ദിവസം രണ്ട് സീരിയല്‍, പരമാവധി 30 എപ്പിസോഡ്; സീരിയലിനെ നിയന്ത്രിക്കാന്‍ വനിതാ കമ്മീഷന്‍
വൈകുന്നേരങ്ങളില്‍ വീട്ടകങ്ങളെ ടി.വിക്ക് മുന്നില്‍ പിടിച്ചിരുത്തുന്നതില്‍ മുന്നിലാണ് മെഗാസീരിയലുകളുടെ സ്ഥാനം. സീരിയലുകളുടെ പ്രമേയത്തെ ഒരുകൂട്ടം വിമര്‍ശിക്കുമ്പോള്‍ തന്നെ അടുത്തദിവസം ബാക്കിഭാഗത്തിനായി കാത്തിരിക്കുന്നവരും നിരവധിയാണ്. എന്നാല്‍ തിങ്കള്‍ മുതല്‍ വെള്ളിവരെ വൈകുന്നേരം ഏഴുമണി മുതല്‍ പത്തുമണി വരെ എന്റര്‍ടെയ്ന്‍മെന്റ് ചാനലുകളില്‍ നിറയുന്ന സീരിയലുകള്‍ക്ക് കടിഞ്ഞാണിടാനൊരുങ്ങുകയാണ് വനിതാ കമ്മീഷന്‍.
മലയാള ടെലിവിഷന്‍ സീരിയല്‍ക്കഥകള്‍, എപ്പിസോഡുകള്‍ എന്നിവ സംപ്രേഷണം ചെയ്യുംമുന്‍പ് സെന്‍സര്‍ബോര്‍ഡിന്റെ പരിശോധന ആവശ്യമാണെന്ന് വ്യക്തമാക്കുകയാണ് വനിതാ കമ്മീഷന്‍ പുറത്തുവിട്ട പഠനറിപ്പോര്‍ട്ട്. സീരിയലുകളെ പ്രധാനമായും ട്രോളുന്ന ഒന്ന് അവയുടെ ദൈര്‍ഘ്യമാണ്. മാസങ്ങളും വര്‍ഷങ്ങളും നീളുന്ന സീരിയലുകളാണ് പല ചാനലുകളിലുമുള്ളത്. കാലാകാലങ്ങളിലേക്ക് നീളുന്ന മെഗാസീരിയലുകള്‍ക്കും കടിഞ്ഞാണിടണമെന്നാണ് വനിത കമ്മീഷന്‍ ആവശ്യപ്പെടുന്നത്.