പരിസ്ഥിതിയോടുള്ള പ്രണയം; 90-ാംവയസിലും മുട്ടിപ്പഴത്തിന്റെ തൈ തേടി വലിയ മെത്രാപ്പോലീത്ത ഹൈറേഞ്ചിൽ

തൊടുപുഴ: തൊണ്ണൂറിന്റെ നിറവിലും പരിസ്ഥിതിയോടും കൃഷിയോടുമുള്ള തൻ്റെ അടങ്ങാത്ത സ്നേഹം വീണ്ടും തെളിയിച്ച് മലങ്കര സഭയുടെ വലിയ മെത്രാപ്പോലീത്ത കുറിയാക്കോസ് മാർ ക്ലിമീസ് തിരുമേനി. മാരാമൺ സമഷ്ടിയിലെ തോട്ടത്തിൽ നട്ടുപിടിപ്പിക്കാനായി അപൂർവ്വ ഇനത്തിൽപ്പെട്ട 'മുട്ടിപ്പഴ'ത്തിൻ്റെ തൈ തേടി അദ്ദേഹം ഇടുക്കി വണ്ണപ്പുറത്ത് എത്തി.

വണ്ണപ്പുറം കേന്ദ്രമായി പ്രവർത്തിക്കുന്ന കർഷക കൂട്ടായ്മയായ 'റെഡ് ഗ്രോവ് ഫാമി'ൽ മുട്ടിപ്പഴം വിജയകരമായി നട്ടുവളർത്തുന്നുണ്ടെന്ന വാർത്ത അറിഞ്ഞാണ് തിരുമേനി ഹൈറേഞ്ചിലേക്ക് യാത്ര തിരിച്ചത്. കഴിഞ്ഞ മൂന്ന് പതിറ്റാണ്ടിലേറെയായി മുട്ടിപ്പഴത്തിന്റെ സംരക്ഷണത്തിനും വ്യാപനത്തിനുമായി സജീവമായി രംഗത്തുള്ള കൃഷിഇടമാണ് വണ്ണപ്പുറത്തെ റെഡ് ഗ്രോവ് ഫാം.