‘അർജന്റീന-ഫ്രാൻസ് ഫൈനൽ ആവർത്തിച്ചേക്കാം; 2026-ലെ എന്റെ സ്വകാര്യദുഃഖം സ്പെയിനാണ്’

ലോകകപ്പിന്റെ ചരിത്രത്തിലെ ഏറ്റവും വലിയ ആഘോഷമാണ് 2026-ൽ അരങ്ങേറുന്നത്. മൂന്നു രാജ്യങ്ങളിലും 16 സ്റ്റേഡിയങ്ങളിലുമായി വടക്കൻ അമേരിക്ക എന്ന ഭൂഖണ്ഡംതന്നെ ഫുട്ബോളിന്റെ വേദിയാകുന്നു.

ചോരയ്ക്ക് വേഗംകൂട്ടാൻ റൗണ്ട് 32 എന്നൊരു പുതിയ നോക്കൗട്ട് തലംകൂടി ഇവിടെ ആരംഭിക്കുന്നു. പല തുടക്കങ്ങൾക്കും ഈ ലോകകപ്പ് സാക്ഷിയാകും. ലയണൽ മെസ്സി, ക്രിസ്റ്റ്യാനോ റൊണാൾഡോ, ലൂക്ക മോഡ്രിച്ച് എന്നിവർ ഇവിടെവെച്ച് അരങ്ങൊഴിയും. ഫൈനലിന്റെ ആറുദിവസം മുൻപുമാത്രം 19 വയസ്സാകുന്ന സ്പെയിനിന്റെ ലാമീൻ യമാൽ ഭൂമിയുടെ അവകാശിയാകാൻ തയ്യാറെടുക്കുന്നതും ഈ ലോകകപ്പിൽത്തന്നെ.

2022-ൽ ഖത്തറിലെ ത്രസിപ്പിച്ച ഫ്രാൻസ്-അർജന്റീന ഫൈനൽ ഇവിടെ ആവർത്തിച്ചുകൂടാ എന്നില്ല. എത്ര നാടകീയമായിരിക്കും ആ റീമാച്ച്! ഫുട്ബോൾ കൂടുതൽ ജനകീയമാകുന്നതും വടക്കൻ അമേരിക്കയിൽവെച്ചുതന്നെ. രാജ്യാന്തരസ്റ്റേഡിയങ്ങളിൽ അധികം കാണാത്ത ഹെയ്തി, ഉസ്ബെക്കിസ്താൻ, കുറാസോ തുടങ്ങിയ രാജ്യങ്ങൾ പുതിയ കഥകളും പുതിയ മാജിക്കും പുതിയ ഹൃദയത്തകർച്ചകളുമായി അവിടെ ഉണ്ടായിരിക്കും. ഈ കൂട്ടത്തിൽ കുറാസോയുടെ ജനസംഖ്യ ഒന്നരലക്ഷവും വിസ്തീർണം കൊച്ചി കോർപ്പറേഷനെക്കാൾ അല്പം കൂടുതൽ മാത്രവുമാണ്. ഫുട്ബോൾ ദൈവങ്ങളുടെ അദ്‌ഭുതപ്രവൃത്തികൾ!

2026-ലെ എന്റെ സ്വകാര്യദുഃഖം സ്പെയിനാണ്. 1950-നുശേഷം അവർ ഇത്തവണ കളിക്കാനിറങ്ങുന്നത് ലാ ലിഗ, ചാമ്പ്യൻസ് ലീഗ് തുടങ്ങിയ കപ്പുകൾ വാരിക്കൂട്ടിയ ലോകോത്തര ക്ലബ്ബായ റയൽ മാഡ്രിഡിൽനിന്ന് ഒറ്റ കളിക്കാരനില്ലാതെയാണ്.

Content Highlights: Introduction of the Round of 32 knockout stage in 2026., Final major tournament for legends like Messi, Ronaldo, and Modric., Lamine Yamal emerging as a key figure for Spain., Inclusion of underdog nations like Curacao, Uzbekistan, and Haiti., Spain's unique squad composition without Real Madrid players. ns madhavan analysis