ഷൂട്ടിങ് റേഞ്ചിൽ അഴുക്കുചാലിലെ ദുർഗന്ധം; ഏഷ്യൻ ഗെയിംസ് സംഘാടകർക്കെതിരേ ആഞ്ഞടിച്ച് മനു ഭാക്കറുടെ പിതാവ്

നഗോയ: ഐച്ചി-നഗോയയിൽ നടക്കുന്ന ഏഷ്യൻ ഗെയിംസിലെ ഷൂട്ടിങ് മത്സരങ്ങളുടെ മോശം സംഘാടനത്തിലും വേദിയിലെ സൗകര്യക്കുറവുകളിലും കടുത്ത അതൃപ്തി രേഖപ്പെടുത്തി ഇന്ത്യൻ ഷൂട്ടർ മനു ഭാക്കറുടെ  പിതാവ് രാം കിഷൻ ഭാക്കർ.

ഷൂട്ടിങ് റേഞ്ചിന് സമീപം അഴുക്കുചാലിന്റെ ദുർഗന്ധമുണ്ടെന്നും ഇത്തരമൊരു ദുഷ്‌കരമായ അന്തരീക്ഷത്തിലാണ് കായികതാരങ്ങൾ മത്സരിക്കുന്നതെന്നും എഎൻഐയോട് സംസാരിക്കവേ അദ്ദേഹം ആരോപിച്ചു.

നഗോയ നഗരത്തിൽ നിന്ന് വളരെ അകലെയാണ് ഷൂട്ടിങ് റേഞ്ച് സ്ഥിതി ചെയ്യുന്നത്. മത്സരവേദിയിലേക്കും തിരിച്ചുമായി പ്രതിദിനം നാല് മുതൽ അഞ്ച് മണിക്കൂർ വരെ യാത്രാ സമയമായി ചെലവഴിക്കേണ്ടി വരുന്നുണ്ടെന്ന് അദ്ദേഹം ചൂണ്ടിക്കാട്ടി. ഇതിനുപുറമേ ബസുകളുടെ സമയക്രമത്തിലും വലിയ ക്രമക്കേടുകളുണ്ട്. ഇത്തരം വൻകിട കായിക മത്സരങ്ങൾ സംഘടിപ്പിക്കുമ്പോൾ ജപ്പാൻ സംഘാടകർ കൂടുതൽ മെച്ചപ്പെടേണ്ടതുണ്ടെന്നും കൃത്യമായ തയ്യാറെടുപ്പുകൾ നടത്തണമെന്നും അദ്ദേഹം കൂട്ടിച്ചേർത്തു.

പാരിസ് ഒളിമ്പിക്‌സിലെ തിളക്കമാർന്ന നേട്ടങ്ങൾക്ക് ശേഷം ഇന്ത്യയുടെ ഏറ്റവും വലിയ മെഡൽ പ്രതീക്ഷയായിരുന്ന മനു ഭാക്കറിന് ഇത്തവണത്തെ ഏഷ്യൻ ഗെയിംസിൽ ഒരു മെഡൽ പോലും നേടാൻ സാധിച്ചില്ല.

Content Highlights: Ram Kishan Bhaker expressed strong dissatisfaction with the poor organization of shooting events at the Aichi-Nagoya Asian Games., Highlighted issues including foul odor from drains near the shooting range and a 4 to 5-hour daily commute., Criticized bus scheduling irregularities and urged Japanese organizers to improve preparedness., Manu Bhaker failed to win a medal at these Asian Games following her stellar Paris Olympics success.