കഴിഞ്ഞ അഞ്ച് വർഷത്തിലേറെയായി ഞങ്ങൾ കാത്തിരിപ്പാണ്! റിലയൻസിന് മറുപടിയുമായി സ്റ്റാർലിങ്ക്

ഇന്ത്യൻ ടെലികോം വിപണിയെയും റിലയൻസ് ഇൻഡസ്ട്രീസ് ചെയർമാൻ മുകേഷ് അംബാനിയെയും വിമർശിച്ചുകൊണ്ട് ഇലോൺ മസ്ക് രംഗത്തെത്തിയതിന് പിന്നാലെ, റിലയൻസിന്റെ പ്രസ്താവനയ്ക്ക് മറുപടിയുമായി സ്റ്റാർലിങ്ക്. ആവശ്യമായ സർക്കാർ അനുമതികൾ നേടുന്നതിനായി കഴിഞ്ഞ അഞ്ച് വർഷത്തിലേറെയായി ഇന്ത്യൻ റെഗുലേറ്റർമാർ, വ്യവസായ മേഖല, ടെലികോം ഓപ്പറേറ്റർമാർ എന്നിവരുമായി ചേർന്ന് പ്രവർത്തിച്ചുവരികയാണെന്ന് കമ്പനി വ്യക്തമാക്കി.

ഇന്ത്യയിലെ ഉപയോക്താക്കൾക്കായി രാജ്യത്തിനകത്ത് തന്നെ പ്രത്യേക  അടിസ്ഥാനസൗകര്യങ്ങളും ഗേറ്റ്‌വേകളും ഒരുക്കിയിട്ടുണ്ടെന്നും സ്റ്റാർലിങ്ക് അറിയിച്ചു. ഇന്ത്യൻ ഇന്റർനെറ്റ് ട്രാഫിക് സുരക്ഷിതമായി കൈകാര്യം ചെയ്യുന്നതിനാവശ്യമായ സംവിധാനങ്ങളും സജ്ജമാക്കിയിട്ടുണ്ട്. ഇതെല്ലാം സർക്കാർ അനുമതിയോടെ തന്നെയാണെന്നും രാജ്യത്തെ ഹൈസ്പീഡ് ഇന്റർനെറ്റ് സേവനങ്ങളുമായി ബന്ധിപ്പിക്കാൻ സ്റ്റാർലിങ്ക് തയ്യാറാണെന്നും കമ്പനി വ്യക്തമാക്കി.

മസ്കിന്റെ വിമർശനം

ഇന്ത്യയിൽ ഉപഗ്രഹ ഇന്റർനെറ്റ് സേവനം ആരംഭിക്കുന്നതിന് നേരിടുന്ന തടസങ്ങളെ വിമർശിച്ച് മസ്ക് എക്സിൽ പോസ്റ്റ് പങ്കുവെച്ചതോടെയാണ് വിവാദം തുടങ്ങിയത്. 'അംബാനിയാണോ ഇന്ത്യയുടെ യഥാർഥ ബോസ്?' എന്നായിരുന്നു മസ്കിന്റെ ചോദ്യം.

165-ലേറെ രാജ്യങ്ങളിൽ സ്റ്റാർലിങ്കിന് പ്രവർത്തനാനുമതിയുണ്ടെന്നും ഇന്ത്യയിലെ നിയമങ്ങളും സർക്കാർ നിബന്ധനകളും പാലിക്കുന്നതിനായി അഞ്ച് വർഷമായി ശ്രമിച്ചുവരികയാണെന്നും മസ്ക് അവകാശപ്പെട്ടു. എന്നിട്ടും ഇന്ത്യയിൽ പ്രവർത്തിക്കാനുള്ള ലൈസൻസ് ലഭിക്കാത്തത് എന്തുകൊണ്ടാണെന്നും അദ്ദേഹം ചോദിച്ചിരുന്നു.‌

റിലയൻസിന്റെ മറുപടി

മസ്കിന്റെ വിമർശനങ്ങൾക്ക് മറുപടിയായി ഒക്ടോബർ 16-നാണ് റിലയൻസ് ഇൻഡസ്ട്രീസ് ഔദ്യോഗിക പ്രസ്താവന പുറത്തിറക്കിയത്. വിപണിയിലെ മത്സരത്തെ ഭയപ്പെടുന്നില്ലെന്നും ജനങ്ങളുടെ ജീവിതനിലവാരം മെച്ചപ്പെടുത്തുന്ന ആഭ്യന്തര, അന്തർദേശീയ നിക്ഷേപങ്ങളെയും നൂതന സാങ്കേതികവിദ്യകളെയും സ്വാഗതം ചെയ്യുന്ന ഇന്ത്യയിലാണ് റിലയൻസ് വളർന്നതെന്നും കമ്പനി വ്യക്തമാക്കി.

എന്നാൽ, ഈ തുറന്ന സമീപനം നിയമങ്ങളിലും ചട്ടങ്ങളിലും അധിഷ്ഠിതമാണെന്ന് റിലയൻസ് ചൂണ്ടിക്കാട്ടി. ഇന്ത്യൻ കമ്പനികളായാലും വിദേശ കമ്പനികളായാലും ഉപഗ്രഹ സേവനങ്ങൾക്ക് അനുമതി തേടുന്ന എല്ലാ അപേക്ഷകർക്കും ഒരേ നടപടിക്രമങ്ങളാണ് സർക്കാർ പിന്തുടരുന്നതെന്നും കമ്പനി പറഞ്ഞു. ജിയോയുടെ സ്വന്തം ഉപഗ്രഹ ഇന്റർനെറ്റ് സേവനവും ആവശ്യമായ അനുമതികൾക്കായി കാത്തിരിക്കുകയാണെന്നും റിലയൻസ് കൂട്ടിച്ചേർത്തു.

Content Highlights: Starlink has responded to Elon Musk's criticism of the Indian telecom sector by confirming that it has spent over five years working with regulators to secure necessary approvals and set up local infrastructure for secure internet traffic.