ഈ പ്രപഞ്ചം ഒരു തമോഗര്ത്തത്തിനുള്ളിലോ? ഞെട്ടിപ്പിക്കുന്ന കണ്ടെത്തലുമായി ജെയിംസ് വെബ് ദൂരദര്ശിനി
ബഹിരാകാശത്തെ ഓരോ കാഴ്ചകളും മനുഷ്യനെ അതിശയിപ്പിക്കുന്നതാണ്. ബഹിരാകാശത്തെ കുറിച്ചുള്ള പുതിയ ഓരോ കണ്ടെത്തലുകളും ഈ പ്രപഞ്ചത്തില് നാമെവിടെയാണ് എന്നുള്ള ചോദ്യത്തിന്റെ ഉത്തരത്തിലേക്ക് നമ്മെ ഒരു പടി കൂടി അടുപ്പിക്കുന്നു. ഇപ്പോഴിതാ നാസയുടെ ജെയിംസ് വെബ് ബഹിരാകാശ ദൂരദര്ശിനി ഉപയോഗിച്ച് നടത്തിയ ഒരു പുതിയ നിരീക്ഷണം ശാസ്ത്രലോകത്തെ ഞെട്ടിച്ചിരിക്കുകയാണ്. നാം അനുഭവിക്കുന്ന ഈ പ്രപഞ്ചം ഒരു ഭീമന് തമോഗര്ത്തത്തിനുള്ളില് നിലനില്ക്കുന്നതാകാമെന്നാണ് ആ പുതിയ കണ്ടെത്തല്. ഇതുവരെയുള്ള ധാരണകളെ അടിമുടി പുനര്വിചിന്തനം നടത്താന് ശാസ്ത്രജ്ഞരെ പ്രേരിപ്പിക്കുന്ന കണ്ടെത്തലാണിത്.
കാന്സസ് സ്റ്റേറ്റ് യൂണിവേഴ്സിറ്റിയിലെ ഗവേഷകര്, ജെയിംസ് വെബ് ദൂരദര്ശിനി പകര്ത്തിയ ചിത്രങ്ങള് ഉപയോഗിച്ച് 263 പുരാതന ഗാലക്സികളെ പഠനവിധേയമാക്കി. ഈ ഗാലക്സികളില് ചിലത്, മഹാവിസ്ഫോടനത്തിന് (Big Bang) വെറും 300 ദശലക്ഷം വര്ഷങ്ങള്ക്ക് ശേഷം രൂപപ്പെട്ടവയാണ്. പഠനത്തിന്റെ ഫലം അമ്പരപ്പിക്കുന്നതായിരുന്നു. ഈ ഗാലക്സികളില് 60%-വും ഘടികാരദിശയില് (clockwise) കറങ്ങുന്നു!. ഇതുവരെ, ഗാലക്സികള് യാദൃച്ഛികമായി വ്യത്യസ്ത ദിശകളില് കറങ്ങുന്നുവെന്നാണ് ശാസ്ത്രലോകം കരുതിയിരുന്നത്. എന്നാല്, ആ ധാരണയെ തലകീഴായി മാറിക്കുന്നതാണ് ഈ പുതിയ നിരീക്ഷണം.
പ്രപഞ്ചത്തിനൊരു ക്രമമുണ്ട്
നിരവധി ഗാലക്സികള് ഒരേ ദിശയില് കറങ്ങുന്നുവെന്ന കണ്ടെത്തല്, പ്രപഞ്ചത്തിന് നാം കരുതിയതിനേക്കാള് കൂടുതല് കൃത്യമായൊരു ക്രമമുണ്ട് എന്ന് അര്ത്ഥമാക്കുന്നു. ഈ ഗാലക്സികളെല്ലാം ഒരേ ദിശയില് കറങ്ങുന്നതിന് എന്തോ ഒരു ശക്തമായ കാരണം ഉണ്ടായിരിക്കണം. ഈ കണ്ടെത്തല്, പ്രപഞ്ചം എങ്ങനെ രൂപപ്പെട്ടു, എങ്ങനെ വികസിച്ചു എന്ന ചോദ്യങ്ങള്ക്ക് പുതിയ ഉത്തരങ്ങള് കണ്ടെത്താന് ശാസ്ത്രജ്ഞരെ പ്രേരിപ്പിക്കുന്നു.
തമോഗര്ത്തത്തിനുള്ളിലെ പ്രപഞ്ചം
ഈ ഏകീകൃത കറക്കം ഒരു അസാധാരണ സാധ്യതയിലേക്കാണ് വിരല് ചൂണ്ടുന്നത്. നമ്മുടെ പ്രപഞ്ചം ഒരു വലിയ തമോഗര്ത്തത്തിന്റെ (black hole) ഉള്ളില് നിലനില്ക്കുന്നതാകാം! ഈ ആശയം ശരിയാണെങ്കില്, പ്രപഞ്ചനിര്മിതിയെക്കുറിച്ചുള്ള (cosmology) നിലവിലുള്ള എല്ലാ സിദ്ധാന്തങ്ങളും പുനര്വിചിന്തനം ചെയ്യേണ്ടിവരും. പ്രപഞ്ചത്തിന്റെ ഉത്ഭവം, വികാസം, ഘടന എന്നിവയെക്കുറിച്ചുള്ള നമ്മുടെ ധാരണകള് തീര്ത്തും മാറിമറിയും.
ബഹിരാകാശ പഠനത്തിന്റെ പ്രാധാന്യം
ഈ കണ്ടെത്തല് ബഹിരാകാശ പര്യവേഷണത്തിന്റെ പ്രാധാന്യത്തെ ഒന്നുകൂടി അടിവരയിടുന്നു. ജെയിംസ് വെബ് ദൂരദര്ശിനിക്ക്
ദൂരെയുള്ള, പുരാതന ഗാലക്സികളെ അത്യന്തം വ്യക്തതയോടെ ചിത്രീകരിക്കാനുള്ള ശേഷി ഇല്ലായിരുന്നെങ്കില് ഇത്തരമൊരു നിരീക്ഷണം സാധ്യമാകുമായിരുന്നില്ല. ജെയിംസ് വെബ് ദൂരദര്ശിനി പോലുള്ള ഉപകരണങ്ങള് മെച്ചപ്പെടുത്തുന്നതിലൂടെ നമ്മള് പ്രപഞ്ചത്തെ കുറിച്ചുള്ള പുതിയ കണ്ടെത്തലുകളിലേക്ക് അടുക്കുകയാണ്.
വെല്ലുവിളി
എന്നിരുന്നാലും, ഈ നിരീക്ഷണം തീര്ച്ചയായും ശരിയാണെന്ന് പറയാന് വേണ്ടത്ര തെളിവുകള് ഇനിയും ശേഖരിക്കേണ്ടതുണ്ട്. ഗാലക്സികള് ഒരേ ദിശയില് കറങ്ങുന്നതായി തോന്നുന്നത് ഡോപ്ലര് ഇഫക്ട് പോലുള്ള ഒപ്റ്റിക്കല് പ്രതിഭാസങ്ങള് മൂലമാകാമെന്നും ചില ശാസ്ത്രജ്ഞര് മുന്നറിയിപ്പ് നല്കുന്നു. ഈ സാധ്യത പരിശോധിക്കാന് ജെയിംസ് വെബ് ദൂരദര്ശിനി കൂടുതല് വിശദമായ നിരീക്ഷണങ്ങള് നടത്തേണ്ടതുണ്ട്. ഗാലക്സികളുടെ കറക്കത്തിന്റെ കൃത്യമായ സ്വഭാവവും അതിന് പിന്നിലെ ശക്തികളും മനസ്സിലാക്കാന് ഈ നിരീക്ഷണങ്ങള് അനിവാര്യമാണ്.
Content Highlights: James Webb Telescope`s Shocking Discovery: Universe Inside a Black Hole?