2017-ലെ നിരാശയകറ്റാന്‍ ഇന്ത്യ, പ്രശ്നങ്ങളില്‍ വലഞ്ഞ് ഓസീസും ഇംഗ്ലണ്ടും, കിവീസ് കറുത്ത കുതിരകളാകുമോ?
11 വര്‍ഷങ്ങള്‍ക്കു ശേഷം ഇന്ത്യ തങ്ങളുടെ ഐസിസി ട്രോഫി വരള്‍ച്ച അവസാനിപ്പിച്ചത് 2024-ലെ ടി20 ലോകകപ്പ് ജയത്തോടെയായിരുന്നു. 2023-ല്‍ സ്വന്തം നാട്ടില്‍ നടന്ന ഏകദിന ലോകകപ്പിലെ സ്വപ്നക്കുതിപ്പിനൊടുവില്‍ കലാശപ്പോരിലെ തോല്‍വി നല്‍കിയ നിരാശയ്ക്കു ശേഷമായിരുന്നു ആ കിരീട നേട്ടം. ഇപ്പോഴിതാ മറ്റൊരു ഐസിസി ടൂര്‍ണമെന്റിലും ടൂര്‍ണമെന്റ് ഫേവറിറ്റുകളായി എത്തുകയാണ് ഇന്ത്യന്‍ ടീം. ഈ കലണ്ടര്‍ വര്‍ഷത്തിലെ ഏറ്റവും വലിയ ക്രിക്കറ്റ് മാമാങ്കം. പാകിസ്താനിലും യു.എ.ഇയിലുമായി നടക്കുന്ന ഐസിസി ചാമ്പ്യന്‍സ് ട്രോഫിയില്‍ ഇന്ത്യന്‍ സംഘം പോരാട്ടത്തിനിറങ്ങുന്നത് തികഞ്ഞ ആത്മവിശ്വാസത്തോടെയാണ്. ഒരു ഏകദിന വിജയം പോലുമില്ലാതെയാണ് ഇന്ത്യ 2024 അവസാനിപ്പിച്ചത്. എന്നാല്‍ ഈ വര്‍ഷം ഇംഗ്ലണ്ടിനെതിരേ നാട്ടില്‍ നടന്ന ഏകദിന പരമ്പര തൂത്തുവാരിയാണ് ഇന്ത്യ ചാമ്പ്യന്‍സ് ട്രോഫിക്കായി ഒരുങ്ങിയത്. ഇന്ത്യന്‍ ക്രിക്കറ്റില്‍ വലിയൊരു മാറ്റത്തിനുകൂടി ചാമ്പ്യന്‍സ് ട്രോഫിയോടെ തുടക്കമാകും. ഒരുപക്ഷേ ഇന്ത്യന്‍ ക്യാപ്റ്റന്‍ രോഹിത് ശര്‍മയുടെ അവസാന ടൂര്‍ണമെന്റായേക്കും ഇത്. ചാമ്പ്യന്‍സ് ട്രോഫിക്കു ശേഷം രോഹിത്തിന്റെ ഭാവി തീരുമാനിക്കപ്പെടുമെന്നാണ് ടീം മാനേജ്‌മെന്റ് നേരത്തേ തന്നെ വ്യക്തമാക്കിയിട്ടുള്ളത്. അതിനാല്‍ തന്നെ കഴിഞ്ഞ ടി20 ലോകകപ്പ് പോലെ ചാമ്പ്യന്‍സ് ട്രോഫി വിജയിച്ച് ഏകദിന കരിയര്‍ അവസാനിപ്പിക്കാനാകും രോഹിത്തിന്റെ ശ്രമം.
വിരാട് കോലിക്കും ഇത് നിര്‍ണായക ടൂര്‍ണമെന്റാണ്. ഓസ്‌ട്രേലിയയില്‍ നടന്ന കഴിഞ്ഞ ബോര്‍ഡര്‍ ഗാവസ്‌ക്കര്‍ ട്രോഫിയിലെ നിറംകെട്ട പ്രകടനമാണ് കോലിക്കും രോഹിത്തിനും തിരിച്ചടിയായത്. പരമ്പരയിലെ മോശം പ്രകടനത്തോടെ ഇരുവര്‍ക്കുമെതിരേ വിവിധ കോണുകളില്‍ നിന്ന് വലിയ വിമര്‍ശനങ്ങളാണ് ഉയര്‍ന്നത്. എന്നാല്‍ ഇംഗ്ലണ്ടിനെതിരായ പരമ്പര ഇരുവരും ഫോമിലേക്ക് തിരിച്ചെത്തുന്നുവെന്നതിന്റെ സൂചനകള്‍ തന്നുകഴിഞ്ഞു. പരമ്പരയിലെ സമ്പൂര്‍ണ ജയവും പ്രധാന താരങ്ങളുടെ ഫോമും ചാമ്പ്യന്‍സ് ട്രോഫിയില്‍ ഇന്ത്യന്‍ പ്രതീക്ഷകളെ വാനോളമുയര്‍ത്തുന്നു.
Content Highlights: India aims for Champions Trophy glory in 2024, boasting a strong batting lineup.