18000 രൂപയ്ക്ക് പോളണ്ടിൽ പെർമെനന്റ് റെസിഡൻസി നേടാം, ഇന്ത്യക്കാർക്ക് എങ്ങനെ അപേക്ഷിക്കാം?

മധ്യ യൂറോപ്പിലെ മനോഹരമായ രാജ്യമാണ് പോളണ്ട്. സമ്പന്നമായ ചരിത്രം, സംസ്കാരം, വളർന്നുവരുന്ന സമ്പദ്‌വ്യവസ്ഥ, ലോകപ്രശസ്തമായ പാചകരീതി എന്നിവയ്ക്ക് പേരുകേട്ട ഈ രാജ്യം, ലോകമെമ്പാടുമുള്ള വിനോദസഞ്ചാരികളെ ആകർഷിക്കുന്നുണ്ട്. ഇപ്പോൾ നിങ്ങൾക്കും അവിടെ സ്ഥിരതാമസമാക്കാനും രാജ്യത്തെ മനോഹരമായ സ്ഥലങ്ങൾ ആസ്വദിക്കാനും വിദ്യാഭ്യാസപരവും തൊഴിൽപരവുമായ ഒട്ടേറെ അവസരങ്ങൾ പ്രയോജനപ്പെടുത്താനും സാധിക്കും. 

ഇന്ത്യക്കാർ ഉൾപ്പെടെയുള്ള മൂന്നാംലോക രാജ്യക്കാർക്ക്, 18100 രൂപയിൽ താഴെ ചിലവിൽ സ്ഥിരതാമസത്തിനുള്ള പെർമിറ്റ് (permanent residency permit) ആണ് പോളണ്ട് വാഗ്ദാനം ചെയ്യുന്നത്. ഇത് അനിശ്ചിതകാലത്തേക്ക് പോളണ്ടിൽ ജീവിക്കാൻ അനുവദിക്കുന്നു. 

വിദേശികൾക്ക് ഒരു രാജ്യത്ത് സമയപരിധിയില്ലാതെ ജീവിക്കാനും ജോലി ചെയ്യാനും അനുവദിക്കുന്ന ഒരു നിയമപരമായ രേഖയാണ് സ്ഥിരം താമസ പെർമിറ്റ്. പോളണ്ടിൽ, അധിക വർക്ക് പെർമിറ്റുകളോ സ്വയം തൊഴിൽ രജിസ്ട്രേഷനോ ഇല്ലാതെ ജോലി ചെയ്യാൻ ഇത് അപേക്ഷകരെ സഹായിക്കുന്നു. 

നിയന്ത്രണങ്ങളില്ലാത്ത താമസത്തിനും ജോലിക്കും പുറമെ, ഏതൊരു 180 ദിവസ കാലയളവിലും 90 ദിവസം വരെ ഷെങ്കൻ ഏരിയയിൽ വിസയില്ലാതെ യാത്ര ചെയ്യാനും ഈ പെർമിറ്റ് അവസരം നൽകുന്നു. കൂടാതെ, അപേക്ഷകൻ മറ്റ് യോഗ്യതാ മാനദണ്ഡങ്ങൾ പാലിക്കുകയാണെങ്കിൽ, സ്ഥിരം താമസ പെർമിറ്റ് പോളിഷ് പൗരത്വം നേടുന്നതിനുള്ള ഒരു മാർ​ഗമായും ഉപയോഗിക്കാം.

പോളണ്ടിലെ സ്ഥിരം താമസത്തിന് ആർക്കൊക്കെയാണ് യോഗ്യത?

പോളണ്ടിൽ സ്ഥിരം താമസ പെർമിറ്റ് ലഭിക്കുന്നതിന് താഴെ പറയുന്ന മാനദണ്ഡങ്ങൾ പാലിച്ചിരിക്കണം:

• പോളണ്ടിൽ താൽക്കാലിക താമസ പെർമിറ്റിൽ (temporary residence permit) കുറഞ്ഞത് അഞ്ച് വർഷമെങ്കിലും തുടർച്ചയായി നിയമപരമായി താമസിച്ചിരിക്കണം.
• അല്ലെങ്കിൽ, ഒരു പോളിഷ് പൗരനെ വിവാഹം കഴിച്ച് കുറഞ്ഞത് മൂന്ന് വർഷമായിരിക്കണം, അതിൽ കുറഞ്ഞത് രണ്ട് വർഷമെങ്കിലും താൽക്കാലിക പെർമിറ്റിൽ പോളണ്ടിൽ താമസിച്ചിരിക്കണം
• അല്ലെങ്കിൽ, പോളണ്ടിൽ ദീർഘകാല അല്ലെങ്കിൽ സ്ഥിരം യൂറോപ്യൻ യൂണിയൻ (EU) റെസിഡൻസ് പെർമിറ്റുള്ള മാതാപിതാക്കൾക്ക് ജനിച്ച കുട്ടിയായിരിക്കണം
• പോളണ്ടിൽ സ്ഥിരവരുമാനം ലഭിക്കുന്നതിനും താമസസൗകര്യത്തിന് പണം നൽകുന്നതിനും സാധുവായ തെളിവുകൾ സമർപ്പിക്കണം
• ഔദ്യോഗിക സർട്ടിഫിക്കറ്റോടുകൂടിയ ബി1 (B1) നിലവാരത്തിലുള്ള പോളിഷ് ഭാഷാ പ്രാവീണ്യം നേടിയിരിക്കണം

ആവശ്യമായ രേഖകൾ

• പോളിഷ് ഭാഷയിൽ പൂരിപ്പിച്ച രണ്ട് സ്ഥിരം താമസ അപേക്ഷാ ഫോമുകൾ
• പാസ്‌പോർട്ടും അതിൻ്റെ ഫോട്ടോകോപ്പികളും
• ഫോട്ടോകൾ
• പോളിഷ് ഭാഷാ പ്രാവീണ്യം തെളിയിക്കുന്ന സർട്ടിഫിക്കറ്റ്
• വരുമാനം, താമസം, നികുതി അടച്ച രേഖകൾ എന്നിവയുടെ തെളിവുകൾ
• വിവാഹ സർട്ടിഫിക്കറ്റ്, പങ്കാളിയുടെ തിരിച്ചറിയൽ വിവരങ്ങൾ, കുട്ടിയുടെ ജനന സർട്ടിഫിക്കറ്റ് (ബാധകമെങ്കിൽ)
• എല്ലാ രേഖകളും പോളിഷ് ഭാഷയിലേക്ക് വിവർത്തനം ചെയ്തിരിക്കണം

അപേക്ഷിക്കേണ്ട വിധം: ഘട്ടം ഘട്ടമായുള്ള നിർദേശങ്ങൾ

• ഘട്ടം 1: വോയിവോഡ്ഷിപ്പ് ഓഫീസിൽ (Voivodeship Office) ഒരു അപ്പോയിന്റ്മെന്റ് എടുത്ത്, നിയമപരമായ താമസ കാലാവധിക്കുള്ളിൽ സ്ഥിരം താമസ പെർമിറ്റിനായി അപേക്ഷിക്കുക.
• ഘട്ടം 2: എല്ലാ രേഖകളും സമർപ്പിക്കുകയും വിരലടയാളം നൽകുകയും ചെയ്യുക.
• ഘട്ടം 3: 640 പോളിഷ് സ്ലോട്ടി (PLN 640) (ഏകദേശം 15,577 രൂപ) സ്റ്റാമ്പ് ഡ്യൂട്ടി ഉൾപ്പെടെയുള്ള അപേക്ഷാ ഫീസ് അടയ്ക്കുക.
• ഘട്ടം 4: 100 പോളിഷ് സ്ലോട്ടി (PLN 100) (ഏകദേശം 2,434 രൂപ) നൽകി റെസിഡൻസ് കാർഡ് നേടുക. ഇതോടെ താമസത്തിനുള്ള ആകെ ചെലവ് 740 പോളിഷ് സ്ലോട്ടി (PLN 740) (ഏകദേശം 18,011 രൂപ) ആകും.
• ഘട്ടം 5: അപേക്ഷാ നടപടികൾ പൂർത്തിയാകുന്നതുവരെ കാത്തിരിക്കുക. ഇത് സാധാരണയായി ആറ് മുതൽ 12 മാസം വരെ എടുക്കും, എന്നാൽ ഓരോ വ്യക്തിയുടെയും അപേക്ഷ അനുസരിച്ച് ഇതിൽ മാറ്റങ്ങൾ വരാം.
• ഘട്ടം 6: നടപടിക്രമങ്ങൾ പൂർത്തിയായിക്കഴിഞ്ഞാൽ, കാർഡ് ഇഷ്യൂ ചെയ്യുന്നതിനുള്ള ഫീസ് അടച്ച് നിങ്ങളുടെ സ്ഥിരം താമസ പെർമിറ്റ് കൈപ്പറ്റുക.

Content Highlights: Get Polish permanent residency! Learn about eligibility, required documents, application process