വെല്ലുവിളികൾ അതിജീവിച്ച് വെർസ്റ്റാപ്പൻ രണ്ടാമത്; ഹങ്കാരോറിംഗിലെ പോരാട്ടത്തിൽ നോറിസിന് വിജയം

സീസണിലെ നാലാഴ്ചത്തെ സമ്മർ ബ്രേക്കിനായി ടീമുകൾ പിരിയുന്നതിന് തൊട്ടുമുമ്പ് നടന്ന ആവേശകരമായ ഹംഗേറിയൻ ഗ്രാൻഡ് പ്രീയിൽ മക്ലാറന്റെ ലാൻഡോ നോറിസ് ഉജ്ജ്വല വിജയം സ്വന്തമാക്കി. ഹങ്കാരോറിംഗ് ട്രാക്കിൽ നടന്ന മത്സരത്തിൽ സഹതാരങ്ങൾ തമ്മിലുള്ള പോരാട്ടവും, ടീമുകളുടെ സ്ട്രാറ്റജി മാറ്റങ്ങളും, പിന്മാറ്റങ്ങളും ഫോർമുല വൺ ആരാധകർക്ക് ആവേശകരമായ കാഴ്ചയാണ് സമ്മാനിച്ചത്. റെഡ് ബുള്ളിന്റെ മാക്സ് വെർസ്റ്റാപ്പൻ രണ്ടാം സ്ഥാനവും മെഴ്‌സിഡസിന്റെ യുവതാരം കിമി അന്റോനെല്ലി മൂന്നാം സ്ഥാനവും കരസ്ഥമാക്കി.
മത്സരത്തിന്റെ തുടക്കം മുതൽ തന്നെ മക്ലാറൻ ക്യാമ്പിൽ നാടകീയമായ സംഭവങ്ങളാണ് അരങ്ങേറിയത്. പോൾ പൊസിഷനിൽ നിന്ന് റേസ് ആരംഭിച്ച ലാൻഡോ നോറിസിന് ഒന്നാം ലാപ്പിലെ രണ്ടാമത്തെ ടേണിൽ സംഭവിച്ച ചെറിയ പിഴവ് തിരിച്ചടിയായി. ഇത് മുതലാക്കി സഹതാരം ഓസ്കർ പിയാസ്ട്രി ഒന്നാം സ്ഥാനം പിടിച്ചെടുത്തു. ഓവർടേക്ക് ചെയ്യാൻ ഏറെ ബുദ്ധിമുട്ടുള്ള ഹങ്കാരോറിംഗ് ട്രാക്കിൽ പിയാസ്ട്രിക്ക് പിന്നിലായത് നോറിസിനെ അസ്വസ്ഥനാക്കി. തനിക്ക് കൂടുതൽ വേഗതയുണ്ടായിട്ടും സഹതാരത്തെ മറികടക്കാൻ കഴിയാതെ വന്നതോടെ നോറിസ് ടീം റേഡിയോയിലൂടെ തന്റെ അമർഷം പ്രകടിപ്പിച്ചു.
രണ്ടാം പിറ്റ് സ്റ്റോപ്പിന് മുമ്പ് ആദ്യം പിറ്റ് ചെയ്യാൻ നോറിസ് അനുവാദം ചോദിച്ചെങ്കിലും ടീം അത് നിരസിച്ചിരുന്നു. എന്നാൽ, പിന്നീട് പഴയ ടയറുകളിൽ മികച്ച ലാപ്പ് ടൈമുകൾ കെട്ടിപ്പടുത്ത് നോറിസ് തന്റെ ആധിപത്യം ഉറപ്പിച്ചു. ഇതിനിടയിൽ വില്യംസിന്റെ കാർലോസ് സൈൻസിനെ ലാപ്പ് ചെയ്യുന്നതിനിടയിൽ പിയാസ്ട്രിയുടെ കാർ സൈൻസുമായി ചെറിയ രീതിയിൽ കൂട്ടിയിടിക്കുകയും ചെയ്തു. ഒടുവിൽ 40-ാം ലാപ്പിൽ പുതിയ ടയറുകളിലേക്ക് മാറിയ നോറിസ്, പിറ്റ് സ്റ്റോപ്പിന് ശേഷം പിയാസ്ട്രിയെ മറികടന്ന് ഒന്നാമതായി ട്രാക്കിലേക്ക് തിരിച്ചെത്തി.
മക്ലാറന് 'വൺ-ടു' ഫിനിഷ് ലഭിക്കുമെന്ന് ആരാധകർ പ്രതീക്ഷിച്ചിരുന്നെങ്കിലും റേസ് അവസാനിക്കാൻ 14 ലാപ്പുകൾ ബാക്കിയിരിക്കെ പിയാസ്ട്രിക്ക് തിരിച്ചടി നേരിട്ടു. കാറിന്റെ ഗിയർബോക്സ് തകരാറിലായതിനെ തുടർന്ന് ഓസ്കർ പിയാസ്ട്രിക്ക് റേസിൽ നിന്ന് പിന്മാറേണ്ടി വന്നത് ട്രാക്കിൽ 'വെർച്വൽ സേഫ്റ്റി കാർ' സാഹചര്യമുണ്ടാക്കി. ഈ ഘട്ടത്തിൽ ഒന്നാം സ്ഥാനത്ത് സുരക്ഷിതമായിരുന്ന നോറിസ് വിജയം ഉറപ്പിച്ചു. ഇന്നത്തെ എന്റെ വേഗം ഞാൻ ഇതുവരെ പുറത്തെടുത്തതിൽ വച്ച് ഏറ്റവും മികച്ചതായിരുന്നു എന്നാണ് വിജയത്തിന് ശേഷം നോറിസ് പ്രതികരിച്ചത്.
മെഴ്‌സിഡസിൽ നിന്നും ഫെറാറിയിലേക്ക് മാറിയ ലൂയിസ് ഹാമിൽട്ടണ് ഈ റേസ് അത്ര ശുഭകരമായിരുന്നില്ല. ക്വാളിഫയിംഗിലെ പിഴവ് കാരണം അഞ്ചാം സ്ഥാനത്ത് നിന്ന് റേസ് ആരംഭിച്ച ഹാമിൽട്ടൻ തുടക്കത്തിൽ മികച്ച മുന്നേറ്റം നടത്തിയിരുന്നു. എന്നാൽ വെർസ്റ്റാപ്പനെ 'അണ്ടർകട്ട്' ചെയ്യാൻ ഫെറാറി ഹാമിൽട്ടനെ നേരത്തെ പിറ്റിലേക്ക് വിളിച്ചത് തിരിച്ചടിയായി. പുതിയ ടയറുകളിലിറങ്ങിയ വെർസ്റ്റാപ്പൻ മികച്ച ഓവർടേക്കിലൂടെ ഹാമിൽട്ടനെ വീണ്ടും പിന്നിലാക്കി.
വെർച്വൽ സേഫ്റ്റി കാർ സമയത്ത് ഹാമിൽട്ടനെയും സഹതാരം ചാൾസ് ലെക്ലെയറിനെയും വീണ്ടും പിറ്റിലേക്ക് വിളിച്ച ഫെറാറിയുടെ തീരുമാനത്തിന് വലിയ വില നൽകേണ്ടി വന്നു. കൂടാതെ, പിറ്റ് ലൈനിൽ അനുവദനീയമായ വേഗതയേക്കാൾ കൂടുതൽ വേഗത്തിൽ കാറോടിച്ചതിന് ഹാമിൽട്ടണ് 5 സെക്കൻഡ് ടൈം പെനാൽറ്റിയും ലഭിച്ചു. ഇതോടെ ഹാമിൽട്ടൻ അഞ്ചാം സ്ഥാനത്തേക്ക് പിന്തള്ളപ്പെട്ടപ്പോൾ ചാൾസ് ലെക്ലെർക്ക് നാലാം സ്ഥാനത്തെത്തി. റേസിന്റെ അവസാന ഘട്ടത്തിൽ (65-ാം ലാപ്പിൽ) ട്രാക്കിൽ ശക്തമായ കാറ്റ് വീശിയത് ഡ്രൈവർമാർക്ക് വലിയ പ്രയാസമുണ്ടാക്കി.
മെഴ്‌സിഡസിന്റെ യുവ ഡ്രൈവർ കിമി അന്റോനെല്ലി മൂന്നാം സ്ഥാനം നേടിയതോടെ ഡ്രൈവേഴ്‌സ് ചാമ്പ്യൻഷിപ്പ് പട്ടികയിൽ 219 പോയിന്റോടെ തന്റെ ലീഡ് 50 പോയിന്റുകളായി ഉയർത്തി. നിലവിൽ ഹാമിൽട്ടണെക്കാൾ 50 പോയിന്റും ജോർജ്ജ് റസ്സലിനേക്കാൾ 59 പോയിന്റും മുന്നിലാണ് അന്റോനെല്ലി. കടുത്ത വെല്ലുവിളികൾക്കിടയിലും മാക്സ് വെർസ്റ്റാപ്പൻ രണ്ടാം സ്ഥാനം നേടി റെഡ്ബുള്ളിന് ആശ്വാസം നൽകി.
പിറ്റ് സ്റ്റോപ്പിലെ കൃത്യമായ തീരുമാനങ്ങളാണ് നോറിസിന്റെ വിജയത്തിൽ നിർണ്ണായക പങ്ക് വഹിച്ചത്. ഈ വിജയത്തോടെ മക്ലാറൻ ഡ്രൈവർ ലാൻഡോ നോറിസ് തന്റെ ഫോം വീണ്ടെടുത്തിരിക്കുകയാണ്. അടുത്ത റേസുകളിലും ഈ ആധിപത്യം തുടരാൻ നോറിസിനാകുമോ എന്നാണ് ആരാധകർ ഉറ്റുനോക്കുന്നത്. ഇനി നാലാഴ്ചത്തെ ഇടവേളയ്ക്ക് ശേഷം ഓഗസ്റ്റ് 21 മുതൽ 23 വരെ നടക്കുന്ന ഡച്ച് ഗ്രാൻപ്രീയിലൂടെ സീസൺ പുനരാരംഭിക്കും.
ഹംഗേറിയൻ ഗ്രാൻപ്രി 2026 - ഫലങ്ങൾ
Top 5
ലാൻഡോ നോറിസ് (മക്‌ലാറൻ) - 1:39.56.180
മാക്സ് വെർസ്റ്റാപ്പൻ (റെഡ് ബുൾ) - +15.080 സെക്കൻഡ്
കിമി അന്റോനെല്ലി (മെഴ്‌സിഡസ്) - +18.728 സെക്കൻഡ്
ചാൾസ് ലെക്ലെയർ (ഫെറാറി) - +23.840 സെക്കൻഡ്
ലൂയിസ് ഹാമിൽട്ടൻ (ഫെറാറി) - +24.540 സെക്കൻഡ്.