കളത്തിലെ മാസ്റ്റര് മൈന്ഡ് കളമൊഴിയുമ്പോൾ; അശ്വിനുശേഷം ഇനിയെന്ത്?
ഇന്ത്യ-ഓസ്ട്രേലിയ ബോര്ഡര് ഗാവസ്ക്കര് ട്രോഫി പരമ്പരയിലെ മൂന്നാം ടെസ്റ്റിന്റെ അവസാന ദിനം. ബ്രിസ്ബെയ്നിലെ പ്രശസ്തമായ ഗാബയില് മഴ ചെറുതായി മാറിനില്ക്കുന്നു. രണ്ടാം ഇന്നിങ്സില് ബാറ്റിങ്ങിനിറങ്ങിയ ഓസ്ട്രേലിയക്ക് അതിവേഗം വിക്കറ്റുകള് നഷ്ടമാകുന്ന കാഴ്ച. ഇന്ത്യന് ആരാധകരുടെ മുഖത്ത് പുഞ്ചിരി. ഒടുവില് ഏഴിന് 89 റണ്സെന്ന നിലയില് ഇന്നിങ്സ് ഡിക്ലയര് ചെയ്ത ഓസ്ട്രേലിയ, ഇന്ത്യയ്ക്കു മുന്നില് 275 റണ്സെന്ന ലക്ഷ്യം വെയ്ക്കുന്നു. രണ്ട് സെഷന് ബാക്കിനില്ക്കേ വിജയത്തിലേക്ക് വേണമെങ്കില് ഒന്ന് ശ്രമിച്ചുനോക്കാവുന്ന അവസ്ഥ. എന്നാല് ഇന്ത്യ നാലാം ഇന്നിങ്സില് ബാറ്റിങ്ങിനിറങ്ങി രണ്ട് ഓവര് കഴിഞ്ഞതോടെ ഗാബയില് വീണ്ടും മഴ പെയ്തിറങ്ങി. തകര്ത്തുപെയ്യുന്ന മഴയ്ക്കിടെ ക്യാമറകള് ഇന്ത്യന് ഡ്രസ്സിങ് റൂമിലെ ഒരു കാഴ്ച ഒപ്പിയെടുക്കുന്നു. വിരാട് കോലിയും ആര്. അശ്വിനുമായിരുന്നു ഫ്രെയിമിൽ. എന്തോ സംസാരിച്ചശേഷം കോലി, അശ്വിനെ ചേര്ത്തുപിടിക്കുന്നു, തന്റെ അനുവാദമില്ലാതെ കണ്ണില് നിന്ന് ചാടിപ്പോകുന്ന മഴത്തുള്ളികളെ പിടിച്ചുവെയ്ക്കാന് അയാള് പാടുപെടുന്നു. അപ്പോഴും ആരാധകര്ക്ക് സംശയം, വൈകാതെ ആ സ്ഥിരീകരണമെത്തി. ഇന്ത്യന് ക്രിക്കറ്റ് കണ്ട എക്കാലത്തെയും മികച്ച സ്പിന്നര്മാരില് ഒരാള് കളി അവസാനിപ്പിച്ചിരിക്കുന്നു. 14 വര്ഷക്കാലത്തോളം ഇന്ത്യന് സ്പിന് ആക്രമണത്തിന്റെ കടിഞ്ഞാണേന്തിയ അശ്വിന് ദേശീയ ടീം ജേഴ്സി എന്നന്നേക്കുമായി അഴിച്ചുവെക്കുന്നു.
1990-കളില് ഇന്ത്യന് ആഭ്യന്തര ക്രിക്കറ്റിലെ പേരുകേട്ട സ്പിന്നര്മാരില് ഒരാളായിരുന്നു സുനില് സുബ്രഹ്മണ്യം. ഫസ്റ്റ് ക്ലാസ് ക്രിക്കറ്റില് ആദ്യം തമിഴ്നാടിനും പിന്നീട് അസമിനുമായി തകര്പ്പന് കളി പുറത്തെടുത്ത സുനിലിന് പക്ഷേ ഇന്ത്യന് ദേശീയ ടീമിന്റെ വാതില് തുറക്കാനായിരുന്നില്ല. 2001-ല് 34-ാം വയസില് കളിമതിയാക്കി ക്രിക്കറ്റ് പരിശീലനത്തിലേക്കു തിരിഞ്ഞ അദ്ദേഹം ഇപ്പോള് തമിഴ്നാട് ക്രിക്കറ്റ് അസോസിയേഷന്റെ മുഖ്യ പരിശീലകനാണ്. തനിക്ക് സാധിക്കാത്തത് തന്റെ ശിഷ്യന് സാധിക്കണമെന്ന സുനിലിന്റെ അടങ്ങാത്ത ആഗ്രഹവും വാശിയുമാണ് അശ്വിനെ ദേശീയ ടീമിലെത്തിക്കുന്നത്. പിച്ചില് തലകൊണ്ടുകൂടി പന്തെറിയുന്ന താരം. ഒരുപക്ഷേ എം.എസ് ധോനിക്കുശേഷം കളിക്കളത്തിലെ ടീം ഇന്ത്യയുടെ മാസ്റ്റര് മൈന്ഡ്.
Content Highlights: Indian spinner Ravichandran Ashwin announces retirement from international cricket