5,000 കോഴികൾവരെ മലിനീകരണ നിയന്ത്രണ ബോർഡിന്റെ അനുമതി വേണ്ട; മാലിന്യ സംസ്കരണത്തിന് ബദലുകൾ, പുതിയ മാനദണ്ഡങ്ങൾ

കേരളത്തിൽ വളർത്തുമൃഗ ഫാമുകൾ പ്രാദേശികമായ പൊതുജന എതിർപ്പുകളെത്തുടർന്നും തദ്ദേശ സ്വയംഭരണ സ്ഥാപനങ്ങളുടെ നടപടികൾ മൂലവും അടച്ചുപൂട്ടേണ്ടി വരുന്ന സംഭവങ്ങൾ വ്യാപകമാണ്. ഫാമുകളിൽനിന്നുള്ള ശാസ്ത്രീയമല്ലാത്ത മാലിന്യ സംസ്കരണവും അതുമൂലമുണ്ടാകുന്ന ദുർഗന്ധവും പരിസ്ഥിതി പ്രശ്നങ്ങളുമാണ് ജനരോഷത്തിനും തുടർന്നുണ്ടാകുന്ന നിയമനടപടികൾക്കും പ്രധാന കാരണം.

നിശ്ചിത എണ്ണത്തിൽ കൂടുതൽ മൃഗങ്ങളെയോ പക്ഷികളെയോ വളർത്തുന്ന ഫാമുകൾക്ക് തദ്ദേശ സ്വയംഭരണ സ്ഥാപനങ്ങളിൽ നിന്നുള്ള ലൈസൻസ് നിർബന്ധമാണ്. തദ്ദേശ സ്ഥാപനങ്ങളിൽനിന്ന് ലൈസൻസ് ലഭിക്കണമെങ്കിൽ സംസ്ഥാന മലിനീകരണ നിയന്ത്രണ ബോർഡിന്റെ (KSPCB) സമ്മതപത്രം/ നിരാക്ഷേപ പത്രം (Consent/NOC) ഹാജരാക്കേണ്ടതുണ്ട്. കൃത്യമായ ലൈസൻസോടെയാണ് ഫാം പ്രവർത്തിക്കുന്നതെങ്കിൽ, പരാതികൾ ഉയർന്നുവന്നാൽ അത് പരിഹരിക്കാനും ആവശ്യമായ തിരുത്തലുകൾ വരുത്താനും സംരംഭകന് സാവകാശം ലഭിക്കും. എന്നാൽ, യാതൊരു ലൈസൻസുമില്ലാതെ പ്രവർത്തിക്കുന്ന ഫാമുകൾ ഉടനടി അടച്ചുപൂട്ടാൻ തദ്ദേശ സ്വയംഭരണ സ്ഥാപനങ്ങൾക്ക് പൂർണ്ണ അധികാരമുണ്ട്.