വിമതർ കോൺഗ്രസിലെത്തുമോ? തുലാസിലായി ആപ്പിന്റ ഭാവി, കെജ്‌രിവാളിന്റേയും
ആം ആദ്മി പാർട്ടിയുടെ തലപ്പൊക്കമായിരുന്നു രാജ്യതലസ്ഥാന നഗരിയിലെ അധികാരക്കസേര. അത് പോയതോടെ പരുങ്ങലിലായിരിക്കുകയാണ് ദേശീയതലത്തിൽ തന്നെ ആപ്പിന്റെ നില. പല സംസ്ഥാനങ്ങളിലേയും ആപ്പ് നേതാക്കൾ കെജ്‌രിവാളിനെതിരേയും ആപ് നേതൃത്വത്തിനെതിരേയും പരസ്യമായി രംഗത്തെത്തി. പലയിടത്തും വിമതശബ്ദം ഉയർന്നുകഴിഞ്ഞു. നിലവിൽ ഭരണത്തിലിരിക്കുന്ന ഏക സംസ്ഥാനമായ പഞ്ചാബിലും ആപ്പിന്റെ സ്ഥിതി പരുങ്ങലിലാണ്. ഡൽഹിയിലെ പരാജയത്തിന് പിന്നാലെ കെജ്രിവാൾ പഞ്ചാബിൽ മുഖ്യമന്ത്രിയാകുമെന്ന നേതാക്കളുടെ പ്രഖ്യാപനം എം.എൽ.എമാരെ ചൊടിപ്പിച്ചു കഴിഞ്ഞു. പഞ്ചാബ് മുഖ്യമന്ത്രി ഭഗവന്ത് മന്നിന്റെ നേതൃത്വത്തിൽ ആപ് എം.എൽ.എമാർ പാർട്ടി വിടുമെന്ന് പറഞ്ഞിരിക്കുകയാണ് ഗുരുദാസ്പുർ എം.പി.സുഖ്ജിന്ദർ സിങ് രൺധാവ. മുപ്പതിലധികം ആപ്പ് എം.എൽ.എമാർ ഒരുകൊല്ലത്തോളമായി കോൺഗ്രസുമായി സമ്പർക്കത്തിലുണ്ടെന്നും അവർ പാർട്ടി മാറാൻ തയ്യാറാണെന്നും മുതിർന്ന കോൺഗ്രസ് നേതാവും പഞ്ചാബിലെ പ്രതിപക്ഷ നേതാവുമായ പർതാപ് സിങ് ബാജ്വയും പറയുന്നു.
ബിജെപിക്കെതിരേ ആപ്പും കോൺഗ്രസും ഒരുമിച്ച് നിൽക്കാഞ്ഞത് വലിയ തോതിലുള്ള വിമർശനങ്ങൾക്കിടയാക്കി. ഒരുമിച്ചു നിന്നിരുന്നെങ്കിൽ വിജയമുറപ്പായിരുന്നുവെന്ന് കണക്കുകളും പറയുന്നു. ഇനിയും തമ്മിലടിക്കൂ എന്നായിരുന്നു ജമ്മുകശ്മീർ മുഖ്യമന്ത്രി ഒമർ അബ്ദുള്ളയുടെ വിമർശനം പോലും. തിരഞ്ഞെടുപ്പ് പ്രചാരണത്തിനിടെ രാഹുൽഗാന്ധി കെജ്രിവാളിനെതിരേ പ്രയോഗിച്ച കടുത്ത ഭാഷയും ഏറെ വിമർശനങ്ങൾക്ക് കാരണമായി. ഉദ്ധവ് വിഭാഗം ശിവസേന നേതാവ് സഞ്ജയ് റാവത്തും സമാജ്‌വാദിപാർട്ടി നേതാവ് രാംഗോപാൽ യാദവും മറ്റ് സഖ്യകക്ഷികളുമെല്ലാം ഇന്ത്യ സഖ്യത്തിലെ തമ്മിലടിയെ രൂക്ഷമായി വിമർശിച്ചു. അതിരുകടന്ന കടുംപിടിത്തമാണ് ചർച്ചയ്ക്കുള്ള വഴിപോലുമില്ലാതാക്കിയതെന്നായിരുന്നു ഇതിനോടുള്ള കോൺഗ്രസിന്റെ പ്രതികരണം.
ലാളിത്യത്തിന്റെ മറുപേരാകുമ്പോഴും ഏകാധിപതിയെന്ന പേര് തുടക്കംമുതലേ കെജ്രിവാൾ കേട്ടിരുന്നു. വലിയൊരു മുന്നേറ്റത്തിന്റെ ഭാഗമായി തികച്ചും ജനകീയമായി പിറന്ന പാർട്ടി പലപ്പോഴും കേഡർ സ്വഭാവം കാണിച്ചു. മുൻനിരനേതാക്കൾ ആപ്പിനെ കൈവിട്ടപ്പോഴും ജനം കെജ്രിവാളിനെ വിശ്വസിച്ചു. എന്നാൽ അഴിമതിയുടെ നിഴൽവീണ അന്ന് മുതൽ ആപ്പിന്റെ പതനവും തുടങ്ങി. ബിജെപിയാണോ കോൺഗ്രസാണോ ശത്രു, ദേശീയ രാഷ്ട്രീയത്തിൽ ശ്രദ്ധിക്കണോ അതോ ഡൽഹി മതിയോ..ഇങ്ങനെ ആപ്പിന്റെ സന്ദേഹങ്ങൾ തെളിഞ്ഞ് കണ്ടതും നേതൃതനിരയിൽ അസ്വാരസ്യങ്ങൾ ഉയർന്നതും അത് പരസ്യമായതും വീഴ്ചയുടെ ആക്കം കൂട്ടി. ബിജെപി എന്ന പൊതുശത്രുവിനായി ആപ്പും കോൺഗ്രസും കൈകോർത്തപ്പോൾ ഡൽഹി രാഷ്ട്രീയത്തിൽ അതെങ്ങനെ വേണമെന്ന് കൃത്യമായൊരുത്തരം കൊടുക്കാൻ കെജ്രിവാളിനും കൂട്ടർക്കും കഴിയാതെ പോയി. ഡൽഹിയിൽ ബിജെപി പഴയതിനേക്കാൾ വളർന്നുവെന്നും ആപ്പ് മറന്നു പോയി.
പഴയപോലെയല്ല, രാഷ്ട്രീയക്കാർ നിരന്തരം ജനങ്ങളുടെ ഓഡിറ്റിന് വിധേയമാകുന്നുണ്ടെന്ന പാഠമാണ് കെജ്‌രിവാളിന്റേയും ടീമിന്റേയും തോൽവി നൽകുന്നത്. പണ്ട് പറഞ്ഞതും ഇപ്പോൾ പറയുന്നതുമെല്ലാം കൃത്യമായി ഓർത്തുവെയ്ക്കുന്നുമുണ്ട്. ഈ തോൽവി ആപ്പിന്റെ തകർച്ചയ്ക്ക് കാരണമാകാതെ നോക്കേണ്ട ഭാരിച്ച ഉത്തരവാദിത്തവും ഏകാധിപത്യത്തിലേക്ക് വളർന്ന കെജ്‌രിവാളിന് തന്നെയാണ്. ഡൽഹിയുടെ ഭരണം പോയെങ്കിലും ഡൽഹി കോർപറേഷൻ ഭരണം നിലനിർത്താനായാൽ, ജനങ്ങൾക്കൊപ്പമുണ്ടെന്ന് തെളിയിച്ചാൽ മദ്യനയക്കേസിൽ മനീഷ് സിസോദിയയും കെജ്‌രിവാളും കുറ്റവിമുക്തനായാൽ രാഷ്ട്രീയത്തിലിനിയും കെജ്‌രിവാളിന് തിളങ്ങാം. ഇന്ത്യ സഖ്യത്തിൽ ഇപ്പോഴും നിർണായക ശക്തിയാണ് കെജ്രിവാൾ. ആ ബലം സഖ്യം വീണ്ട വിധം ഉപയോഗിച്ചാൽ ആപ്പിന്റെ ഡൽഹിയിൽ നഷ്ടമായ പ്രതാപം വീണ്ടെടുക്കാം. മുഖം മങ്ങിയ പാർട്ടിക്കൊപ്പം എത്ര നേതാക്കൾ, എത്ര എം.എൽ.എമാർ നിൽക്കുമെന്നതും വലിയൊരു ചോദ്യമാണ്. അവരെ പിടിച്ചുനിർത്താനായാൽ ആപ്പ് പകുതിവിജയിച്ചു. ആം ആദ്മി പാർട്ടി ചരിത്രത്തിലുറങ്ങാതിരിക്കാൻ നേതാക്കൾക്ക് മുന്നിൽ അതേ പോംവഴിയുള്ളൂ
Content Highlights: AAP`s decline after Delhi loss: future uncertain