റവാഡ ചുമതലയേറ്റു, കൂത്തുപറമ്പ് വിശദീകരിച്ച് വിയർത്ത് സിപിഎം | News Lunch@1
കേരളത്തിലെ ഡിജിപി ആരായിരിക്കുമെന്ന ചര്‍ച്ചക്ക് ഇന്നലെയാണ് വിരാമമായത്. റവാഡ ചന്ദ്രശേഖര്‍ രാവിലെ സംസ്ഥാന പോലീസ് മേധാവിയായി ചുമതലയേറ്റു. ഡല്‍ഹിയില്‍ നിന്ന് ചൊവ്വാഴ്ച പുലര്‍ച്ചെ തലസ്ഥാനത്തെത്തിയ അദ്ദേഹം രാവിലെ ഏഴ് മണിയോടെയാണ് ചുമതലയേറ്റത്. എഡിജിപി മാര്‍ അടക്കമുള്ള പോലീസ് ആസ്ഥാനത്തെ ഉദ്യോഗസ്ഥര്‍ അദ്ദേഹത്തെ സ്വീകരിച്ചു. പോലീസ് മേധാവിയുടെ ഓഫീസില്‍ വെച്ച് അധികാരക്കൈമാറ്റ നടപടി നടന്നു.
പുതിയ സംസ്ഥാന പോലീസ് മേധാവിയായി റവാഡ ചന്ദ്രശേഖര്‍ വരുമ്പോള്‍ കൂത്തുപറമ്പ് വെടിവെപ്പുമായുള്ള അദ്ദേഹത്തിന്റെ ബന്ധം വിശദീകരിച്ച് വിയര്‍ക്കുകയാണ് സിപിഎം നേതാക്കളും അണികളും. അഞ്ച് DFYI പ്രവര്‍ത്തകര്‍ കൊല്ലപ്പെടുകയും പരിക്കേറ്റ ഒരാള്‍ മൂന്ന് പതിറ്റാണ്ട് കിടപ്പാകുകയും ചെയ്ത സമരം സിപിഎമ്മിന്റെ ചരിത്രത്തിലെ പൊള്ളുന്ന ഓര്‍മയാണ്. അന്ന് അതില്‍ പ്രതിചേര്‍ക്കപ്പെടുകയും കണ്ണിലെ കരടായി മാറുകയും ചെയ്തയാള്‍ വര്‍ഷങ്ങള്‍ക്കിപ്പുറം പാര്‍ട്ടിയുടെ സര്‍ക്കാരിനുകീഴില്‍ പോലീസ് മേധാവിയായി വരുന്നുവെന്നതിലെ 'ചരിത്രപരമായ കൗതുക'മാണ് ചര്‍ച്ചകള്‍ക്കിടയാക്കുന്നത്.