ജലവിതരണ അതോറിറ്റിയുടെ ബോർഡ് വെച്ച കാറിൽ ചന്ദനകടത്ത്: 60 കിലോ ചന്ദനമുട്ടികളുമായി ഏഴുപേർ അറസ്റ്റിൽ
കോഴിക്കോട്‌: ജലഅതോറിറ്റിയുടെ ബോര്‍ഡുവെച്ച കാറില്‍ കടത്താന്‍ ശ്രമിച്ചതടക്കം 60 കിലോഗ്രാം ഭാരംവരുന്ന ചന്ദനമുട്ടികള്‍ പിടികൂടി. ഇതുമായി ബന്ധപ്പെട്ട് ഏഴുപേരെ അറസ്റ്റുചെയ്തു. വനം ഇന്റലിജന്‍സ് സെല്ലിന്റെ (എഫ്.ഐ.സി.) രഹസ്യവിവരത്തിന്റെ അടിസ്ഥാനത്തില്‍ വനംവകുപ്പ് വിജിലന്‍സ് ഫ്‌ളയിങ് സ്‌ക്വാഡാണ് ചന്ദനം പിടികൂടിയത്.
മലാപ്പറമ്പിലെ ജലഅതോറിറ്റി ഓഫീസ് മുറ്റത്തുവെച്ചാണ് 35 കിലോഗ്രാം ചന്ദനമുട്ടികള്‍ കാറിന്റെ ഡിക്കിയില്‍ കണ്ടെത്തിയത്. അതോറിറ്റിക്കുവേണ്ടി കരാറടിസ്ഥാനത്തില്‍ ഓടിക്കുന്ന കാറില്‍ അതോറിറ്റിയുടെ ബോര്‍ഡ് ദുരുപയോഗംചെയ്താണ് ചന്ദനം കടത്തിയതെന്നാണ് പ്രാഥമികവിവരം. പന്തീരാങ്കാവ് സ്വദേശികളായ കാര്‍ കരാറുകാരന്‍ എന്‍. ശ്യാമപ്രസാദ്, വെള്ളന്‍പറമ്പില്‍തൊടി സി.ടി. അനില്‍, പട്ടാമ്പുറത്ത് മീത്തല്‍ പി.എം. മണി, നല്ലളം സ്വദേശിയും കാന്റീന്‍ നടത്തിപ്പുകാരനുമായ വാഹിദ് മന്‍സില്‍ നൗഫല്‍, ഒളവണ്ണ സ്വദേശി ഷാജുദ്ദീന്‍ എന്നിവരാണ് പിടിയിലായത്.