‘നീ മരിച്ചോ ?’ എന്ന പേരിൽ ആപ്പ്സ്റ്റോറുകളിൽ വൈറലായി ചൈനീസ് ആപ്പ്, കാരണമറിയാം

‘നീ മരിച്ചോ ?’ (Are you dead?) എന്ന പേരുള്ള ഒരു സുരക്ഷാ ആപ്പ് ചൈനയിൽ വലിയ തരംഗമായി മാറിയിരിക്കുകയാണ്. കഴിഞ്ഞ വർഷം മേയിൽ പുറത്തിറക്കിയ ആപ്പ് ഒറ്റയ്ക്ക് താമസിക്കുന്നവരുടെ ക്ഷേമം ഉറപ്പാക്കുകയെന്ന ലക്ഷ്യത്തോടെയാണ് ചൈനീസ് ഭാഷയിൽ ‘സൈലെമെ’ (Sileme) എന്ന് വിളിക്കപ്പെടുന്ന ഈ ആപ്പ് ഒരുക്കിയിട്ടുള്ളത്. ‘സൈലെമെ’ എന്നാൽ ‘നിങ്ങൾ മരിച്ചോ?’ എന്നാണർത്ഥം. എന്നാൽ ഇതിന്റെ പ്രവർത്തനരീതി ചൈനീസ് ജനതയ്ക്കിടയിൽ വലിയ ജനപ്രീതി പിടിച്ചുപറ്റി. ഇതോടെ രാജ്യത്ത് ഏറ്റവും കൂടുതൽ ഡൗൺലോഡ് ചെയ്യപ്പെട്ട പെയ്ഡ് ആപ്പായി ഇത് മാറി.

ഈ ആപ്പ് ഉപയോഗിക്കുന്നവർ ഓരോ 48 മണിക്കൂറിലും ആപ്പിലെ വലിയൊരു പച്ച ബട്ടനിൽ ടാപ്പ് ചെയ്തിരിക്കണം. ഈ സമയത്തിൽ ബട്ടൻ അമർത്താതിരുന്നാൽ ഉപഭോക്താവ് അപകടത്തിലാണെന്നറിയിച്ച് എമർജൻസി കോൺടാക്ട് നമ്പറുകളിലേക്ക് സ്വയമേവ അറിയിപ്പ് പോവും.

ചൈനയ്ക്ക് പുറത്ത് ഡെമുമു എന്ന പേരിലാണ് ഈ ആപ്പ് ലിസ്റ്റ് ചെയ്തിരിക്കുന്നത്. തുടക്കത്തിൽ സൗജന്യമായിരുന്ന ഈ ആപ്പ് ഏകദേശം 99 രൂപയോളം ഇപ്പോൾ ഇടാക്കുന്നുണ്ട്. ബിബിസിയുടെ (BBC) റിപ്പോർട്ട് പ്രകാരം, യുഎസ്, സിംഗപ്പൂർ, ഹോങ്കോംഗ് എന്നിവിടങ്ങളിലെ പെയ്ഡ് യൂട്ടിലിറ്റി ആപ്പുകളുടെ പട്ടികയിൽ നിലവിൽ ആദ്യ രണ്ട് സ്ഥാനങ്ങളിൽ ഈ ആപ്പ് ഇടംപിടിച്ചിട്ടുണ്ട്. ഓസ്‌ട്രേലിയയിലും സ്‌പെയിനിലും നാലാം സ്ഥാനത്താണ് ആപ്പ്.

ചൈനയിൽ സമീപകാലങ്ങളിലായി ആളുകൾ ഒറ്റയ്ക്ക് താമസിക്കുന്ന രീതി വ്യാപിച്ചുവരികയാണ്. ഈ കാരണത്താലാണ് ആപ്പിന് ഇത്രയേറെ ജനപ്രീതി ലഭിക്കാൻ കാരണമെന്നാണ് ഗ്ലോബൽ ടൈംസ് റിപ്പോർട്ട് ചെയ്യുന്നത്. ഒരാൾ മാത്രം താമസിക്കുന്ന വീടുകളുടെ എണ്ണം 2030 ഓടെ 20 കോടി ആയി ഉയരുമെന്നാണ് കണക്കാക്കപ്പെടുന്നത്.

ഈ ആപ്പ് ഉപയോഗിക്കാൻ രജിസ്ട്രേഷനോ സൈൻ അപ്പ് ചെയ്യുകയോ വേണ്ട. കോൺടാക്ട് വിവരങ്ങളുടെ സ്വകാര്യത ഉറപ്പാക്കാൻ എൻക്രിപ്ഷൻ സുരക്ഷയും ഒരുക്കിയിട്ടുണ്ട്. മൂന്നംഗസംഘമാണ് ആപ്പിന് പിന്നിലെന്നും റിപ്പോർട്ടുകൾ പറയുന്നു.

Content Highlights: ‘Are You Dead?’: Why China's Sileme App is Trending Among People Living Alone