ക്രിസ്റ്റ്യാനോയുടെ തീരുമാനത്തിൽ ഞെട്ടി ആരാധകർ; ടീം ക്യാമ്പ് വിടാനുള്ള കാരണങ്ങൾ യഥാസമയം വെളിപ്പെടുത്തുമെന്ന് താരം

കോപ്പൻഹേഗൻ: പോർച്ചുഗലിന്റെ നേഷൻസ് ലീഗ് പരിശീലന ക്യാമ്പ് വിട്ടതിന് ശേഷം തന്റെ തീരുമാനത്തിന് പിന്നിലെ സത്യം യഥാസമയം വെളിപ്പെടുത്തുമെന്ന് വ്യക്തമാക്കി പോർച്ചുഗീസ് നായകൻ ക്രിസ്റ്റ്യാനോ റൊണാൾഡോ. ഡെൻമാർക്കിനെതിരായ നേഷൻസ് ലീഗ് മത്സരത്തിന് തൊട്ടുമുമ്പ് കോപ്പൻഹേഗനിലെ പോർച്ചുഗൽ ക്യാമ്പിൽ നിന്നാണ് റൊണാൾഡോ മടങ്ങിയത്. ദേശീയ ടീമിനും സഹതാരങ്ങൾക്കും അദ്ദേഹം ആശംസകൾ നേർന്നു.

പോർച്ചുഗീസ് ഫുട്‌ബോൾ ഫെഡറേഷൻ പ്രസിഡന്റ് പെഡ്രോ പ്രോൻസയുമായി സംസാരിച്ചതിനും പരിശീലകൻ ജോർജ്ജ് ജീസസിന്റെ വാർത്താസമ്മേളനത്തിനും ശേഷമാണ് റൊണാൾഡോ സോഷ്യൽ മീഡിയയിലൂടെ പ്രതികരണം പങ്കുവെച്ചത്. ദേശീയ ടീമിനായി എപ്പോഴും സമർപ്പിതനായിരുന്ന തന്റെ മടങ്ങിപ്പോക്കിന്റെ കാരണങ്ങൾ പോർച്ചുഗീസുകാർക്ക് യഥാസമയം വ്യക്തമാക്കുമെന്ന് അദ്ദേഹം കുറിച്ചു. യാതൊരു വ്യത്യാസവുമില്ലാതെ എല്ലാ സഹതാരങ്ങൾക്കും പോർച്ചുഗൽ ടീമിനും വിജയാശംസകൾ നേർന്നുകൊണ്ടാണ് അദ്ദേഹം തന്റെ സന്ദേശം അവസാനിപ്പിച്ചത്.

41-കാരനായ റൊണാൾഡോയ്ക്ക് കഴിഞ്ഞ കുറച്ചു ദിവസങ്ങൾ അത്ര സുഖകരമായിരുന്നില്ല. ഞായറാഴ്ച നോർവേയ്ക്കെതിരെ പോർച്ചുഗൽ 2-1 ന് ജയിച്ച മത്സരത്തിൽ റൊണാൾഡോ സബ്സ്റ്റിറ്റിയൂട്ട് ബെഞ്ചിലായിരുന്നു. പകരക്കാരനായി കളത്തിലിറക്കാമെന്ന് പരിശീലകൻ ജോർജ്ജ് ജീസസ് പറഞ്ഞിരുന്നെങ്കിലും പിന്നീട് അദ്ദേഹത്തെ ഇറക്കിയില്ല.

രണ്ടാം പകുതിയിൽ വാം-അപ്പ് ചെയ്യിച്ചെങ്കിലും ജോർജ്ജ് ജീസസ് റൊണാൾഡോയെ കളത്തിലിറക്കാൻ തയ്യാറായില്ല. മത്സരം അവസാനിച്ചയുടൻ, സഹതാരങ്ങൾക്കൊപ്പം ആരാധകരെ അഭിവാദ്യം ചെയ്യാൻ നിൽക്കാതെ പ്രകോപിതനായ റൊണാൾഡോ ഡ്രസ്സിങ് റൂമിലേക്ക് നടന്നുപോയിരുന്നു. തുടർന്ന് തിങ്കൾ, ചൊവ്വ ദിവസങ്ങളിൽ പരിക്കൊന്നുമില്ലാതിരുന്നിട്ടും ടീമിനൊപ്പം പരിശീലനം നടത്തുന്നതിന് പകരം റൊണാൾഡോ ജിമ്മിലാണ് സമയം ചെലവഴിച്ചത്.

റൊണാൾഡോയുമായി വലിയ പ്രശ്നങ്ങളൊന്നുമില്ലെന്നും ഡെൻമാർക്കിനെതിരായ മത്സരത്തിൽ അദ്ദേഹം ആദ്യ ഇലവനിൽ ഉണ്ടാകില്ലെന്നും പകരക്കാരുടെ ബെഞ്ചിലായിരിക്കുമെന്നും ബുധനാഴ്ചത്തെ വാർത്താസമ്മേളനത്തിൽ ജോർജ്ജ് ജീസസ് വ്യക്തമാക്കിയിരുന്നു. താനാണ് പരിശീലകനെന്നും അതിനാൽ ടീം തിരഞ്ഞെടുപ്പിലെ തീരുമാനങ്ങൾ തന്റേതാണെന്നും അദ്ദേഹം വ്യക്തമാക്കി. ഈ വാർത്താസമ്മേളനത്തിന് തൊട്ടുപിന്നാലെയാണ് റൊണാൾഡോ ക്യാമ്പ് വിട്ടത്. സഹതാരങ്ങൾ പരിശീലനത്തിനെത്തിയ സമയത്ത് പോർച്ചുഗീസ് ഫുട്‌ബോൾ ഫെഡറേഷന്റെ വാഹനത്തിലാണ് അദ്ദേഹം പാർക്കൻ സ്റ്റേഡിയത്തിൽ നിന്ന് മടങ്ങിയതെന്ന് പോർച്ചുഗീസ് ദിനപത്രമായ 'എ ബോള' റിപ്പോർട്ട് ചെയ്തു. റൊണാൾഡോ ക്യാമ്പ് വിട്ടതായി പോർച്ചുഗീസ് ഫുട്‌ബോൾ ഫെഡറേഷനും സ്ഥിരീകരിച്ചു.

ഔദ്യോഗികമായി വിരമിക്കൽ പ്രഖ്യാപിച്ചിട്ടില്ലെങ്കിലും, ഈ സന്ദേശത്തിന്റെ സ്വഭാവം അദ്ദേഹം അന്താരാഷ്ട്ര കരിയർ അവസാനിപ്പിക്കുകയാണോ എന്ന ചോദ്യങ്ങൾ ഉയർത്തുന്നുണ്ട്. പോർച്ചുഗലിനായി 234 മത്സരങ്ങളിൽ നിന്ന് 146 ഗോളുകൾ നേടിയ റൊണാൾഡോ രാജ്യത്തിന്റെ എക്കാലത്തെയും മികച്ച ടോപ് സ്‌കോററും കൂടുതൽ മത്സരങ്ങൾ കളിച്ച താരവുമാണ്. 2026 തന്റെ പ്രൊഫഷണൽ ഫുട്‌ബോൾ കരിയറിലെ അവസാന വർഷമായിരിക്കുമെന്ന് ഓഗസ്റ്റിൽ റൊണാൾഡോ സൂചിപ്പിച്ചിരുന്നെങ്കിലും നിലവിൽ ഔദ്യോഗിക വിരമിക്കൽ പ്രഖ്യാപനങ്ങളൊന്നും ഉണ്ടായിട്ടില്ല.

കളിക്കാരുടെ ഭൂതകാല നേട്ടങ്ങൾക്കല്ല, നിലവിലെ പ്രകടനത്തിനാണ് മുൻഗണന നൽകുന്നതെന്ന് ജോർജ്ജ് ജീസസ് വ്യക്തമാക്കി. നന്നായി കളിച്ചാൽ ടീമിലുണ്ടാകും, ഇല്ലെങ്കിൽ പുറത്തിരിക്കും എന്നായിരുന്നു അദ്ദേഹത്തിന്റെ നിലപാട്. ഇതിനുശേഷമുള്ള പരിശീലനങ്ങളിൽ ഗ്രൂപ്പ് സെഷനുകളിൽ പങ്കെടുക്കാതെ റൊണാൾഡോ ജിമ്മിൽ മാത്രം സമയം ചെലവഴിച്ചത് പരിശീലകനുമായുള്ള ഭിന്നത രൂക്ഷമാണെന്ന വാർത്തകൾക്ക് കരുത്തേകി.

Content Highlights: Cristiano Ronaldo left the Portugal Nations League training camp in Copenhagen., The departure follows a reported rift with coach Jorge Jesus over team selection., Ronaldo promised to reveal the full truth behind his decision in due time., Uncertainty looms over his international future as 2026 marks his potential final year.