അർജന്റീന കുപ്പായം അഴിച്ച ശേഷം ഇരട്ട ഗോളുകളുമായി തിളങ്ങി മെസ്സി; ഇന്റർ മയാമിക്ക് തകർപ്പൻ ജയം

മയാമി: അർജന്റീന ദേശീയ ടീമിലെ 21 വർഷത്തെ കരിയർ അവസാനിപ്പിച്ച മത്സരത്തിനു പിന്നാലെ ഇന്റർ മയാമിക്കായി കളത്തിൽ തകർപ്പൻ പ്രകടനവുമായി ലയണൽ മെസ്സി. ബെനിനെതിരായ വിടവാങ്ങൽ മത്സരത്തിന് നാല് ദിവസത്തിന് ശേഷം, 90 മിനിറ്റും കളത്തിലിറങ്ങിയ മെസ്സി ഇന്റർ മയാമിക്കായി ഇരട്ട ഗോളുകളുമായി തിളങ്ങി. ലൂയിസ് സുവാരസും ഇരട്ട ഗോൾ നേടിയതോടെ എതിരില്ലാത്ത നാലു ഗോളുകൾക്ക് മയാമി ഡി.സി. യുണൈറ്റഡിനെ തകർത്തു. അഞ്ചു മത്സരങ്ങൾക്കു ശേഷമാണ് ഇന്റർ മയാമി വിജയവഴിയിൽ തിരിച്ചെത്തുന്നത്.

സെപ്റ്റംബർ 16-ന് ചുമതലയേറ്റ പുതിയ കോച്ച് ക്രിസ്റ്റ്യൻ 'കിലി' ഗോൺസാലസിന് കീഴിൽ ഇന്റർ മയാമിയുടെ ആദ്യ ലീഗ് വിജയമാണിത്. മത്സരത്തിൽ ലീഗിൽ ഏറ്റവും കൂടുതൽ ഗോളുകൾ നേടിയ താരമായ മെസ്സി ഈ സീസണിലെ തന്റെ ഗോൾ നേട്ടം 23 ആയി ഉയർത്തി. ഓഗസ്റ്റ് 29-ന് സി.എഫ്. മോൺട്രിയാലിനെ 7-1 ന് പരാജയപ്പെടുത്തിയതിന് ശേഷം ഇന്റർ മയാമിയുടെ ആദ്യ ജയം കൂടിയാണിത്.

മത്സരത്തിന്റെ മൂന്നാം മിനിറ്റിൽ തന്നെ ഇന്റർ മയാമി ലീഡ് നേടി. ബെർത്തെരാമെയുടെ ഹെഡർ പാസ് സ്വീകരിച്ച് ലൂയിസ് സുവാരസ് ഡി.സി. യുണൈറ്റഡ് ഗോൾകീപ്പർ ഷോൺ ജോൺസണെ മറികടന്ന് ഇടത് പോസ്റ്റിലേക്ക് പന്ത് വലയിലാക്കി. തുടർന്ന് 39-ാം മിനിറ്റിൽ സുവാരസ് തന്റെ രണ്ടാമത്തെ ഗോളും നേടി. മെസ്സിയുടെ ക്ലോസ് റേഞ്ച് ഷോട്ട് ഗോൾകീപ്പർ ഷോൺ ജോൺസൺ തടുത്തത് ബെർത്തെരാമെയിലേക്ക് എത്തുകയും, ബെർത്തെരാമെയുടെ ഹെഡർ പാസിൽ നിന്ന് ബോക്‌സിനുള്ളിൽ വെച്ച് സുവാരസ് ഗോൾ കണ്ടെത്തുകയുമായിരുന്നു. ആദ്യ പകുതിയിൽ ഇന്റർ മയാമി 2-0 ന് മുന്നിലെത്തി.

രണ്ടാം പകുതിയുടെ തുടക്കത്തിൽ 47-ാം മിനിറ്റിൽ മെസ്സി മത്സരത്തിലെ തന്റെ ആദ്യ ഗോൾ കുറിച്ചു. സിക്‌സ് യാർഡ് ബോക്‌സിന് സമീപത്ത് നിന്ന് സുവാരസ് നൽകിയ പാസ് സ്വീകരിച്ച് മെസ്സി പന്ത് വലതു പോസ്റ്റിലേക്ക് തട്ടിയിടുകയായിരുന്നു. തുടർന്ന് 60-ാം മിനിറ്റിൽ മെസ്സി തന്റെ രണ്ടാം ഗോളും കണ്ടെത്തി. റോഡ്രിഗോ ഡി പോളിന്റെ പാസ് സ്വീകരിച്ച്, പെനാൽറ്റി ബോക്‌സിനുള്ളിലേക്ക് ഡ്രിബിൾ ചെയ്ത് കയറിയ മെസ്സി രണ്ട് ഡി.സി. യുണൈറ്റഡ് പ്രതിരോധ താരങ്ങളെ വെട്ടിച്ച് പന്ത് വലയിലാക്കുകയായിരുന്നു.

Content Highlights: Lionel Messi scored two goals after his retirement from the Argentina national team., Luis Suarez also scored a brace, securing a 4-0 victory against DC United., This is Inter Miami's first win under new coach Cristian 'Kily' Gonzalez., Messi's season tally reached 23 goals in the league.