ പിഴ നൽകേണ്ടിവരും, ഒപ്പം കേസും

കോഴിക്കോട്: ദേശീയപാതാ ബൈപ്പാസിലെ പന്തീരാങ്കാവ് ടോൾപ്ലാസയിൽ വാഹനങ്ങൾ ടോൾവെട്ടിച്ചുപോകുന്നത് കേസായി മാറുന്നു. നൂറിലധികം വാഹനങ്ങളാണ് ഒരുദിവസം ഇങ്ങനെ ടോൾവെട്ടിക്കുന്നത്. തിരക്കുള്ള ദിവസങ്ങളിൽ 150 കടക്കും. ഇത്തരത്തിലുള്ള 78 വാഹനങ്ങളുടെ വിവരങ്ങൾ ടോൾപ്‌ളാസ അധികൃതർ ട്രാഫിക് പോലീസിന് കൈമാറി.

ശനിയാഴ്ച രാത്രി ടോൾനൽകാതെ കടക്കാൻ ശ്രമിച്ച കാർ, ജീവനക്കാരനെ ഇടിച്ചത് കേസായിട്ടും ഞായറാഴ്ച 33 വാഹനങ്ങൾ ടോൾവെട്ടിച്ച് കടന്നുപോയെന്ന് ടോൾപ്‌ളാസ മാനേജർ കെ.വി. റാഫി പറഞ്ഞു. ഞായറാഴ്ച ഉച്ചവരെയുള്ള കണക്കുമാത്രമാണിത്.

മുന്നിലുള്ള വാഹനത്തിൽനിന്ന് ഫാസ് ടാഗ് കട്ടായി കടന്നുപോവുന്ന ഇടവേളയിലാണ് പിന്നാലെവരുന്ന വാഹനങ്ങളും കടക്കുന്നത്. വാഹനം നിർത്താനുള്ള ബൂംബാരിയർ തട്ടിമാറ്റിയാണ് ഇവർ പോവുന്നത്. ബാരിയർ തട്ടി കാറിന് കേടുപറ്റുന്നതുകൊണ്ട് സ്റ്റീൽമാറ്റി ഇപ്പോൾ പി.വി.സി. പൈപ്പാണ് ഉപയോഗിക്കുന്നത്.

നേരത്തേ ടോൾ നൽകാൻ തയ്യാറാവാത്ത വാഹനങ്ങൾ തടഞ്ഞുനിർത്താറുണ്ടായിരുന്നു. അത് ടോൾപ്‌ളാസയിൽ വാഹനങ്ങളുടെ നീണ്ട ക്യൂവിന് കാരണമായി. മാത്രമല്ല, തർക്കങ്ങളും സംഘർഷങ്ങളും പതിവായി. ജനുവരി, ഫെബ്രുവരി, മാർച്ച് മാസങ്ങളിൽ തർക്കങ്ങളുെട പേരിൽത്തന്നെ ഒരുമാസം 200 പരാതികൾവരെ പോലീസിൽ നൽകാറുണ്ടായിരുന്നു.

ഫാസ് ടാഗിൽ ബാലൻസില്ലാത്തവർ പരിശോധനയ്ക്കുവേണ്ടി വൈകിപ്പിക്കലും തുടങ്ങിയതോടെ തടഞ്ഞുനിർത്തൽ അവസാനിപ്പിച്ച് പോലീസിന് വിവരം കൈമാറുന്നതിലേക്ക് മാറിയതാണെന്ന് ജീവനക്കാർ പറഞ്ഞു. ദിവസം ശരാശരി പതിനയ്യായിരത്തിനും ഇരുപതിനായിരത്തിനും ഇടയിൽവാഹനങ്ങളാണ് ടോൾപ്‌ളാസ വഴി കടന്നുപോവുന്നത്. ശനി, ഞായർ ദിവസങ്ങളിൽ ഇത് നാൽപ്പതിനായിരമാകും.

പിഴ ആയിരംരൂപ

• ആയിരം രൂപ പിഴയും ടോൾതുകയും അടയ്‌ക്കേണ്ടിവരും

വെട്ടിക്കുന്നവർ

• ഫാസ്റ്റ് ടാഗ് അക്കൗണ്ടിൽ മതിയായ ബാലൻസില്ലാത്തവർ
• കെ.വൈ.സി. അപ്‌ഡേറ്റ് ചെയ്യാത്തിനാൽ കരിമ്പട്ടികയിൽപ്പെട്ട ടാഗ് ഉള്ളവർ
• ഫാസ്ടാഗ് സ്റ്റിക്കർ പതിക്കാതെ വരുന്ന വാഹനങ്ങളും അപൂർവം

Content Highlights: Over 100 vehicles evade toll daily at Pantheerankavu., Toll authorities have submitted data of 78 vehicles to traffic police., Boom barriers are being bypassed by following closely behind preceding vehicles., Physical enforcement stopped to prevent traffic congestion and disputes., Average daily traffic volume reaches 20,000, peaking at 40,000 on weekends.