ഡിഫൻഡർ 110 SUV-യുടെ വില ഇന്ത്യയിൽ 34 ലക്ഷംവരെ കുറയും; കാരണം ഇതാണ്

ലാൻഡ് റോവർ ഡിഫെൻഡർ 110 എസ്.യു.വിയുടെ വില ഇന്ത്യയിൽ 34 ലക്ഷംവരെ കുറയും. ഡിഫെൻഡർ 110-ന്റെ 3.0 ലിറ്റർ ഡീസൽ ഡി350, 3.0 ലിറ്റർ പെട്രോൾ പി400 എന്നീ വകഭേദങ്ങളുടെ വില ഇന്ത്യയിൽ 1.52 കോടി ആയിരുന്നത് 1.18 കോടി രൂപയായി കുറയും. അതായത് 34 ലക്ഷം രൂപയുടെ കുറവ്. എൻട്രി ലെവൽ 2.0 ലിറ്റർ പെട്രോൾ പി300 വേരിയന്റിന്റെ വില 1.35 കോടി രൂപ ആയിരുന്നത് 99 ലക്ഷം രൂപയായി കുറയും. 14.5 ലക്ഷം രൂപയുടെ കുറവാണ് എൻട്രി ലെവൽ വേരിയന്റിൽ വരുന്നത്.

വിലക്കുറവിന് കാരണമെന്ത്?

ഇന്ത്യയിൽ വാഹനത്തിന്റെ പ്രാദേശിക അസംബ്ലിങ് ആരംഭിച്ചതാണ് വിലക്കുറവിന് കാരണം. നേരത്തെ വാഹനം കംപ്ലീറ്റ്‌ലി ബിൽറ്റ്-അപ്പ് (സി.ബി.യു) രീതിയിൽ ഇറക്കുമതി ചെയ്താണ് ഇന്ത്യയിൽ വിറ്റഴിച്ചിരുന്നത്. എന്നാൽ ഇപ്പോൾ കംപ്ലീറ്റ്‌ലി നോക്ക്ഡ് ഡൗൺ (സി.കെ.ഡി) രീതിയിൽ ഇന്ത്യയിൽ തന്നെയാണ് അസംബിൾ ചെയ്യുന്നത്. ഇതോടെ സ്ലൊവാക്യയ്ക്ക് ശേഷം ഡിഫെൻഡർ നിർമ്മിക്കുന്ന ലോകത്തിലെ രണ്ടാമത്തെ രാജ്യമായി ഇന്ത്യ മാറി.

പ്രാദേശിക അസംബ്ലി: നേട്ടമേറെ

പ്രാദേശിക അസംബ്ലിങ് തുടങ്ങിയതോടെ ഡിഫെൻഡർ 110-ലേക്ക് കൂടുതൽ ഫീച്ചറുകൾ ഉൾപ്പെടുത്തിയിട്ടുണ്ട്. മുൻപ് അധിക തുക മുടക്കിയാൽമാത്രം ലഭ്യമായിരുന്ന പല ഫീച്ചറുകളും ഇപ്പോൾ സ്റ്റാൻഡർഡായി വാഹനത്തിൽ ഉൾപ്പെടുത്തിയിട്ടുണ്ട്. ഡി350 ഡീസൽ, പി400 പെട്രോൾ വകഭേദങ്ങളിൽ ഇത്തരം 29 ഫീച്ചറുകൾ അധികമായി ലഭിക്കും. പി300 പെട്രോൾ പതിപ്പിൽ 17 അധിക ഫീച്ചറുകൾ സ്റ്റാൻഡർഡായി ഉൾപ്പെടുത്തിയിട്ടുണ്ട്. സി.ബി.യു മോഡലുകളിൽ മിക്ക ഉപഭോക്താക്കളും തിരഞ്ഞെടുത്തിരുന്ന ഓപ്ഷനുകളാണ് ഇപ്പോൾ സ്റ്റാൻഡേഡായി ലഭ്യമാക്കുന്നത്.

ഇലക്ട്രോണിക് എയർ സസ്‌പെൻഷൻ, അഡാപ്റ്റീവ് ഡൈനാമിക്‌സ്, ടെറൈൻ റെസ്‌പോൺസ് 2, അഡാപ്റ്റീവ് ഓഫ്-റോഡ് ക്രൂസ് കൺട്രോൾ, സോളാർ-അറ്റെൻയുവേറ്റിങ് വിൻഡ്ഷീൽഡ്, ഹെഡ്ലൈറ്റ് പവർ വാഷ്, ബോഡി കളേർഡ് സ്‌പെയർ വീൽ കവർ എന്നിവ വേരിയന്റുകളിൽ ഉടനീളം സ്റ്റാൻഡേഡായി നൽകിയിരിക്കുന്ന ഫീച്ചറുകളിൽ ഉൾപ്പെടുന്നു.

പി300 പെട്രോൾ വേരിയന്റിൽ ക്ലിയർസൈറ്റ് ഇന്റീരിയർ റിയർ-വ്യൂ മിറർ, ഫ്രണ്ട് സെന്റർ കൺസോൾ റഫ്രിജറേറ്റർ കമ്പാർട്ട്‌മെന്റ്, റിയർ കൂളിങ് അസിസ്റ്റോട് കൂടിയ ത്രീ-സോൺ ക്ലൈമറ്റ് കൺട്രോൾ എന്നിവയും ലഭിക്കുന്നു. കോൺഫിഗറബിൾ ടെറൈൻ റെസ്‌പോൺസ്, ബ്രേക്കിങ് വഴിയുള്ള ടോർക്ക് വെക്റ്ററിംഗോടുകൂടിയ ഇലക്ട്രോണിക് ആക്ടീവ് ഡിഫറൻഷ്യൽ, 20 ഇഞ്ച് ഡയമണ്ട്-ടേൺഡ് അലോയ് വീലുകൾ, ചൂടാക്കാവുന്ന മൂന്നാം നിര സീറ്റുകൾ, ഹീറ്റിങ് - കൂളിങ്, മെമ്മറി ഫങ്ഷനുകളുള്ള 14-വേ ഇലക്ട്രിക്കലി അഡ്ജസ്റ്റബിൾ ഫ്രണ്ട് സീറ്റുകൾ എന്നിവ ഡി350, പി400 പതിപ്പുകളിൽ അധികമായി ലഭിക്കുന്നു.

കൂടുതൽ ഉയർന്ന സ്‌പെസിഫിക്കേഷനുകളുള്ള രണ്ട് എൻജിൻ ഓപ്ഷനുകളിലും വിൻഡ്സർ ലെതർ, ക്വാഡ്രാറ്റ് സീറ്റുകൾ, സ്യൂട്ട്‌ക്ലോത്ത് ഹെഡ്ലൈനിങ്, മെറിഡിയൻ സറൗണ്ട് സൗണ്ട് സിസ്റ്റം, ഹെഡ്-അപ്പ് ഡിസ്പ്ലേ എന്നിവ ഉൾപ്പെടെയുള്ള ആന്തരിക നവീകരണങ്ങളും ലഭിക്കുന്നു. ക്യാബിൻ എയർ പ്യൂരിഫിക്കേഷൻ പ്ലസ്, എയർ ക്വാളിറ്റി സെൻസർ, ക്ലിയർസൈറ്റ് ഇന്റീരിയർ റിയർ-വ്യൂ മിറർ, റഫ്രിജറേറ്റഡ് ഫ്രണ്ട് സെന്റർ കൺസോൾ കമ്പാർട്ട്‌മെന്റ്, റിയർ കൂളിംഗ് അസിസ്റ്റോടുകൂടിയ ത്രീ-സോൺ ക്ലൈമറ്റ് കൺട്രോൾ എന്നിവയാണ് മറ്റ് കൂട്ടിച്ചേർക്കലുകൾ.

എൻജിനും കരുത്തും

പ്രാദേശികമായി അസംബിൾ ചെയ്ത ഡിഫെൻഡർ 110 മൂന്ന് പവർട്രെയിൻ ഓപ്ഷനുകളോടെയാണ് വരുന്നത്. ഇവയെല്ലാം എട്ട് സ്പീഡ് ഓട്ടോമാറ്റിക് ട്രാൻസ്മിഷനുമായി ഘടിപ്പിച്ചിരിക്കുന്നു. ഡി350 ഡീസൽ എൻജിൻ 350 പി.എസും 700 എൻ.എം ടോർക്കും ഉത്പാദിപ്പിക്കുന്ന 3.0 ലിറ്റർ എൻജിനാണ് ഉപയോഗിക്കുന്നത്. പി400 പെട്രോളിന് 400 പി.എസും 550 എൻ.എമ്മും നൽകുന്ന 3.0 ലിറ്റർ എൻജിനാണുള്ളത്. പി300-ന് കരുത്ത് പകരുന്നത് 300 പി.എസും 400 എൻ.എമ്മും ഉത്പാദിപ്പിക്കുന്ന 2.0 ലിറ്റർ പെട്രോൾ എൻജിനാണ്.

വേഗത്തിന്റെ കാര്യത്തിൽ, ഡി350-ന് 0 - 100 കിലോമീറ്റർ വേഗത കൈവരിക്കാൻ 6.4 സെക്കൻഡ് മതി. പി400 ഈ വേഗം 6.1 സെക്കൻഡിൽ കൈവരിക്കുമ്പോൾ, പി300-ന് 7.4 സെക്കൻഡ് എടുക്കും. ഡിഫെൻഡർ 110-ന്റെ ഓഫ്-റോഡ് ശേഷിയെ സഹായിക്കുന്നത് ഇതിന്റെ ഇലക്ട്രോണിക് എയർ സസ്‌പെൻഷനാണ്. ഓഫ്-റോഡ് ഹൈറ്റ് മോഡിൽ വാഹനത്തെ 75 മില്ലിമീറ്റർ വരെ ഉയർത്താൻ ഇതിന് കഴിയും, ഇത് ഗ്രൗണ്ട് ക്ലിയറൻസ് 293 മില്ലിമീറ്ററായി ഉയർത്തുന്നു. ആക്‌സസ് ഹൈറ്റ് മോഡിൽ എസ്.യു.വിയെ 50 മില്ലിമീറ്റർ വരെ താഴ്ത്താനും സസ്‌പെൻഷനാകും.

Content Highlights: Land Rover Defender 110 prices reduced by up to Rs 34 lakh due to local assembly (CKD route)., P300 variant now priced at Rs 99 lakh, while D350 and P400 variants are priced at Rs 1.18 crore each., India is the second country globally after Slovakia to manufacture the Defender., Local assembly adds numerous popular features as standard equipment across all variants.