ഇൻഫാന്റിനോ ‘ഫെന്റാസ്റ്റിക്ക്’; പിന്തുണയുമായി ട്രംപ്, നീക്കംചെയ്യുന്നത് അബദ്ധമാകുമെന്ന് മുന്നറിയിപ്പ്

വാഷിങ്ടൺ: ആഗോള ഫുട്‌ബോൾ ഭരണസമിതിയായ ഫിഫയുടെ തലപ്പത്തുനിന്ന് പ്രസിഡന്റ് ജിയാനി ഇൻഫാന്റിനോയെ നീക്കം ചെയ്യാനുള്ള നീക്കത്തിനെതിരേ യുഎസ് പ്രസിഡന്റ് ഡൊണാൾഡ് ട്രംപിന്റെ മുന്നറിയിപ്പ്. ഇൻഫാന്റിനോയെ മാറ്റുന്നത് ഫിഫ ചെയ്യുന്ന 'വലിയ തെറ്റായിരിക്കും' എന്ന് ട്രംപ് വ്യക്തമാക്കി. തന്റെ സോഷ്യൽ മീഡിയ പ്ലാറ്റ്ഫോമായ 'ട്രൂത്ത് സോഷ്യൽ' വഴിയാണ് ട്രംപ് ഇൻഫാന്റിനോയ്ക്ക് പിന്തുണ പ്രഖ്യാപിച്ചത്.

ഫിഫ ലോകകപ്പിന്റെയും ക്ലബ് ലോകകപ്പിന്റെയും ഓഹരികൾ സ്വകാര്യ നിക്ഷേപകർക്ക് വിൽക്കാനുള്ള വിവാദമായ നീക്കത്തെത്തുടർന്ന് ഇൻഫാന്റിനോ രാജ്യാന്തര തലത്തിൽ വലിയ പ്രതിഷേധം നേരിടുന്ന സാഹചര്യത്തിലാണ് ട്രംപിന്റെ ഈ ഇടപെടൽ. ഏകദേശം 20 ബില്യൺ ഡോളർ മൂല്യം കണക്കാക്കുന്ന ഈ നിക്ഷേപ പദ്ധതി അംഗരാജ്യങ്ങളുമായോ പ്രാദേശിക കോൺഫെഡറേഷനുകളുമായോ ആലോചിക്കാതെയാണ് ഇൻഫാന്റിനോ മുന്നോട്ട് വെച്ചതെന്ന് ആക്ഷേപമുണ്ട്. ഫുട്‌ബോൾ ലോകത്തെ പ്രമുഖർ ഈ നീക്കത്തെ എതിർത്തതിനെത്തുടർന്ന് പദ്ധതി പിന്നീട് പിൻവലിച്ചെങ്കിലും ഇൻഫാന്റിനോയെ പുറത്താക്കണമെന്ന ആവശ്യത്തിൽ വിവിധ ഫുട്‌ബോൾ അസോസിയേഷനുകൾ ഉറച്ചുനിൽക്കുകയാണ്.

ഇൻഫാന്റിനോ മികച്ച രീതിയിലാണ് പ്രവർത്തിക്കുന്നതെന്നും അദ്ദേഹം പോയാൽ ഫിഫയ്ക്ക് പഴയ വിജയം ആവർത്തിക്കാനോ ലാഭമുണ്ടാക്കാനോ കഴിയില്ലെന്നും ട്രംപ് കുറിച്ചു. 'ലോകകപ്പിനെ ഇത്രയധികം വിജയകരമാക്കിയ പ്രസിഡന്റ് ജിയാനി ഇൻഫാന്റിനോയെ മാറ്റുന്നതിനെക്കുറിച്ച് ചിന്തിക്കുന്നത് പോലും ഫിഫ ചെയ്യുന്ന വലിയ അബദ്ധമായിരിക്കും. അദ്ദേഹം ഫന്റാസ്റ്റിക് ആണ്,' ട്രംപ് പറഞ്ഞു.

ട്രംപും ഇൻഫാന്റിനോയും തമ്മിലുള്ള അടുത്ത സൗഹൃദം നേരത്തെ തന്നെ ചർച്ചയായിരുന്നു. ഈ വിവാദ നിക്ഷേപ പദ്ധതിയെ നയിക്കാൻ നിശ്ചയിച്ചിരുന്നത് ട്രംപിന്റെ മകളുടെ ഭർത്താവായ ജാരെദ് കുഷ്‌നറുടെ സഹോദരൻ ജോഷ്വ കുഷ്‌നറുടെ ഉടമസ്ഥതയിലുള്ള 'ത്രൈവ് ഇറ്റേണൽ' എന്ന കമ്പനിയാണെന്ന റിപ്പോർട്ടുകളും പുറത്തുവന്നിരുന്നു. ഈ പദ്ധതിയെക്കുറിച്ച് തനിക്ക് അറിവില്ലെന്ന് ആദ്യം ട്രംപ് പറഞ്ഞിരുന്നെങ്കിലും, ട്രംപ് ഭരണകൂടവുമായി ഫിഫ ഇക്കാര്യത്തിൽ ചർച്ചകൾ നടത്തിയിരുന്നതായും സൂചനകളുണ്ട്.

ഇൻഫാന്റിനോയുടെ നേതൃശൈലിക്കെതിരേ ഫുട്‌ബോൾ ലോകത്ത് വലിയ ഭിന്നത നിലനിൽക്കുന്നുണ്ട്. യുവേഫ, കോൺകാകാഫ്, എഎഫ്‌സി തുടങ്ങിയ പ്രമുഖ കോൺഫെഡറേഷനുകൾ ഇൻഫാന്റിനോയെ രൂക്ഷമായി വിമർശിക്കുകയും, യുവേഫ, ലോകകപ്പ് അടക്കമുള്ള എല്ലാ ഫിഫ മത്സരങ്ങളും ബഹിഷ്‌കരിക്കുമെന്ന് ഭീഷണിപ്പെടുത്തുകയും ചെയ്തിരുന്നു.

ഡെന്മാർക്ക്, ഫിൻലൻഡ്, സ്വീഡൻ, വെയ്ൽസ് തുടങ്ങിയ രാജ്യങ്ങൾ ഇൻഫാന്റിനോയ്ക്കുള്ള പിന്തുണ പിൻവലിച്ചിട്ടുണ്ട്. എന്നാൽ ആഫ്രിക്കൻ ഫുട്‌ബോൾ കോൺഫെഡറേഷൻ അദ്ദേഹത്തെ ശക്തമായി പിന്തുണയ്ക്കുന്നു. തെക്കേ അമേരിക്കൻ സംഘടനയായ കോൺമെബോൾ ഇൻഫാന്റിനോയുടെ പദ്ധതിയെ വിമർശിച്ചെങ്കിലും അദ്ദേഹത്തിന്റെ ഭാവിയെക്കുറിച്ച് അടുത്ത മാർച്ചിൽ നടക്കുന്ന തിരഞ്ഞെടുപ്പിൽ തീരുമാനമെടുക്കാമെന്ന നിലപാടിലാണ്.

ഫിഫയുടെ 211 അംഗ അസോസിയേഷനുകൾക്ക് ഫണ്ട് വർധിപ്പിച്ചതിലൂടെ ഇൻഫാന്റിനോയ്ക്ക് വലിയൊരു വിഭാഗം അംഗങ്ങളുടെ പിന്തുണ ഉറപ്പാക്കാൻ കഴിഞ്ഞിട്ടുണ്ട്. അടുത്ത വർഷം മാർച്ചിൽ റബാത്തിൽ വെച്ചാണ് ഫിഫയുടെ അടുത്ത പ്രസിഡന്റ് തിരഞ്ഞെടുപ്പ് നടക്കുന്നത്.

Content Highlights: US President Donald Trump warns against removing FIFA President Gianni Infantino., Infantino faces backlash over a controversial $20 billion private investment plan for World Cup stakes., Major confederations like UEFA threaten boycotts while upcoming March elections remain crucial for Infantino's future.