ടോക്‌സിക് ഡ്രസ്സിങ് റൂമുകളിൽ തകർന്ന പ്രഭാവലയം; 'സ്‌പെഷൽ വണ്ണി'നെ തള്ളി പുറത്താക്കുമ്പോൾ

ചെൽസിയുടെ തട്ടകമായ സ്റ്റാംഫോർഡ് ബ്രിഡ്ജിൽ 2013ൽ തിരികെ എത്തുമ്പോഴും ഹൊസ്സെ മൗറീന്യോയുടെ 'സ്‌പെഷൽ വൺ' പ്രഭാവലയത്തിന് വലിയ കോട്ടം സംഭവിച്ചിരുന്നില്ല. എങ്കിലും ആ അജയ്യ പരിവേഷത്തിന് റയലിൽ വെച്ചു തന്നെ വിള്ളൽ വീണു തുടങ്ങിയിരുന്നു. പെപ് ഗ്വാർഡിയോളയുടെ ബാഴ്സലോണയ്‌ക്കെതിരെ നേടിയ 'രക്തപങ്കിലമായ' വിജയങ്ങൾ ആഘോഷിക്കുന്നതിനിടെ അദ്ദേഹത്തിന്റെ കരിയർ ഗ്രാഫ് താഴ്ന്നുതുടങ്ങിയത് ഫുട്‌ബോൾ ലോകം ശ്രദ്ധിച്ചില്ലെന്നു വേണം പറയാൻ. പോർട്ടോയ്ക്കും ഇന്ററിനുമൊപ്പം ചാമ്പ്യൻസ് ലീഗ് കിരീടം നേടിയ മൗറിന്യോയ്ക്ക് റയലിലെ മൂന്നു സീസണിലും സെമിഫൈനൽ കടക്കാൻ കഴിഞ്ഞിരുന്നില്ല.

മൗറിന്യോയെ രണ്ടാം വരവിൽ ചെൽസി വീരോചിതമായി സ്വീകരിച്ചു. 2014-15 സീസണിൽ പ്രീമിയർ ലീഗ് കിരീടം നേടി അദ്ദേഹം ആ വരവ് ന്യായീകരിച്ചെന്ന് തോന്നി. പക്ഷേ, മാസങ്ങൾക്കകം ചെൽസി തരംതാഴ്ത്തൽ ഭീഷണിയുടെ അടുത്തെത്തി! ലീഗ് ചാമ്പ്യനായി ഏഴുമാസത്തിനകം ഉണ്ടായ വിശദീകരിക്കാനാവാത്ത ആ തകർച്ച 2015 ഡിസംബറിൽ ക്ലബ് മൗറിന്യോയെ പുറത്താക്കുന്നതിലവസാനിച്ചു. മൗറിന്യോയും ടീമും തമ്മിലുള്ള ബന്ധം സമ്പൂർണമായി തകർന്നതാണ് കാരണം. റയൽ മാഡ്രിഡിൽ തുടങ്ങിയ 'രോഗം' അദ്ദേഹം പിന്നീട് ചുമതലയേറ്റ മിക്കവാറും ടീമുകളിൽ ആവർത്തിച്ചു, ഉജ്ജ്വലമായി ആരംഭിച്ച ശേഷമുണ്ടാവുന്ന പെട്ടെന്നുള്ള, പലപ്പോഴും വിശദീകരിക്കാനാവാത്ത തകർച്ച.

Content Highlights: The evolution of Mourinho's 'Special One' aura from Porto/Chelsea to his later years., Analysis of 'Siege Mentality' and why it became a self-destructive tool in modern football