മണിക്കൂറുകൾക്കുള്ളിൽ പുതിയ ഗൂഗിൾ പിക്സൽ 11 സീരീസെത്തും, എന്തെല്ലാം പുതുമകൾ പ്രതീക്ഷിക്കാം ?

സാംസങിന് പിന്നാലെ തങ്ങളുടെ ഫ്ലാഗ്ഷിപ്പ് സ്മാർട്ഫോൺ മോഡലുകൾ പുറത്തിറക്കാനൊരുങ്ങുകയാണ് ഗൂഗിൾ. ഓഗസ്റ്റ് 12-ന് ന്യൂയോർക്കിൽ വെച്ച് നടക്കുന്ന 'മേഡ് ബൈ ഗൂഗിൾ' ഇവന്റിൽ പുതിയ പിക്സൽ 11 സീരീസ് ഫോണുകൾ ഗൂഗിൾ അവതരിപ്പിക്കുമെന്നാണ് പ്രതീക്ഷിക്കുന്നത്. ഈ സീരീസിൽ പിക്സൽ 11 , പിക്സൽ 11 പ്രോ , പിക്സൽ 11 പ്രോ എക്സ് എൽ, പിക്സൽ 11 പ്രോ ഫോൾഡ് എന്നീ നാല് മോഡലുകൾ ഉണ്ടാകുമെന്നാണ് വിവരം.

ഈ ഫോണുകളിൽ പ്രതീക്ഷിക്കുന്ന പ്രധാന സവിശേഷതകളും അപ്‌ഗ്രേഡുകളും താഴെ പറയുന്നവയാണ്:

• ടെൻസർ ജി6 പ്രൊസസ്സറും പെർഫോമൻസും: പിക്സൽ 11 സീരീസിലെ നാല് ഫോണുകളിലും പുതിയ ടെൻസർ ജി6 പ്രൊസസ്സർ ആയിരിക്കും ഉപയോഗിക്കുക. ഇത് TSMC-യുടെ 2nm സാങ്കേതികവിദ്യയിലാണ് നിർമിച്ചിരിക്കുന്നതെന്നും മികച്ച ഗ്രാഫിക്സിനായി പുതിയ PowerVR GPU-വും മീഡിയാടെക് M90 മോഡവും ഇതിൽ ഉപയോഗിക്കുമെന്നും പറയപ്പെടുന്നു. കൂടാതെ ഈ ഫോണുകൾ ആൻഡ്രോയിഡ് 17 അപ്‌ഡേറ്റോടുകൂടിയായിരിക്കും വിപണിയിലെത്തുക.

• ഹൈലൈറ്റ് എൽഇഡി: ഫോണിന്റെ ക്യാമറ ബാറിൽ "HiLight" എന്ന പുതിയ മൾട്ടികളർ എൽഇഡി മോഡ്യൂൾ നൽകിയേക്കും. നോട്ടിഫിക്കേഷനുകൾ വരുമ്പോഴും, ചാർജ് ചെയ്യുമ്പോഴും, ജെമിനി AI ഉപയോഗിക്കുമ്പോഴും ഈ ലൈറ്റുകൾ പ്രകാശിക്കും.

• ഡിസ്‌പ്ലേയിലെ മാറ്റങ്ങൾ: ബേസ് മോഡലായ പിക്സൽ 11-നും പിക്സൽ 11 പ്രോയ്ക്കും 120Hz റിഫ്രഷ് റേറ്റുള്ള 6.3 ഇഞ്ച് ഒഎൽഇഡി (OLED) സ്ക്രീൻ ഉണ്ടായിരിക്കും. പിക്സൽ 11 പ്രോ എക്സ് എല്ലിന് വലിയ 6.8 ഇഞ്ച് ഡിസ്‌പ്ലേയുണ്ടാകും. ഫോൾഡബിൾ ഫോണായ പിക്സൽ 11 പ്രോ ഫോൾഡിന് 6.5 ഇഞ്ച് ഔട്ടർ ഡിസ്‌പ്ലേയും എട്ട് ഇഞ്ച് ഇന്നർ ഡിസ്‌പ്ലേയും ഉണ്ടായിരിക്കും. ഇത് മുൻപത്തേക്കാൾ കൂടുതൽ കനം കുറഞ്ഞതും ഈടുള്ളതുമായിരിക്കുമെന്നാണ് വിവരം.

• ക്യാമറ സവിശേഷതകൾ: പിക്സൽ 11-ൽനിന്ന് ടെലിഫോട്ടോ ക്യാമറ ഒഴിവാക്കി പകരം 48MP പ്രധാന ക്യാമറയും 13MP അൾട്രാ-വൈഡ് ക്യാമറയും നൽകിയേക്കും. എങ്കിലും ഇതിൽ 30x സൂപ്പർ റെസ് സൂം ലഭ്യമായിരിക്കും. പിക്സൽ 11 പ്രോ, പ്രോ എക്സ് എൽ മോഡലുകളിൽ ക്യാമറകൾ കൂടുതൽ മെച്ചപ്പെടുത്തിയിട്ടുണ്ടാകും. ഇതിലൂടെ മികച്ച ക്വാളിറ്റിയുള്ള ഫോട്ടോകൾ പകർത്താനാവും. ഒപ്പം 120x AI-അസിസ്റ്റഡ് സൂം സൗകര്യവും ലഭിക്കുമെന്നും പ്രതീക്ഷിക്കുന്നു.

• റാം, സ്റ്റോറേജ് വിവരങ്ങൾ: ഗൂഗിൾ ഈ തവണ കുറഞ്ഞ സ്റ്റോറേജായ 128GB ഒഴിവാക്കി 256GB അടിസ്ഥാന സ്റ്റോറേജായി നൽകാൻ സാധ്യതയുണ്ട്. ഗൂഗിളിന്റെ ജെമിനി AI സുഗമമായി പ്രവർത്തിക്കാൻ പ്രോ മോഡലുകളിൽ മികച്ച റാം ശേഷിയുണ്ടാകും. എങ്കിലും ബേസ് മോഡലുകളിൽ ചിലപ്പോൾ 12GB റാം ആയിരിക്കും ഉണ്ടാകുക. പ്രോ ഫോൾഡ് മോഡൽ 1TB സ്റ്റോറേജ്‌വരെ ലഭ്യമാകും.

• ബാറ്ററിയും ചാർജിങ്ങും: പിക്സൽ 11-ൽ 4,985mAh ബാറ്ററിയും പ്രോ എക്സ് എല്ലിൽ വലിയ 5,115mAh ബാറ്ററിയും പ്രതീക്ഷിക്കുന്നു. പ്രോ എക്സ് എൽ മോഡലിന് 45W ചാർജിങ്ങും പ്രോ ഫോൾഡിന് 30W ചാർജിങ്ങും ലഭിച്ചേക്കും. കൂടാതെ പ്രോ, ഫോൾഡ് മോഡലുകളിൽ Qi2 വയർലെസ് ചാർജിങ് പിന്തുണയ്ക്കുമെന്നും പറയപ്പെടുന്നു.

• പുതിയ നിറങ്ങൾ: പിക്സൽ 11 ഫോണുകൾ ഹിബിസ്കസ്, പിസ്റ്റാച്ചിയോ, ഒലീവ്, കാന്യോൺ തുടങ്ങിയ ആകർഷകമായ പുതിയ നിറങ്ങളിൽ വിപണിയിലെത്തും. ഫോൾഡ് മോഡലിൽ പുതിയ ഗോൾഡ് ഷേഡും പ്രതീക്ഷിക്കുന്നുണ്ട്.

• വിലവർധന: മുൻവർഷത്തെ ഫോണുകളെ അപേക്ഷിച്ച് ഈ സീരീസിലെ ഫോണുകൾക്ക് ഏകദേശം $100 മുതൽ $400 വരെ വില വർധിക്കാൻ സാധ്യതയുണ്ട്. ഇന്ത്യയിൽ അടിസ്ഥാന പിക്സൽ 11 മോഡലിന് ഏകദേശം ₹89,999-ഉം പ്രോ ഫോൾഡ് മോഡലിന് ₹1.8 ലക്ഷത്തോളവും വില പ്രതീക്ഷിക്കുന്നു.

ഇവയോടൊപ്പം പിക്സൽ വാച്ച് അഞ്ച്, ആപ്പിളിന്റെ എയർടാഗിന് സമാനമായ പിക്സൽ ടാഗ് ട്രാക്കർ എന്നിവയും ഈ ചടങ്ങിൽ ഗൂഗിൾ പുറത്തിറക്കുമെന്ന് കരുതപ്പെടുന്നു. ന്യൂയോർക്കിലെ ലോഞ്ചിനുശേഷം 24 മണിക്കൂറുകൾക്കുള്ളിൽത്തന്നെ ഇവ ഇന്ത്യൻ വിപണിയിലും എത്തും.

Content Highlights: Google is set to unveil its flagship Pixel 11 series—featuring four models powered by the 2nm Tensor G6 processor and Android 17—alongside the Pixel Watch 5 at the 'Made by Google' event in New York on August 12.