ഏഷ്യൻ ഗെയിംസ്; പുരുഷന്മാരുടെ 10 മീറ്റർ എയർ റൈഫിൾ ടീം ഇനത്തിൽ ഇന്ത്യക്ക് വെള്ളി

നഗോയ: ഏഷ്യൻ ഗെയിംസിൽ മൂന്നാം മെഡൽ സ്വന്തമാക്കി ഇന്ത്യ. പുരുഷന്മാരുടെ 10 മീറ്റർ എയർ റൈഫിൾ ടീം ഇനത്തിൽ ഇന്ത്യ വെള്ളി മെഡൽ നേടി. രുദ്രാങ്ക്ഷ് പാട്ടീൽ, ഹിമാൻഷു ധില്ലൻ, പാർഥ് മാനെ എന്നിവരടങ്ങിയ ടീമാണ് വെള്ളി മെഡൽ സ്വന്തമാക്കിയത്. ഇത്തവണ ഷൂട്ടിങ്ങിൽ ഇന്ത്യ സ്വന്തമാക്കുന്ന മൂന്നാം മെഡലാണിത്.

ആകെ 1890.1 പോയന്റോടെയാണ് ഇന്ത്യൻ ടീം വെള്ളി മെഡൽ കരസ്ഥമാക്കിയത്. ഈ പ്രകടനത്തോടെ രുദ്രാങ്ക്ഷ് പാട്ടീലും ഹിമാൻഷു ധില്ലനും വ്യക്തിഗത വിഭാഗത്തിന്റെ ഫൈനലിലേക്ക് യോഗ്യത നേടുകയും ചെയ്തു.

ഈ ഇനത്തിൽ 1899.0 പോയിന്റ് എന്ന പുതിയ ലോക റെക്കോർഡോടെ ചൈന സ്വർണം നേടി. ദക്ഷിണ കൊറിയ 1884.2 പോയിന്റോടെ വെങ്കല മെഡൽ സ്വന്തമാക്കി.

ഏഷ്യൻ ഗെയിംസ് ഷൂട്ടിങ്ങിൽ ഇന്ത്യയ്ക്ക് മികച്ച തുടക്കമാണ് ലഭിച്ചിരിക്കുന്നത്. കഴിഞ്ഞ ദിവസം വനിതകളുടെ 10 മീറ്റർ എയർ റൈഫിൾ ടീം ഇനത്തിൽ ഇളവേനിൽ വാളറിവൻ, സോനം മസ്‌കർ, വിദർശ വിനോദ് എന്നിവരടങ്ങിയ ടീം വെള്ളി മെഡൽ നേടിയിരുന്നു. കൂടാതെ വ്യക്തിഗത വിഭാഗത്തിൽ ഇളവേനിൽ മറ്റൊരു വെള്ളി മെഡലും ഇന്ത്യക്കായി സ്വന്തമാക്കി.

Content Highlights: India won silver in the men's 10m air rifle team event at the Asian Games with a total of 1890.1 points., The team comprised Rudrankksh Patil, Himanshu Dhillon, and Parth Mane., Rudrankksh Patil and Himanshu Dhillon qualified for the individual finals., China won gold with a world record score of 1899.0 points, while South Korea took bronze.