കപ്പടിച്ചാൽ ടാറ്റൂ, വാക്കുപാലിച്ച് കുക്കുറെയ്യ, പരിശീലകന്റെ മുഖം പച്ചകുത്തിയത് ഇടതുകൈയിൽ | Video

മാഡ്രിഡ്: ഫിഫ ലോകകപ്പ് ഫൈനലിന് മുൻപ് താൻ നൽകിയ കൗതുകകരമായ ഒരു വാഗ്ദാനം പാലിച്ചിരിക്കുകയാണ് സ്പാനിഷ് പ്രതിരോധ താരം മാർക് കുക്കുറെയ്യ. അർജന്റീനയെ പരാജയപ്പെടുത്തി സ്‌പെയിൻ കിരീടം ചൂടിയാൽ പരിശീലകൻ ലൂയിസ് ഡെ ലാ ഫ്യുവന്തെയുടെ ചിത്രം ശരീരത്തിൽ പതിപ്പിക്കുമെന്ന് കുക്കുറെയ്യ പ്രഖ്യാപിച്ചിരുന്നു. ഇപ്പോഴിതാ ഈ വാഗ്ദാനം പാലിച്ചിരിക്കുകയാണ് താരം.

പ്രശസ്ത സ്പാനിഷ് ടാറ്റൂ ആർട്ടിസ്റ്റ് ജോക്വിൻ ഗംഗയാണ് കുക്കുറെയ്യയുടെ ഇടതുകൈയിൽ പരിശീലകന്റെ ചിത്രം മനോഹരമായി വരച്ചുചേർത്തത്. ലെബ്രോൺ ജെയിംസ്, ഡ്രേക്ക് തുടങ്ങിയ പ്രമുഖർക്ക് ടാറ്റൂ ചെയ്തിട്ടുള്ള വ്യക്തിയാണ് ജോക്വിൻ ഗംഗ. കിരീടനേട്ടത്തിന് ശേഷം ഈ പുതിയ ടാറ്റൂവിന്റെ ചിത്രങ്ങൾ താരം ഇപ്പോൾ സോഷ്യൽ മീഡിയയിലൂടെ പങ്കുവെച്ചിട്ടുണ്ട്. 'വാഗ്ദാനം നിറവേറ്റി' എന്ന ക്യാപ്ഷനോടെ കുക്കുറെയ്യ തന്നെയാണ് തന്റെ ഇൻസ്റ്റഗ്രാമിലൂടെ ടാറ്റൂവിന്റെ ചിത്രം പങ്കുവെച്ചിരിക്കുന്നത്. തന്റെ ടീമിന്റെ വിജയത്തിലും നൽകിയ വാക്ക് പാലിക്കുന്നതിലും കുക്കുറെയ്യ വലിയ അഭിമാനവും സന്തോഷവും പ്രകടിപ്പിച്ചു. ലൂയിസ് ഡെ ലാ ഫ്യുവന്തെ ലോകകപ്പ് ട്രോഫി പിടിച്ചുനിൽക്കുന്ന ചിത്രമാണ് ടാറ്റൂ ചെയ്തിരിക്കുന്നത്.

അതേസമയം തന്റെ ചിത്രം പച്ചകുത്താനുള്ള തീരുമാനത്തെ പരിശീലകൻ ലൂയിസ് ഡെ ലാ ഫ്യുവന്തെ തമാശരൂപേണയാണ് കണ്ടത്. താൻ ടാറ്റൂ ചെയ്യേണ്ട പ്രായത്തിലല്ലെന്നും എന്നാൽ താരങ്ങൾ നൽകിയ വാക്ക് പാലിക്കുന്നതിൽ തനിക്ക് അഭിമാനമുണ്ടെന്നും അദ്ദേഹം വ്യക്തമാക്കി. ടാറ്റൂ എവിടെ വേണമെന്ന് ആദ്യം നിശ്ചയിച്ചിരുന്നില്ലെങ്കിലും, അത് എല്ലാവർക്കും കാണാൻ കഴിയുന്ന ഒരിടത്തായിരിക്കണമെന്ന് കുക്കുറെയ്യ ആഗ്രഹിച്ചിരുന്നു. അതനുസരിച്ചാണ് ഇടതുകൈയിൽ തന്നെ ചിത്രം പതിപ്പിച്ചത്.

Content Highlights: Marc Cucurella fulfilled his promise to tattoo his coach's face after Spain's World Cup win., The tattoo was created by renowned artist Joaquin Ganga on Cucurella's left arm., The design features coach Luis de la Fuente holding the World Cup trophy., The coach responded lightheartedly to the tribute, expressing pride in his player's commitment.