ചരക്ക് ഡ്രോണുകള് വികസിപ്പിക്കാന് വ്യോമസേന; 300 കിലോ ഭാരം വഹിക്കും. 500 കിലോമീറ്റര് ദൂരപരിധി
തിരുവനന്തപുരം: ദ്വീപുകള് കേന്ദ്രീകരിച്ചുള്ള സമുദ്രവ്യാപാരരംഗത്ത് നിര്ണായക ചുവടുവെപ്പുമായി ഇന്ത്യന് വ്യോമസേന. കൂടുതല് ദൂരം സഞ്ചരിക്കാനും വലിയ ഭാരം വഹിക്കാനും ശേഷിയുള്ള അത്യാധുനിക ഡ്രോണുകള് വ്യോമസേന വികസിപ്പിക്കുകയാണ്. വ്യോമസേനയുടെ മെഹര് ബാബ കോംപറ്റീഷന്(എംബിസി) പദ്ധതിയില് ഉള്പ്പെടുത്തി ഇത്തരത്തില് വികസിപ്പിക്കുന്ന നാലാം തലമുറയെന്നു വിശേഷിപ്പിക്കാവുന്ന ഡ്രോണുകളാണിത്.
ഈ ഇനത്തിലുള്ള മറ്റ് ഡ്രോണുകളെ അപേക്ഷിച്ച് ഏറ്റവും ആധുനികമായതും വ്യത്യസ്ത സവിശേഷതകളും ഉള്ക്കൊണ്ടാണ് എംബിസി-4 അഥവാ ഓവര് ദ സീ കാര്ഗോ ഡ്രോണ്സ് വിഭാഗത്തില്പ്പെട്ട ഈ ഡ്രോണ് വികസിപ്പിക്കുന്നത്. 300 കിലോ ഭാരം വഹിക്കാനുള്ള കഴിവും 500 കിലോമീറ്റര് ദൂരപരിധിവരെ പറക്കാന് പറ്റുന്നതുമാണ് ഇതിന്റെ പ്രത്യേകത.
ഒറ്റയാത്രയില് അഞ്ചു മണിക്കൂര്വരെ പറക്കാം. ആഭ്യന്തര വ്യാപാരം കൂടുതല് ശക്തിപ്പെടുത്താന് ഇവ സഹായകമാകും. ലക്ഷദ്വീപ്, മിനിക്കോയ് ദ്വീപുകളിലെ വ്യാപാരങ്ങള്ക്ക് ഏറെ ഗുണംചെയ്യും. ഇതുമായി ബന്ധപ്പെട്ട് നടത്തുന്ന ചര്ച്ചകള് പൂര്ത്തിയാകുന്നതോടെ ലാബ് പരീക്ഷണവും
രൂപരേഖ തയ്യാറാക്കലും തുടര്ന്ന് ഉത്പാദനത്തിലേക്കും വൈകാതെ കടക്കാമെന്നാണ് പ്രതീക്ഷ. മൂന്നുവര്ഷംകൊണ്ട് ഡ്രോണുകളുടെ നിര്മാണം പൂര്ത്തിയാക്കി വിപണിയില് എത്തിക്കാന് കഴിയുമെന്നാണ് വ്യോമസേനാ അധികൃതര് പറയുന്നത്. ഡ്രോണുകള് നിര്മിക്കാനായി നൂറിലേറെ സ്റ്റാര്ട്ടപ് കമ്പനികളാണ് ഇതിനോടകം താത്പര്യം പ്രകടിപ്പിച്ചിട്ടുള്ളത്.
മരുന്നുകള്, പച്ചക്കറി, നിത്യോപയോഗസാധനങ്ങള് എന്നിവയടക്കം ദ്വീപുകളില് എത്തിക്കാന് കഴിയും. ഇതോടൊപ്പം ആയുധങ്ങള് സംഭരിക്കാനും കഴിയുന്നതരത്തിലാണ് ഇതിന്റെ നിര്മാണം. ഇന്ത്യയില് സമുദ്രവ്യാപാരമേഖലയുമായി ബന്ധപ്പെട്ട പശ്ചാത്തലസൗകര്യങ്ങള്ക്കു വഴിയൊരുക്കാനും ഈ രംഗത്ത് രാജ്യത്തിന്റെ മത്സരക്ഷമത വര്ധിപ്പിക്കാനും സാധിക്കുകയെന്നതാണ് പദ്ധതിയുടെ ഉദ്ദേശ്യമെന്ന് വ്യോമസേനാ സഹമേധാവി എയര് മാര്ഷല് നര്മ്ദേശ്വര് തിവാരി പറഞ്ഞു.
Content Highlights: IAF develops advanced drones for island trade, capable of carrying 300kg for 500km. Boosts domestic trade & infrastructure for Lakshadweep & Minicoy.