വൈഭവിനൊപ്പം മാതാപിതാക്കൾക്ക് യാത്രചെയ്യാമെന്ന് ബി.സി.സി.എ; അനുമതി പ്രായം കണക്കിലെടുത്ത്

ന്യൂഡൽഹി: ബി.സി.സി.ഐ.യുടെ പ്രത്യേക അനുമതിയോടെ 15-കാരനായ വൈഭവ് സൂര്യവംശിയുടെ മാതാപിതാക്കൾ ഇന്ത്യൻ ടീമിനൊപ്പം ശ്രീലങ്കയിലേക്കും യു.കെ.യിലേക്കും യാത്രചെയ്യും. വൈഭവിനെ ഇന്ത്യൻ ടി20 ടീമിലേക്ക് തിരഞ്ഞെടുത്ത സാഹചര്യത്തിലാണ് ഈ നീക്കം. ആദ്യമായി മുതിർന്ന കളിക്കാർക്കൊപ്പമുള്ള ടീമിലേക്ക് എത്തുന്ന വൈഭവിനുവേണ്ടി ബി.സി.സി.ഐ. പ്രത്യേക ഇളവുകൾ നൽകുകയായിരുന്നു.

16-ാം വയസ്സിൽ അരങ്ങേറ്റം കുറിച്ച സച്ചിൻ ടെണ്ടുൽക്കറുടെ റെക്കോർഡ് തകർത്തുകൊണ്ട് ഇന്ത്യക്കുവേണ്ടി കളിക്കുന്ന ഏറ്റവും പ്രായംകുറഞ്ഞ താരമാകാനൊരുങ്ങുകയാണ് ഈ കൗമാരക്കാരൻ. സാധാരണമായി കളിക്കാർക്കൊപ്പം മാതാപിതാക്കളെ യാത്രചെയ്യാൻ അനുവദിക്കാറില്ലെങ്കിലും വൈഭവിന്റെ പ്രായവും കഴിവും കണക്കിലെടുത്ത് പ്രത്യേക അനുമതി നൽകുകയാണെന്ന് ബി.സി.സി.ഐ. സെക്രട്ടറി ദേവാജിത് സൈകിയ വ്യക്തമാക്കി.

ഇന്ത്യ എ ടീമിൽനിന്ന് സീനിയർ ടീമിലേക്ക് തിരഞ്ഞെടുക്കപ്പെട്ട വൈഭവ് ഒരു മൈനറായതുകൊണ്ട് മുതിർന്ന താരങ്ങൾക്കൊപ്പം യാത്രചെയ്യുമ്പോൾ മാതാപിതാക്കളുടെ സാന്നിധ്യം ആവശ്യമാണെന്ന് ബോർഡ് കരുതുന്നു. യു.കെ. പര്യടനത്തിലും ഇതേ പിന്തുണ നൽകാൻ ബി.സി.സി.ഐ. തയ്യാറാണ്. അണ്ടർ-19 മത്സരങ്ങളിലേയും ഐ.പി.എലിലേയും മിന്നും പ്രകടനങ്ങളാണ് വൈഭവിനെ ഇത്ര വേഗത്തിൽ ദേശീയ ടീമിലേക്ക് എത്തിച്ചത്. ഐപിഎല്ലിൽ രാജസ്ഥാൻ റോയൽസിന് വേണ്ടി വെറും 23 മത്സരങ്ങളിൽനിന്ന് ആയിരത്തിലധികം റൺസ് നേടാൻ ഈ ഇടംകയ്യൻ ബാറ്റർക്ക് കഴിഞ്ഞിട്ടുണ്ട്.

Content Highlights: 15-year-old Vaibhav Sooryavanshi selected for India's T20I squad., BCCI grants special permission for parents to accompany the minor on tours., Potential to break Sachin Tendulkar's record as India's youngest debutant., Selection follows stellar IPL performance for Rajasthan Royals., Part of the official squad for upcoming Sri Lanka and UK tours.