21,000 ജീവനക്കാരെ പിരിച്ചുവിട്ടു; ഒറാക്കിൾ എഐയിലും ക്ലൗഡ് സേവനങ്ങളിലും നിക്ഷേപം വർധിപ്പിക്കുന്നു

പ്രമുഖ ക്ലൗഡ് കമ്പ്യൂട്ടിങ് കമ്പനിയായ ഒറാക്കിൾ 2026 സാമ്പത്തിക വർഷത്തിൽ പിരിച്ചുവിട്ടത് 21,000 ജീവനക്കാരെ. കമ്പനിയുടെ മൊത്തം തൊഴിലാളികളുടെ 13 ശതമാനത്തോളം വരുമിത്. ആർട്ടിഫിഷ്യൽ ഇന്റലിജൻസ് (AI) സാങ്കേതികവിദ്യയുടെ വ്യാപകമായ ഉപയോഗവും കമ്പനിയുടെ പ്രവർത്തനങ്ങളിലെ പുനഃസംഘടനയുമാണ് ഈ വൻപിരിച്ചുവിടലിന് പ്രധാന കാരണമായി ചൂണ്ടിക്കാണിക്കപ്പെടുന്നത്.

റിപ്പോർട്ടുകളനുസരിച്ച്, കഴിഞ്ഞ വർഷം ഇതേസമയത്ത് 1,62,000 ജീവനക്കാരുണ്ടായിരുന്ന കമ്പനിയിൽ, 2026 മേയ് 31-ലെ കണക്കുകൾ പ്രകാരം ജീവനക്കാരുടെ എണ്ണം 1,41,000 ആയി കുറഞ്ഞു. പിരിച്ചുവിട്ട ജീവനക്കാർക്കുള്ള ആനുകൂല്യങ്ങൾക്കും (severance payments) മറ്റ് ചെലവുകൾക്കുമായി 1.84 ബില്യൺ ഡോളറാണ് ഒറാക്കിൾ ചെലവാക്കിയത്. മുൻ സാമ്പത്തിക വർഷത്തിൽ ഈ ചെലവ് 374 ദശലക്ഷം ഡോളർ മാത്രമായിരുന്നു എന്നതിൽനിന്ന് ഈ വർഷത്തെ പിരിച്ചുവിടലിന്റെ വ്യാപ്തി വ്യക്തമാണ്.

എഐയുടെ കടന്നുവരവിന് പുറമെ മാനേജ്‌മെന്റിലും ഉൽപ്പന്നങ്ങളിലുമുള്ള മാറ്റങ്ങൾ, ജീവനക്കാരുടെ പ്രകടനത്തിലെ പ്രശ്നങ്ങൾ, തന്ത്രപരമായ മാറ്റങ്ങൾ, മറ്റ് കമ്പനികളെ ഏറ്റെടുക്കൽ എന്നിവയും പിരിച്ചുവിടലിന് കാരണമായി കമ്പനി വ്യക്തമാക്കിയിട്ടുണ്ട്.

ജീവനക്കാരുടെ എണ്ണം വെട്ടിക്കുറയ്ക്കുമ്പോഴും ആർട്ടിഫിഷ്യൽ ഇന്റലിജൻസ്, ക്ലൗഡ് ഇൻഫ്രാസ്ട്രക്ചർ എന്നീ മേഖലകളിൽ വൻനിക്ഷേപമാണ് ഒറാക്കിൾ നടത്തുന്നത്. ക്ലൗഡ് കമ്പ്യൂട്ടിങ് വിപണിയിലെ പ്രധാന എതിരാളികളായ ആമസോൺ, മൈക്രോസോഫ്റ്റ് എന്നിവയോട് മത്സരിക്കുന്നതിനായി ഓപ്പൺഎഐ (OpenAI), മെറ്റ (Meta) എന്നീ വമ്പൻ കമ്പനികളുമായി ഒറാക്കിൾ പുതിയ ഡാറ്റാ സെന്റർ കരാറുകളിൽ ഒപ്പുവെച്ചിട്ടുണ്ട്.

ഈ സാമ്പത്തിക വർഷത്തിൽ ഏകദേശം 70 ബില്യൺ ഡോളറിന്റെ മൂലധനച്ചെലവാണ് ഒറാക്കിൾ പ്രതീക്ഷിക്കുന്നത്. ഈ തുക കണ്ടെത്തുന്നതിനായി ഓഹരികളിലൂടെയും കടപ്പത്രങ്ങളിലൂടെയും 40 ബില്യൺ ഡോളർ സമാഹരിക്കാൻ കമ്പനി ലക്ഷ്യമിടുന്നു. ഇതിൽ നേരത്തെ പ്രഖ്യാപിച്ച 20 ബില്യൺ ഡോളറിന്റെ ഓഹരി വിൽപ്പനയും ഉൾപ്പെടുന്നു.

എഐ സാങ്കേതികവിദ്യയുടെ അമിതമായ ഉപയോഗം ഐടി മേഖലയിൽ വലിയ തോതിലുള്ള തൊഴിൽനഷ്ടത്തിന് കാരണമാകുന്നുണ്ടെന്ന ആശങ്ക നിലവിൽ ശക്തമാണ്. ലേഓഫ് ട്രാക്കിംഗ് വെബ്സൈറ്റായ Layoffs.fyi-ന്റെ കണക്കുകൾ പ്രകാരം, ഈ വർഷം ഇതുവരെ 196 ടെക് കമ്പനികളിലായി 1,19,800-ലധികം ആളുകൾക്ക് ജോലി നഷ്ടപ്പെട്ടിട്ടുണ്ട്.

Content Highlights: Oracle has laid off approximately 21,000 employees—about 13% of its workforce—in FY 2026 due to extensive AI integration and corporate restructuring, even as the company invests heavily in new cloud infrastructure and partnerships.