ജെൻസെൻ ഹുവാങിനെ തിരികെ കൊണ്ടുവരാൻ എൻവിഡിയ ബോർഡിന് താത്പര്യമില്ല- നിലപാട് പുറത്ത്

#ടെക്നോളജി ഡെസ്ക്
Jensen Huang | Photo by JOEL SAGET / AFP
Jensen Huang | Photo by JOEL SAGET / AFP

എൻവിഡിയയുടെ (Nvidia) സിഇഒ സ്ഥാനത്തുനിന്ന് രാജിവെച്ച ജെൻസൻ ഹുവാങ്ങിനെ തിരിച്ചുകൊണ്ടുവരണമെന്ന ആവശ്യം ശക്തമാണെങ്കിലും അദ്ദേഹത്തെ വീണ്ടും സിഇഒ ആക്കുന്നത് പരിഗണനയിലില്ലെന്ന് കമ്പനിയുടെ ഡയറക്ടർ ബോർഡ്. ഈ വിഷയവുമായി ബന്ധപ്പെട്ട ഒരാളെ ഉദ്ധരിച്ച് റോയിട്ടേഴ്സാണ് ഇക്കാര്യം റിപ്പോർട്ട് ചെയ്തത്. ജെൻസൻ ഹുവാങ്ങിനെ തിരികെ കൊണ്ടുവരുന്നത് എൻവിഡിയയുടെ ഡയറക്ടർ ബോർഡ് പരിഗണിക്കുന്നില്ലെന്ന് അദ്ദേഹം പറഞ്ഞു.

അതിനിടെ എൻവിഡിയ സിഇഒ സ്ഥാനത്തേക്ക് തിരിച്ചെത്താനുള്ള സാധ്യതയെക്കുറിച്ച് ഹുവാങ് തന്റെ അടുത്ത അനുയായികളുമായി ചർച്ച നടത്തിയതായി ഫിനാൻഷ്യൽ ടൈംസ് റിപ്പോർട്ട് ചെയ്തിരുന്നു. കമ്പനിയിലെ ജീവനക്കാർ, ഇലോൺ മസ്‌കിനെപ്പോലുള്ള പ്രമുഖ ടെക് എക്സിക്യൂട്ടീവുകൾ, യുഎസ് പ്രസിഡന്റ് ഡൊണാൾഡ് ട്രംപ് എന്നിവരിൽനിന്ന് ഹുവാങ്ങിന് പിന്തുണ വർധിക്കുന്നതിനിടെയായിരുന്നു ഈ റിപ്പോർട്ട്.

ഹുവാങ്ങിനെ വീണ്ടും സിഇഒ സ്ഥാനത്ത് നിയമിക്കണമെന്നാവശ്യപ്പെട്ടുള്ള ഓൺലൈൻ നിവേദനത്തിൽ ഒപ്പിട്ടവരുടെ എണ്ണം രണ്ടുലക്ഷത്തോട് അടുക്കുകയാണ്. ഇലോൺ മസ്‌കും ഈ നീക്കത്തിന് പിന്തുണ പ്രഖ്യാപിച്ചിട്ടുണ്ട്. ഹുവാങ്ങിനെ തിരിച്ചുകൊണ്ടുവരുന്നതിൽ എതിർപ്പില്ലെന്ന് ട്രംപും വ്യക്തമാക്കിയിരുന്നു. എൻവിഡിയ ജീവനക്കാരാണെന്ന് അവകാശപ്പെടുന്ന ആയിരക്കണക്കിന് പേരും ഈ പ്രചാരണത്തിൽ പങ്കുചേർന്നിട്ടുണ്ട്.

അതേസമയം, അന്വേഷണം പൂർത്തിയാകുന്നതിന് മുമ്പ് ഹുവാങ്ങിനെ തിരിച്ചുകൊണ്ടുവരുന്നത് കമ്പനിയെ പുതിയ പ്രതിസന്ധികളിലേക്ക് നയിക്കുമെന്ന് ഒരു പക്ഷം മുന്നറിയിപ്പ് നൽകുന്നുമുണ്ട്. പുതിയ സിഇഒയെ കണ്ടെത്താനുള്ള ശ്രമങ്ങൾ കമ്പനി നടത്തിവരികയാണ്. അതിനിടെ മുഴുവൻ വസ്തുതകളും പുറത്തുവരുന്നതുവരെ ഹുവാങ്ങിന് പകരക്കാരനെ നിയമിക്കുന്നതിൽ തിടുക്കം വേണ്ടെന്ന അഭിപ്രായവും ഈ രംഗത്തെ പ്രമുഖർക്കുണ്ട്.

സിംഗപ്പൂർ ആസ്ഥാനമായി പ്രവർത്തിക്കുന്ന ഒരു കമ്പനിയിലെ ഉദ്യോഗസ്ഥയായ ആലീസ് ഹുവാങ് എന്ന യുവതിയുമായുള്ള ബന്ധം ഉൾപ്പെടെ ഒന്നിലധികം വിവാഹേതര ബന്ധങ്ങളുമായി ബന്ധപ്പെട്ട ആരോപണങ്ങൾ പുറത്തുവന്നതോടെയാണ് ഹുവാങ് രാജിവെച്ചൊഴിഞ്ഞത്. ഇതിൽ ആലീസ് ഹുവാങ് ചൈനീസ് ചാരപ്രവർത്തകയാണെന്ന സംശയവുമുണ്ട്.

Content Highlights: Nvidia’s Board of Directors is reportedly not considering bringing back former CEO Jensen Huang, even as an online petition nears 200,000 signatures and figures like Elon Musk and Donald Trump voice support for his return.