സുചിക തരിയാലിലൂടെ ചരിത്രം കുറിച്ച് ഇന്ത്യ; മിക്സഡ് മാർഷ്യൽ ആർട്സിൽ മെഡൽ ഉറപ്പിച്ചു
നഗോയ: ജപ്പാനിലെ ഐച്ചി-നഗോയയിൽ നടക്കുന്ന ഏഷ്യൻ ഗെയിംസിൽ മിക്സഡ് മാർഷ്യൽ ആർട്സിൽ (എംഎംഎ) ഇന്ത്യയ്ക്കായി മെഡൽ ഉറപ്പാക്കി സുചിക തരിയാൽ. വനിതകളുടെ ട്രഡിഷണൽ 60 കിലോഗ്രാം വിഭാഗത്തിൽ സെമിഫൈനലിൽ പ്രവേശിച്ചതോടെയാണ് 36-കാരിയായ സുചിക ഇന്ത്യയ്ക്കായി മെഡൽ ഉറപ്പാക്കിയത്. ഏഷ്യൻ ഗെയിംസിന്റെ ചരിത്രത്തിൽ ആദ്യമായാണ് എംഎംഎ ഒരു മത്സര ഇനമായി ഉൾപ്പെടുത്തുന്നത്.
ക്വാർട്ടർ ഫൈനൽ പോരാട്ടത്തിൽ യൂറേഷ്യൻ മേഖലയിൽ 92-ാം റാങ്കുകാരിയായ മംഗോളിയയുടെ അൽതാൻചൈമെഗ് ബൈഗൽമാക്കെതിരെ 2-0 എന്ന സ്കോറിനാണ് സുചിക വിജയം സ്വന്തമാക്കിയത്. മത്സരത്തിലുടനീളം കൃത്യമായ മേധാവിത്വം പുലർത്തിയ താരം തിങ്കളാഴ്ച നടക്കുന്ന സെമിഫൈനലിൽ പോരാട്ടത്തിനിറങ്ങും.
സെമിയിൽ പരാജയപ്പെട്ടാലും ഇരു താരങ്ങൾക്കും വെങ്കല മെഡൽ ലഭിക്കുമെന്നതിനാൽ സുചികയുടെ ഈ ജയം ഇന്ത്യയുടെ മെഡൽ പട്ടികയിൽ ഒരു മെഡൽ കൂടി ഉറപ്പിച്ചു.
വിവിധ പോരാട്ട കായിക ഇനങ്ങളിൽ നീണ്ട പരിചയസമ്പത്തുള്ള താരമാണ് സുചിക തരിയാൽ. 2022-ലെ കോമൺവെൽത്ത് ഗെയിംസിൽ ജൂഡോയിലും 2023-ലെ ഏഷ്യൻ ഗെയിംസിൽ കുരാഷിലും ഇന്ത്യയെ പ്രതിനിധീകരിച്ച സുചിക, 2024-ൽ ജിയു-ജിത്സുവിൽ ലോക ചാമ്പ്യൻ പട്ടവും സ്വന്തമാക്കിയിരുന്നു. കായികരംഗത്ത് നിന്ന് താത്കാലികമായി വിട്ടുനിന്നശേഷം സുഹൃത്തുക്കളുടെ പ്രോത്സാഹനത്തെ തുടർന്നാണ് താരം എംഎംഎയിലേക്ക് ചുവടുവെക്കുന്നത്.
Content Highlights: Suchika Tariyal assured India of its first-ever medal in Mixed Martial Arts (MMA) at the Asian Games., She advanced to the semifinals in the women's traditional 60kg category in Aichi-Nagoya., Defeated Mongolia's Altanchimeg Baigalmaa 2-0 in the quarterfinals., Bronze medal is guaranteed even with a semifinal loss.