ഫൈവ്സ്റ്റാർ സുരക്ഷ ഉറപ്പ്, ബൂസ്റ്റർ ജെറ്റ് കരുത്തും; പുതിയ ബ്രെസയെത്താൻ മണിക്കൂറുകൾ മാത്രം

മാരുതി സുസുക്കിയുടെ വാഹന ശ്രേണിയിലെ കോംപാക്ട് എസ്‌യുവി മോഡലായ ബ്രെസയുടെ മുഖംമിനിക്കിയ പതിപ്പ് നിരത്തുകളിൽ എത്താൻ ഇനി കേവലം മണിക്കൂറുകൾ മാത്രമാണ് ശേഷിക്കുന്നത്. ജൂലായ് 24-ന് അവതരിപ്പിക്കുന്ന പുതിയ ബ്രെസയുടെ ബുക്കിങ്ങും ഇതിനോടകം ആരംഭിച്ചിട്ടുണ്ട്. കേവലം മുഖംമിനുക്കലിനെക്കാൾ ഉപരി മെക്കാനിക്കലായുള്ള മാറ്റങ്ങളും ഉയർന്ന സുരക്ഷ സംവിധാനങ്ങളുമായാണ് പുതിയ ബ്രെസ നിരത്തുകളിൽ എത്തുന്നത്.

ഭാരത് എൻക്യാപ് റിപ്പോർട്ട് അനുസരിച്ച് നിരത്തുകളിൽ എത്താനൊരുങ്ങുന്ന ബ്രെസ ഇതിനോടകം തന്നെ സുരക്ഷയിൽ കരുത്ത് തെളിയിച്ച് കഴിഞ്ഞിട്ടുണ്ട്. ഭാരത് എൻക്യാപ് ക്രാഷ്‌ടെസ്റ്റിൽ കുട്ടികളുടെയും മുതിർന്നവരുടെയും സുരക്ഷ ഉറപ്പാക്കുന്നതിൽ ഫൈവ് സ്റ്റാർ റേറ്റിങ് സ്വന്തമാക്കിയിട്ടുണ്ടെന്നാണ് റിപ്പോർട്ട്. മാരുതി സുസുക്കി ഇന്ത്യയുടെ ഏറ്റവും സുരക്ഷിതമായ വാഹനമാണിതെന്നാണ് ഭാരത് എൻക്യാപ് അഭിപ്രായപ്പെടുന്നത്.

വലിയ അഴിച്ചുപണിക്ക് പകരം ചെറിയ രൂപമാറ്റം വരുത്തിയാണ് 2026 ബ്രെസ വരുന്നത്. ക്രോമിയം ആവരണമുള്ള ഗ്രില്ല്, ട്വിൻ പോഡ് എൽഇഡി ഹെഡ്‌ലാമ്പ്, ഡിസൈൻ മാറ്റം വരുത്തിയിട്ടുള്ള ബമ്പറുകൾ, ത്രീകോണത്തിലുള്ള ഹൗസിങ്ങിൽ നൽകിയിട്ടുള്ള പ്രൊജക്ടർ ഫോഗ്‌ലാമ്പുകൾ, പാർക്കിങ് സെൻസറുകൾ, ഡ്യുവൽ ടോൺ അലോയി വീലുകൾ എന്നിങ്ങനെ നീളുന്ന ബ്രെസയിൽ വരുത്തിയിട്ടുള്ള മാറ്റങ്ങൾ.

ഇന്റീരിയറിലുമുണ്ട് ഏതാനും ചില കൂട്ടിച്ചേർക്കലുകൾ. 10.1 ഇഞ്ച് വലിപ്പമുള്ള ഇൻഫോടെയ്ൻമെന്റ് സിസ്റ്റമാണ് ഇതിൽ പ്രധാനം. വയർലെസ് ആൻഡ്രോയിഡ് ഓട്ടോ ആപ്പിൾ കാർപ്ലേ കണക്ടിവിറ്റി സംവിധാനങ്ങളോടെയാണ് ഈ സിസ്റ്റം ഒരുങ്ങിയിട്ടുള്ളത്. പുതിയ ക്ലൈമറ്റ് കൺട്രോൾ പാനൽ, വയർലെസ് ചാർജിങ് പാഡ്, എന്നിവയ്‌ക്കൊപ്പം മുൻനിരയിൽ വെന്റിലേറ്റഡ് സീറ്റുകളും പ്രതീക്ഷിക്കുന്നുണ്ട്.

മാരുതി സുസുക്കിയുടെ മറ്റ് പല മോഡലുകളിലും നൽകിയിട്ടുള്ള 1.0 ലിറ്റർ ബൂസ്റ്റർ ജെറ്റ് ടർബോ പെട്രോൾ എൻജിൻ ബ്രെസയ്ക്ക് കരുത്തേകാൻ എത്തുമെന്നതാണ് പ്രധാന പുതുമയായി പ്രതീക്ഷിക്കുന്നത്. 100 എച്ച്പി പവറും 148 എൻഎം ടോർക്കുമേകുന്ന എൻജിനാണിത്. ആറ് സ്പീഡ് മാനുവൽ ട്രാൻസ്മിഷൻ ആയിരിക്കും ഈ എൻജിനൊപ്പം നൽകുക. നിലവിലെ 1.5 ലിറ്റർ പെട്രോൾ, സിഎൻജി പതിപ്പുകളിലും മുഖംമിനുക്കിയ ബ്രെസ എത്തുമെന്നാണ് സൂചനകൾ.

Content Highlights: Official launch scheduled for July 24, 2026., Achieved 5-star safety rating in Bharat NCAP crash tests., Powered by the 1.0L Boosterjet turbo petrol engine., Interior upgrades include a 10.1-inch infotainment system and ventilated seats., Exterior design updates featuring LED headlamps and dual-tone alloy wheels.