കോമൺവെൽത്ത് ടേബിൾ ടെന്നീസ് ചാമ്പ്യൻഷിപ്പ്; ഇന്ത്യയുടെ പുരുഷ-വനിതാ ടീമുകൾ ഫൈനലിൽ

ഗ്ലാസ്‌ഗോ: ഇരുപത്തിരണ്ടാമത് കോമൺവെൽത്ത് ടേബിൾ ടെന്നീസ് ചാമ്പ്യൻഷിപ്പിൽ ഇന്ത്യയുടെ പുരുഷ-വനിതാ ടീമുകൾ ഫൈനലിൽ. സെമി ഫൈനലിൽ ശക്തരായ ഇംഗ്ലണ്ടിനെ പരാജയപ്പെടുത്തിയാണ് ഇരു ടീമുകളും കലാശപ്പോരാട്ടത്തിന് യോഗ്യത നേടിയത്.

പുരുഷ ടീം എതിരില്ലാത്ത മൂന്ന് സെറ്റുകൾക്ക് വിജയിച്ചപ്പോൾ, വനിതാ ടീം 3-1 എന്ന സ്‌കോറിനാണ് വിജയം നേടിയത്. മാനവ് തക്കറും മാനുഷ് ഷായും പുരുഷന്മാരുടെ മത്സരത്തിൽ തിളങ്ങിയപ്പോൾ, ശ്രീജ അകുലയുടെ മികച്ച പ്രകടനമാണ് വനിതകളുടെ വിജയം ഉറപ്പാക്കിയത്. കലാശപ്പോരിൽ മലേഷ്യയാണ് ഇരു വിഭാഗങ്ങളിലും ഇന്ത്യയുടെ എതിരാളി.

ടോപ് സീഡായ ഇന്ത്യൻ പുരുഷ ടീം ഒരു മത്സരം പോലും വിട്ടുകൊടുക്കാതെ 3-0 എന്ന സ്‌കോറിന് ജയിച്ചുകയറുകയായിരുന്നു. മനുഷ് ഷാ, കോണർ ഗ്രീനിനെ 11-9, 11-9, 11-6 എന്ന സ്‌കോറിന് തോൽപ്പിച്ച് ഇന്ത്യക്ക് മികച്ച തുടക്കം നൽകി.

ഇടതുകണ്ണിന് മുകളിൽ 13 തുന്നലുകൾ ഉണ്ടായിരുന്നിട്ടും അദ്ഭുതകരമായ പ്രകടനം കാഴ്ചവെച്ച മാനവ് തക്കർ, ജോസഫ് ഹണ്ടറെ 11-8, 11-4, 11-5 എന്ന സ്‌കോറിന് പരാജയപ്പെടുത്തുകയായിരുന്നു. പിന്നാലെ വെറ്ററൻ താരം ഹർമീത് ദേശായി, ബെഞ്ചമിൻ പിഗോട്ടിനെ 11-5, 11-5, 11-5 എന്ന സ്‌കോറിന് തകർത്ത് ഇന്ത്യയുടെ ഫൈനൽ പ്രവേശനം ഉറപ്പാക്കി.

വനിതകളുടെ മത്സരത്തിൽ കോമൺവെൽത്ത് ഗെയിംസ് മെഡൽ ജേതാവായ ശ്രീജ അകുല ആദ്യ മത്സരത്തിൽ ച്യൂക്ക് ലാം ജാസ്മിൻ വോങ്ങിനെ 11-6, 11-3, 11-9 എന്ന സ്‌കോറിന് പരാജയപ്പെടുത്തി. എന്നാൽ ഇംഗ്ലണ്ടിന്റെ ടിൻ-ടിൻ ഹോ, യാശ്വിനി ഘോർപഡെയെ തോൽപ്പിച്ചതോടെ സ്‌കോർ 1-1 ആയി നിലനിന്നു. തുടർന്ന് വന്ന സിന്ദ്രേല ദാസ്, അന്ന ഗ്രീനിനെ 11-7, 11-4, 11-9 എന്ന സ്‌കോറിന് കീഴടക്കി ഇന്ത്യക്ക് വീണ്ടും ലീഡ് സമ്മാനിച്ചു. നിർണായകമായ നാലാം മത്സരത്തിൽ ശ്രീജ അകുല അഞ്ച് ഗെയിം നീണ്ട ആവേശപ്പോരാട്ടത്തിൽ ടിൻ-ടിൻ ഹോയെ (11-8, 5-11, 11-6, 8-11, 11-9) പരാജയപ്പെടുത്തി ഇന്ത്യയെ ഫൈനലിലെത്തിക്കുകയായിരുന്നു.

Content Highlights: Indian men's and women's teams secured spots in the Commonwealth Table Tennis Championship finals., Both teams defeated England in the semi-finals., Manav Thakkar and Manush Shah dominated the men's event with a 3-0 victory., Sreeja Akula led the women's team to a 3-1 win over England., India will face Malaysia in the finals for both men's and women's categories.