എല്ലാ മേഖലകളിലും പെൺകുട്ടികൾ മികച്ച പ്രകടനം കാഴ്ചവെക്കുന്നതിന് കാരണം പ്രധാനമന്ത്രിയെന്ന് സ്മൃതി മന്ദാന

ന്യൂഡൽഹി: ഇന്ത്യൻ വനിതാ ക്രിക്കറ്റ് ടീം അംഗങ്ങളും മുഖ്യ പരിശീലകൻ അമോൽ മജുംദാറും ബുധനാഴ്ച (നവംബർ 5) പ്രധാനമന്ത്രി നരേന്ദ്ര മോദിയെ സന്ദർശിച്ചു. പ്രധാനമന്ത്രിയുടെ വസതിയിൽ വെച്ചായിരുന്നു കൂടിക്കാഴ്ച. നവി മുംബൈയിലെ ഡി വൈ പാട്ടീൽ സ്റ്റേഡിയത്തിൽ നവംബർ 5ന് നടന്ന ഫൈനലിലെ വിജയത്തിന് വനിതാ ലോകകപ്പ് ചാമ്പ്യന്മാരായ ടീമിനെ പ്രധാനമന്ത്രി നേരിട്ട് അഭിനന്ദനമറിയിച്ചു. ടൂർണമെന്റിൽ തുടർച്ചയായി മൂന്ന് തോൽവികൾക്കു ശേഷം ഇന്ത്യൻ വനിതാ ടീം നടത്തിയ ശ്രദ്ധേയമായ തിരിച്ചുവരവിനെ പ്രധാനമന്ത്രി പ്രശംസിച്ചു.

2017-ൽ ട്രോഫിയില്ലാതെ പ്രധാനമന്ത്രിയെ കണ്ടതിനെക്കുറിച്ചും ക്യാപ്റ്റൻ ഹർമൻപ്രീത് കൗർ ഓർമ്മിച്ചു. ഇനിയും അദ്ദേഹത്തെ കൂടുതൽ തവണ കാണാൻ ആഗ്രഹിക്കുന്നുവെന്നും ഹർമൻപ്രീത് പറഞ്ഞു. പ്രധാനമന്ത്രി തങ്ങൾക്ക് പ്രചോദനം പകർന്നുവെന്നും അദ്ദേഹം തങ്ങൾക്കെല്ലാവർക്കും ഒരു പ്രചോദനമാണെന്നും വൈസ് ക്യാപ്റ്റൻ സ്മൃതി മന്ദാന പറഞ്ഞു. എല്ലാ മേഖലകളിലും പെൺകുട്ടികൾ മികച്ച പ്രകടനം കാഴ്ചവെക്കുന്നതിന് കാരണം പ്രധാനമന്ത്രി മോദിയാണെന്നും സ്മൃതി മന്ദാന കൂട്ടിച്ചേർത്തു.

പ്രധാനമന്ത്രിയെ കാണാൻ കാത്തിരിക്കുകയായിരുന്നുവെന്ന് ടൂർണമെന്റിലെ താരമായി തിരഞ്ഞെടുക്കപ്പെട്ട ഓൾറൗണ്ടർ ദീപ്തി ശർമ്മ പറഞ്ഞു. 2017-ലെ കൂടിക്കാഴ്ചയെക്കുറിച്ചും, കഠിനാധ്വാനം തുടർന്നാൽ സ്വപ്നം സാക്ഷാത്കരിക്കാമെന്ന് അന്ന് പ്രധാനമന്ത്രി അവരോട് പറഞ്ഞതിനെക്കുറിച്ചും ദീപ്തി ഓർമ്മിച്ചു. ദീപ്തി ശർമ്മ തന്റെ ഇൻസ്റ്റഗ്രാം അക്കൗണ്ടിൽ 'ജയ് ശ്രീ റാം' എന്ന് എഴുതിയതിനെക്കുറിച്ചും കയ്യിലുള്ള ഹനുമാന്റെ ടാറ്റൂവിനെക്കുറിച്ചും പ്രധാനമന്ത്രി സംസാരിച്ചു. അത് തനിക്ക് ശക്തി നൽകുന്നുവെന്ന് ദീപ്തി പ്രധാനമന്ത്രിയോട് പറഞ്ഞു.

2021-ൽ ഇംഗ്ലണ്ടിനെതിരെ ഹർലീൻ കൗർ എടുത്ത പ്രശസ്തമായ ക്യാച്ചിനെക്കുറിച്ചും പ്രധാനമന്ത്രി ഓർമ്മിച്ചു. അതിനെക്കുറിച്ച് അദ്ദേഹം അന്ന് സോഷ്യൽ മീഡിയയിൽ പോസ്റ്റ് ചെയ്തിരുന്നു. ഫൈനൽ മത്സരത്തിന് ശേഷം ഹർമൻപ്രീത് പന്ത് പോക്കറ്റിലാക്കിയതിനെക്കുറിച്ച് പ്രധാനമന്ത്രി സംസാരിച്ചു. പന്ത് തന്റെ അടുത്തേക്ക് വന്നത് ഭാഗ്യമാണെന്നും അത് താൻ സൂക്ഷിച്ചുവെച്ചെന്നും അവർ പറഞ്ഞു.

നിരവധി പിഴവുകൾക്ക് ശേഷം അമൻജോത് കൗർ എടുത്ത പ്രശസ്തമായ ക്യാച്ചിനെക്കുറിച്ച് പ്രധാനമന്ത്രി സംസാരിച്ചു. ക്യാച്ച് എടുക്കുമ്പോൾ നിങ്ങൾ പന്ത് കാണുന്നുണ്ടാകും, എന്നാൽ ക്യാച്ചിന് ശേഷം നിങ്ങൾ കാണുന്നത് ട്രോഫിയായിരിക്കുമെന്ന് പ്രധാനമന്ത്രി പറഞ്ഞു. തന്റെ സഹോദരൻ പ്രധാനമന്ത്രിയുടെ വലിയ ആരാധകനാണെന്ന് ക്രാന്തി ഗൗഡ് പറഞ്ഞപ്പോൾ ഉടൻതന്നെ പ്രധാനമന്ത്രി ക്ഷണം അറിയിക്കുകയും ചെയ്തു.

Content Highlights: Indian Women`s Cricket Team and Coach Amol Muzumdar met PM Narendra Modi in Delhi to celebrate their Women`s World Cup victory. PM praised their comeback and shared inspiring words.